¹ بعد هذا عبر يسوع بحيرة الجليل، إللي هيه بحيرة طبرية، إللي بالجهة المقابلة، ² و مشوا وراه هواية ناس بعد ما شافوا معجزات شفائه للمرضى. ³ وصعد يسوع وتلاميذه للجبل و كعدوا. ⁴ وكان عيد الفصح اليهودي قرّب. ⁵ إنتبه يسوع وشاف ناس هواية جايين عليه، فكال لفيلبس:<< من وين نشتري خبز حتى نجيب أكل لكل هذولة؟>> ⁶ وكال هذا علمود يمتحنه، لأن يسوع كان يعرف شنو راح يسوي. ⁷ جاوبه فيلبس:<< حتى لو إشترينه خبز بميتين دينار، ما راح يكفي حتى واحدهم يحصل على قطعة صغيرة!>> ⁸ فكاله اندراوس، أخو سمعان بطرس، وهو واحد من التلاميذ: ⁹ <<إهنا أكو ولد عنده خمس خبزات شعير وسمجتين صغار. بس هذا ما يكفي لهذولة كلهم؟>> ¹⁰ فكال يسوع:<< كعدّوهم!>> وكان إهناك هواية حشيش. كعدوا الرجال، وكان عددهم حوالي خمستالاف. ¹¹ أخذ يسوع الخبزات وشكر، وإنطه منه للكاعدين، بكد ما رادوا. وهمين سوه بالسمجتين. ¹² من شبعوا، كال لتلاميذه:<< إجمعوا كسر الخبز إللي فضلت حتى ما يضيع شي!>> ¹³ جمعوها، وملوا اثنعش سلة من كسر الخبز إللي فضلت من الآكلين من خمس خبزات الشعير. ¹⁴ فمن شافوا الناس المعجزة إللي سواها يسوع كالوا:<< صدك، هذا هو النبي الجاي للعالم>>. ¹⁵ و عرف يسوع أنه همه على وشك أن يخطفوه حتى يسووه ملك، فرجع للجبل وحده. ¹⁶ ومن إجه الليل نزل تلاميذه للبحيرة، ¹⁷ وركبوا بلم متوجهين لكفرناحوم بالجهة المقابلة للبحيرة. وصار الليل وبعده يسوع ما لحكهم. ¹⁸ وهبت عاصفة قوية، فهجت البحيرة. ¹⁹ وبعد ما جذفوا التلاميذ حوالي تلاث أميال أو اربعة، شافوا يسوع دا يقترب من البلم ماشي على ماي البحيرة، فاستولى عليهم الخوف، ²⁰ فشجعهم وكال:<< آني هو لاتخافون!>> ²¹ و بعدهم ما لحكوا يكولوله اصعد للبلم، حتى وصل البلم للمكان المقصود. ²² وباليوم اللي بعده، الناس ما لكوا إللي باتوا بالجهة المقابلة من البحيرة إلا بلم واحد. و كانوا يعرفون إنه يسوع ما ركب البلم ويه تلاميذه(البارحة)، بس تلاميذه ركبوا وحدهم. ²³ و بعدين إجت أبلام ثانية من طبرية، ورست قريب من المكان إللي أكلوا بيه الخبز بعد ما شكر الرب عليه. ²⁴ والناس من ما لكوا يسوع ولا تلاميذه إهناك، ركبوا الابلام وجوي لكفرناحوم يدورون على يسوع. ²⁵ فمن لكوه على الجهة المقابلة من البحيرة، كالوله:<< يامعلم، شوكت وصلت إهنا؟>> ²⁶ جاوبهم يسوع:<< الصدك الصدك أكوللكم: إنتوا تدورون عليه مو لأنه شفتوا المعجزات، بس لأنه أكلتوا وشبعتوا من ذاك الخبز. ²⁷ لا تروحون ورا الأكل الفاني، روحوا ورا الأكل الباقي للحياة الابدية، إللي ينطيكم ياه إبن الأنسان، لأن هذا الأكل الله خله ختمه عليه>>. ²⁹ فسألوه:<< شنو نسوي حتى نعمل اللي يريده الله؟>> ²⁸ جاوب يسوع:<< الشغل إللي يريده الله هو أن تؤمنون باللي دزه>>. ³⁰ فكالوله:<< شنو هيه المعجزة إللي تسويها ونشوفها ونؤمن بيك؟ شتكدر تسوي؟ ³¹ لأن آباءنا أكلوا المنّ بالبرية مثل ما إجه بالكتاب: إنطاهم من السماء خبز حتى ياكلون!