¹ Tunadhivuka nguetu ambe mbalaka yahano hanthsi yinathivuka, tuli neyi yatunga Kalunga. Mbalaka oyo keti ya kutunga na mavoko avantu, vunoni mbalaka ya miaka yoshe, yamuilu. ² Mukonda mbalaka yino motuli tu tatoka tutatelela vaka tudhaleke mbalaka yetu yije yitunda muilu. ³ Etu tutonda echi mukonda ambe tuyidhala kova ka tu uana mishenga-shenga. ⁴ Nthsimbu kanda tuli mumbalaka yino, tu tatoka mukonda kulema. Ko tuyongola va tushulule. Te nga, tuyongola va tudhaleke, keho vije viakala mu kuthsa vaka vimina kumuono. ⁵ Uje ua tu vuahethelele omo vilinge evi yakeye Kalunga, uje ua tuhanene Sipilitu mu kukala litavathano liovio vikeja. ⁶ Nthsimbu yoshe kaleni na kuthselela, tunapande kudhivuka nguetu tuli muimbo mu muvila, tuna litepe na Muene. ⁷ Mukonda tuenda mu luthselelo, keti ha kumona. ⁸ Mukemo tuli na luthselelo. Nkuma cho tuka kala hale na muvila na kuimbo hamo na Muene. ⁹ Keho tuvipuitha kukala vitume vietu, nambe tuli muimbo ndi hale, ku muvuaheletha. ¹⁰ Mukonda tunapande kukemana kulutue lua cipundi cha vuthompelo cha Kilistu, linga nkala muntu a kauane vina mu vandamena ku vilinge viapanga mu muvila, vikale ngua via chili ndi via kuviha. ¹¹ Keho honi, kuidhiva liova lia Muene, tu kokueya vantu. Evi viotuakala via lijombolola laja kuli Muene, njina vithselela nguange vina liyombolola mumana eni. ¹² Kotuethi na kuetheka ku mikokueya lalo mu kutumona vuchili. Te nga, tuli na kumihana konda mukale netu muna tushangala, linga mukale na ku kumbulula kuli vaje vaka shangala vifua vunoni keti omo lievi viakala mumbunge. ¹³ Mukonda ambe tuna dhimbaletha mana etu, evi vili omo lia Kalunga; amba lalo tuli mumana etu a kushungama, mukonda lieni. ¹⁴ Omo chidhango cha Kilistu cha tulania, mukonda tuna vidhivuka evi: Nguavo muntu umo uathsila voshe, keho oshe voshe vathsa. ¹⁵ Uathililile voshe , linga voshe vaje vayoya keti vakayoye omo liavo vavenia vuno omo liendi uje omo liavo uathsile na kushituka. ¹⁶ Mukonda lievi, kutunda hano kotu kapayetha naumo uahi kutuala muthsitu,nambe moviakala nguavo laja tua puithile Kilistu kufuamo. Vunoni ngeci kotu payetha nkala umo mungila eyi lalo. ¹⁷ Keho honi, nga umo ali muli Kilistu, napu kutanga kuakuha. Vilinge vialaja viahita. Taleni, vanakala vavaha. ¹⁸ Vilinge vioshe evi kuli Kalunga viatunda. Ua tudhimanganenaho kuhitila muli Kilistu na kutuhana vipanga via kuliechela. ¹⁹ Evi via, muli Kilistu Kalunga via kuhaka kumo vaka mavu nendi vavenia, kujeneka kutanda milonga yavo kuliendi. Natuthselela na mudhimbu ua kuliecela. ²⁰ Keho vana tuhangula kukala vakaleho va Kilistu, ngue muli Kalunga ua tutuma mu ku milongetha. Tu milambele, omo lia Kilistu: "Hilukeni kuli Kalunga!" ²¹ Ua linga Kilistu akale chikombelo omo lia milonga yetu. Endi yakeye kanda a hake lumo mulonga. Ua pangele evi linga tukale vaka kushungama muliendi.