¹ Apa aviyuvhire hompa kadi wa shirongo sha Sheba vitundwamo vya Saromo, ghuye mpo ayire ku Jerusalema akamusheteke na mapuro gha udito. Ayire na vipana vya vire, na ngameru sho kuyura vikwa mberera, ngorodo da dingi, na mawe gha mawa. Apa ayatikire kwa Saromo, mpo amutantilire navintje ovyo vya kaliro mu mutjima wendi. ² Saromo mpo a mulimbulire mapuro ghendi naghantje; kwato lipuro olyo lya muditopeliro Saromo, kwato olyo adilire kulimburura. ³ Apa amonine hompa kadi wa shirongo sha Sheba ukonentu wa Saromo na mbara oyo atunga, ⁴ ndya pa ntishe yendi, ghushingiro wa varughani vendi, virughana vya varughani vendi, na mudwato wavo, ntani vapindi vendi na mudwato wavo, na ndjambo ya kushwakerera oyo arughana kundjugho ya Hompa, kapi mwakalire munku mumwendi nka. ⁵ Ghuye a ghamba kwa hompa, ''Vyoushiri, mbudi oyo nayuvhanga mushirongo sha naumwande ku nkango doye na ukonentu woye. ⁶ Kapi navipulire evi na yuvhire dogoro naya kuno, na mantjo ghande ghanavimono weno. Kapishi ukahe wevi vatantilire kuhamena ukonentu woye na ungawo woye! ghuna pitakana na vitundwamo ovyo nayuvire kuhamena koye. ⁷ Wenki omo varagopa vakafumu voye, ntani weni omo varagopa varughani voye ava vayimanango kehe pano kumeho yoye, mukonda vavo kuyuvha ukonentu woye. ⁸ Lirago likare lya Hompa Karunga woye, oghu ana wano mfumwa mumoye, oghu akuturo ve pa shipuna sha uhompa, mukukara hompa kwa Hompa Karunga woye. Mukonda Karunga ghuye ahora Israeli, mposhi ngavature vakarerepo naruntje, akutura ukare hompa kukwavo, ove mukurughana uwa nauhungami!'' ⁹ Atapa kwa hompa maliva ghakutika 120 gha muwaya, gha ngorodo na vidumba vyavingi ntani mawe gha kufughura. Okunya kapi kwa kalire vidumba yira mbyovyo atapire hompa-kadi wa Sheba kwa hompaa Saromo. ¹⁰ Varughani va Hiramu ntani varughani va Saromo, ava vakayitiro ngorodo ku Ophira, vipirangi vya kushonga, ntani mawe gha mawa. ¹¹ Vipirangi, hompa avirughana vikare vya kurondera mundjugho ya Hompa na mundjugho yendi, ntani nka rumbendo na vikitara vya ntjumo. Kwato vipirangi yira vino vamonine kunyima mushingo sha Juda. ¹² Hompa Saromo atapa kwa hompa-kadi wa Sheba kehe vino a shanine na kehe vino apulire, ghuye kwamupire kupitakana evi ayitire kwahompa. Makura ghuye avyuka nakuyenda kushingo shendi, naye na varughani vendi. ¹³ Weno mukumo wa ngorodo eyi kayiyango kwa Saromo mumwakrabiya ntani vaa umwe kwakalire 666 ghadimuwaya-waya gha ngorodo, ¹⁴ kughupako ngorodo eyi vaghulitire vayitire. vaHompa navantje va Arabiya ntani vangughuru va mushirongo vayitire ngorodo da siliveli kwa Saramo. ¹⁵ Hompa Saromo arughana vikukandulito mafere maviri gha ngorodo eyi vadjamine. ¹⁶ Mafere matano nalimwe ghavi ngcengcere lifere dimurongo ntano kwa yendire kehe shikukandulito. Hompa avi tura mundjugho yamumutitu wa Lebanon. ¹⁷ Makura hompa arughana shipuna shauHompa shashinene nahuki ntani nakushifika na ngorodo yene-yene. ¹⁸ Kwa kalireko vitarapa vyakurondera vitono nashimwe ghukatike kushipuna shauhompa, ntani pakulyatera mpadi kwashitulire nkoko kushipuna shauhompa. Kehe kuruha rwashipuna kwa kalire pakutura maghoko oku kwa yimanino vanyime vaviri kumaruha naghantje. ¹⁹ Vanyime murongo navaviri vayimanino kuvitarapa vya kurondera, umwe kwakehe ruha rwa vitarapa vyakurondera vitano nashimwe. Mwakehe shirongo kapi mwa kalire shipuna shauhompa yira shino. ²⁰ Nkinda nadintje hompa Saromo kanwitanga da ngorodo, ntani nkinda nadintje dakaliro mundjugho yamumutitu waLebanoni mukonda yangorodo yene-yene. Kwato vya kaliro vya siliveli mukonda siliveli kwato ogho ayi tuliro ashi nayo mulyo mumayuva gha Saromo. ²¹ Hompa aklire nalifuta omo kaviyendanga vikepa, kayiyendango navashingi va Hiramu. Rumwe mwa kehe mwaka ntanu vipite vikashimbe ngorodo, siliveri, huki, ntani navikamangwandja. ²² Hompa Saromo apitakana vahompa navantje vamuudjuni kuungawo naukonentu. ²³ Vahompa navantje vapalivhuu vapalire likaropo lyaSaromo mukonda yakuyuva ukonentu wendi, oghu Karunga atura mumutjima wendi. ²⁴ Kehe mwaka kehe uno kava kughanga kamuyitiranga ushwi wa ngorodo, siliveri, vidwata, virwita, viduma, tukambe ntani murutiya. ²⁵ Saromo kwakalire namayovi mane ghahambo datukambe ntani tukarukara, ntani mayovi murongo namaviri ghavarondi vatukambe, evi aka tulire munkurumbara ntani kumwe nanaumwendi mu Jerusalem. ²⁶ Ghuye kapangerenga vahompa navantje vakaliro kumukuro wa Euphrates kushirongo shava Filisiti, ntani kudimurudi da Egipite. ²⁷ Hompa akalire na siliveri mu Jerusalem yira ungi wa mawe ghapalivhu. Ghuye arughana vitondo vyamusedeli vikare vyavingi yira vitondo vyaukuyu vyameno kuntere ya shirongo. ²⁸ Ava yita tukambe kwaSaromo tutunde ku Egipite ntani kuvirongo navintje. ²⁹ Vininke vimwe vyahaminino kwaSaramo, pakuhova ntani pakuhulilira, kapi vavitjangire mulihistoli, ntani mundjodi da Iddo wamukurona ( Eyi nka ya kaliro nambudi kuhamena Jeroboyamu mona wamukafumu wa Nebati)? ³⁰ Saromo kwapangilire vaIsrael muJerusalem mwaka dimurongo nee. ³¹ Ghuye arara kumwe navanyakulyendi ntani vantu ava muhoroke munkurumbara yaNdafita vashe. Rehobayamu, monendi wamukafumu, akara mulivango lyendi.