>> ³² جاوبهم يسوع:<< الصدك الصدك أكوللكم: موسى ما إنطاكم خبز من السماء، بس أبوية هو إللي ينطيكم هسة خبز السماء الحقيقي، ³³ فخبز الله هو النازل من السماء اللي ينطي حياة للعالم>>. ³⁴ كالوله:<< يا سيد، انطينه بكل بوكت هذا الخبز>>. ³⁵ فجاوبهم يسوع:<< أني هو خبز الحياة. إللي يجي يمي ما يجوع، و إللي يؤمن بيه ما يعطش أبد. ³⁶ بس كلتلكم إنتوا شفتوني وما تؤمنون، ³⁷ بس كل إللي ينطيني ياه الآب راح يجي يمي، وإللي يجي يمي ما اطلعه بره أبداً، ³⁸ لأنه نزلت من السماء، مو حتى أسوي إرادتي، بس إرادة إللي دزني. ³⁹ وإرادته هيه أنه ما أخلي واحد من إللي انطاني ياهم يهلك، بس اقيمه باليوم الأخير. ⁴⁰ نعم! إرادة أبوية هيه إنه كل من يشوف الأبن ويؤمن بيه إتكون إله الحياة الأبدية، وراح أقيمة آني باليوم الأخير>>. ⁴¹ إهنا اليهود كاموا يتشكّون على يسوع لأنه كال:<< آني الخبز إللي نزل من السماء>>. ⁴² وكالوا:<< مو هذا يسوع إبن يوسف، إللي احنة نعرف أبوه وأمه، شلون يكول: آني نزلت من السماء؟>> ⁴³ فجاوبهم يسوع:<< لا تتشكون بيناتكم! ⁴⁴ ميكدر أحد يجي يمي إلا اذا جذبه الآب إللي دزني. وأني أقيمه باليوم الأخير. ⁴⁵ إجه بكتب الأنبياء: راح يتعلم الكل من الله. وكل إللي يسمع الآب ويتعلم منه يجي يمي. ⁴⁶ ومو معنى هذا أنه واحد شاف الآب: ما شافه إلا إللي كان وية الله. هو وحده شاف الله. ⁴⁷ الصدك الصدك أكوللكم: إنه إللي يؤمن بيه إله حياة أبدية. ⁴⁸ آني هو خبز الحياة. ⁴⁹ آباؤكم أكلوا المنّ بالبرية وبعدين ماتوا، ⁵⁰ بس إهنا موجود الخبز النازل من السماء حتى ياكل منه الأنسان وما يموت. ⁵¹ آني الخبز الحي إللي نزل من السماء. اذا أكل واحد من هذا الخبز يحيا للأبد. والخبز إللي أنطيه آني، هو جسدي، أضحي بيه علمود يحيا العالم>>. ⁵² هذا الكلام سوه جدل عنيف بين اليهود، وإتسألوا:<< شلون يكدر هذا أن ينطينه جسده علمود ناكله؟>> ⁵³ فجاوبهم يسوع:<< الصدك الصدك أكوللكم: إذا ما تاكلون جسد إبن الإنسان وتشربون دمه فما عدكم حياة بداخلكم. ⁵⁴ إللي ياكل جسدي ويشرب دمي، إله حياة أبدية، وآني أقيمه باليوم الأخير، ⁵⁵ لأن جسدي هو الأكل الحقيقي، ودمي هو الشراب الحقيقي. ⁵⁶ وكل من ياكل جسدي ويشرب دمي، يثبت بيه وآني بيه. ⁵⁷ ومثل ما آني أحيا بالآب الحي إللي دزني، فهمين راح يحيا بيه إللي ياكلني. ⁵⁸ هذا هو الخبز إللي نزل من السماء، وهو مو مثل المنّ إللي أكله أبائكم وبعدين ماتوا. لأن إللي ياكل هذا الخبز يحيا للأبد>>. ⁵⁹ هذا كله كاله يسوع بالمجمع وهو يعلم بكفرناحوم. ⁶⁰ لما سمعوه هواية من تلاميذه كالو:<< شكد صعب هذا الكلام! منو يتحمل يسمعه؟>> ⁶¹ فعرف يسوع بداخله إنه تلاميذه يتشكّون، فسألهم:<< هو هذا إللي يخلي شكوك بداخلكم؟ ⁶² فشنو لو شفتوا إبن الأنسان صاعد وين ما كان قبل؟ ⁶³ الروح هو إللي ينطي الحياة، بس الجسد ما يفيد بشي. الكلام إللي كلمتكم بيه هو روح وحياة. ⁶⁴ بس قسم منهم ما يؤمنون!>> لأنه يسوع من البداية يعرف منو همه إللي ما يؤمنون بيه، ومنو هو إاللي راح يخونه. ⁶⁵ بعدين كال:<< علمود هذا كلتلكم: ميكدر أحد يجي يمي إلا اذا الله انطاه هذا الشي>>. ⁶⁶ من ذاك الوكت عافوه هواية من اللي يتبعوه، وبعد ما تبعوه! ⁶⁷ فكال للثنعش تلميذ:<< وإنتوا تريدون تروحون مثلهم؟>> ⁶⁸ جاوبه سمعان بطرس:<< وين نروح يا رب وكلام الحياة الأبدية عندك. ⁶⁹ إحنة آمنا وعرفنه أنه انته قدوس الله!>> ⁷⁰ فكال يسوع:<< مو آني إللي اختاريتكم إنتوا الاثنعش، ومع هذا واحد منكم شيطان؟>> ⁷¹ كان دا يقصد يهوذا إبن سمعان الاسخريوطي، إللي سلمه بعدين مع إنه كان من الاثنعش!