¹ Mukupanga mumo nendi, etu lalo tumilambelela yeni keti kutambula kavumbi ka Kalunga mavokovoko. ² Omo nahandeka nguendi, "Munthsimbu ya kuvuaha ange Nja kutolilile , na mulitangua lia kuovoka Nja ku kuatethele. "Tala, ngechi yikeyo nthsimbu ya kuvuaha. Tala, ngechi yikeyo nthsimbu ya vuovoke. ³ Kotue kuhaka livue lia kupunduitha kulutue lua nkala uoshe, muomu etu kotua yonguele vipanga vietu va vipaye. ⁴ Te nga, etu tulimuethe etu vavenia muvipanga vietu vioshe, nguetu etu tuvangamba va Kalunga. Etu tuvangamba vendi mu kukaniama kuakama, vitanga, vuhutu, kukalu ua, ⁵ vipupa, tumenga, luozhi, kufuitangana, cilavulavu, munjala, ⁶ mukujela, mana, kukakatela, ngozhi, mu Sipilitu ua kujela, mu kuyongola kua kuvuaha. ⁷ Etu tu vandonge vendi mu lijui lia vushunga, mu vukama vua Kalunga. Etu tuli na vitua via vushunga via kuchilio na kuchimoshue. ⁸ Etu tuekupanga mu kavumbi na mu kushembulula, mu kutuka na mu kushangala. Etu vatuvangeya mu kulala vaka vishaki nolo kanda tu vaka vushunga. ⁹ Tukapanga ngue kova tuizhiva nolo kanda vatuizhiva vuino. Tukapanga ngue vana tuhana kashitiko kuvipanga vunohani keti ngue vana tu tumbuila kututhsiha. ¹⁰ Etu tupanga ngue vaka vuthiua, nkuma co nkalaha nthsimbu yoshe tuli mukujolela. Etu tupanga ngue vihutu, vunohani etu tupanga vufuko vuavuingi. Etu tupanga ngue viahi viotuakala navio munthsimbu co tuli navilinge viavingi. ¹¹ Etu tuna handeka vushunga vuje kuli yeni, vaka Kolintu, na zhimbunge zhetu zhina shokoloka. ¹² Kotua mishokelelele, vuno muna lishokeya muzhimbunge zheni. ¹³ Ngeci muku mipuitha mumo mukutengulula-Nji handeka ngue na vanike-lishokololeni muakama eni vavenia. ¹⁴ Keti mulikute kumo na vaka kujeneka kuitava. Mukonda kulikuata muka kuakala ha kushungama na ha kujeneka mashiko? Na kushangala muka kukalaho hakati ka cheke na muthithi? ¹⁵ Kulikata muka kuatha kukala kuli Kilistu na Mbeliale? Vika muka kutava a uana mumo na mu kakujeneka kuitava? ¹⁶ Na kulitava muka kuakalaho hakati ka tembele ya Kalunga na tumponia? Mukonda etu tu tembele ya Kalunga ua muono, ngue mua kuania Kalunga: "Njika kala muliyavo na kuenda mumo navo. Njika kala Kalunga uavo, navo vakakala vantu vange." ¹⁷ Ngoco hani, "Tundeni mukati kavo, mukale kua likalieni," muana handeka Muene. "Keti mukuate chimo cha kujuala, nange njika mitambula. ¹⁸ Ange njika kala Ishe yeni, neni mukakala vana vange va vamala na vana vange va vakentu,"nguendi Muene ua Kutuvakana vioshe.