¹ وبعد هذا صعد يسوع لأورشليم بواحد من الأعياد اليهودية، ² وكان قريب من باب الغنم بأورشليم بركة ماي اسمها بالعبرية بيت حسدا، داير ما دايرهه خمس قاعات. ³ ينام بيها عدد هواية من المرضى من عميان وعرج ومشلولين، ينتظرون يتحرك ماي البركة، ⁴ لأنه ملاك كان يجي من وكت لوكت ويحرك ماي البركة، فإللي ينزل أول واحد يشفى مهمه كان مرضه. ⁵ كان أكو يم البركة مريض صارله ثمانية وتلاثين سنة، ⁶ شافه يسوع نايم إهناك فعرف انه صارله هواية على هذا الحال، فسأله:<< تريد تشفه؟>> ⁷ جاوبه المريض:<< يا سيد، ما عندي انسان يشمرني بالبركة من يتحرك الماي. وكم مرة حاولت انزل، كان غيري يسبقني دائماً>>. ⁸ كاله يسوع:<< كوم شيل فراشك وأمشي>>. ⁹ بالحال شفى الرجل وشال فراشه ومشى. و هذا صار بيوم سبت. ¹⁰ كال اليهود للرجل إللي شفه:<< اليوم سبت. ما يصير إتشيل فراشك!>> ¹¹ جاوبهم:<< إللي شفاني هو كالي: شيل فراشك وأمشي>>. ¹² فسألوه:<< ومنو هو إللي كالك: شيل فراشك وامشي؟>> ¹³ بس المريض إللي شفه ما كان يعرف منو هوه، لأن يسوع ابتعد، لأن كان أكو هواية ناس. ¹⁴ وبعد هذا لكاه يسوع بالهيكل، كاله:<< هسة إنته رجعت صحتك لا ترجع للخطية حتى لايصير بيك إللي هو أسوأ!>> ¹⁵ من عرف الرجل إنه يسوع هو إللي شفاه، راح بسرعة وكاللهم لليهود. ¹⁶ كاموا اليهود يضايقون يسوع لأنه كان يسوي هاي الأعمال يوم السبت. ¹⁷ بس يسوع كاللهم:<< بعده أبوية يشتغل لحد هسة. وآني همين أشتغل!>> ¹⁸ علمود هذا زاد سعي اليهود أن يكتلوه، مو بس لأنه خالف شريعة السبت، بس همين لأن كال أنه الله أبوه، مساوي نفسه بالله. ¹⁹ فكاللهم يسوع:<< الصدك الصدك أكوللكم أنه الأبن ما يكدر يسوي شي من كيفه، بس يسوي إللي يشوف الآب يسويه. لأنه كل إللي يسويه الآب يسويه الأبن همين، ²⁰ لأن الآب يحب الأبن، و يشوّفه كل إللي يسويه، وراح يشوفه همين أعمال أعظم من هذا العمل، فراح تندهشون. ²¹ فمثل ما يكّوم الموتى ويحييهم، هيج يحيي الأبن إللي يريده. ²² والآب ما يحاكم أحد، بس إنطى الأبن سلطة القضاء كلها، ²³ حتى الكل يكرمون الأبن مثل ما يكرمون الآب. وإللي ما يكرم الأبن ما يكرم الآب إللي دزه. ²⁴ الصدك الصدك أكوللكم إللي يسمع كلامي ويؤمن بإللي دزني تكون إله الحياة الأبدية، وما يتحاكم باليوم الأخير، لأنه انتقل من الموت للحياة. ²⁵ الصدك الصدك أكوللكم: إنه الساعة إللي يسمع بيها الأموات صوت إبن الله راح تجي وهيه هسة وإللي يسمعوه يحيون. ²⁶ لأنه مثل ما للآب حياة بذاته، فإنطى للأبن همين أن تصير إله حياة بذاته، ²⁷ وإنطاه سلطة أن يحكم، لأنه إبن الأنسان. ²⁸ لا تتعجبون من هذا: فراح تجي ساعة يسمع بيهه كل إللي بالقبور صوته، ²⁹ فيطلعون منها: فإللي سووا الصالح يطلعون بالقيامة إللي تودي للحياة، بس إللي سووا السيء فبالقيامة إللي تودي للدينونة. ³⁰ و أني ما أكدر أسوي شي بكيفي، بس أحكم مثل ما أسمع، وحكمي عادل، لأني ما أسعى علمود أحقق ارادتي بس إرادة إللي دزني. الآب يشهد للأبن ³¹ لو كنت أشهد لنفسي، كان شهادتي مو صادقة، ³² بس غيري يشهدلي، وآني أعرف إنه شهادته إلي هيه حق. ³³ و إنتوا دزيتوا مرسلين ليوحنا وهو شهد للحق. ³⁴ وآني أكول هذا مو لأني اعتمد على شهادة إنسان، بس علمود خلاصكم، ³⁵ لأن يوحنا كان مصباح متوهج ضوي، وردتوا تستمتعون بنوره فترة من الزمن. ³⁶ وآني عندي شهادة أعظم من شهادة يوحنا، وهيه شهادة الأعمال إللي كلفني الآب أن أكملها وإللي دا أسويها، هيه تشهدلي وتثبت أنه الآب دزني، ³⁷ والآب إللي دزني هو نفسه همين يشهدلي. وإنتوا ما سمعتوا صوته أبد، ولا شفتوا شكله، ³⁸ ولا ثبتت كلمته بقلوبكم، بدليل أنه إنتوا ما تصدكون باللي دزه. ³⁹ إنتوا تدرسون الكتب لأنكم تعتقدون راح تهديكم للحياة الأبدية. هاي الكتب تشهدلي، ⁴⁰ بس إنتوا ما تريدون تجون يمي حتى تكون إلكم الحياة. ⁴¹ ما أريد أي مجد من الناس. ⁴² بس آني أعرفكم، وأعرف انه محبة الله ما موجودة بنفوسكم. ⁴³ آني جيت بسم أبوية وما قبلتوني، بس انتوا ترحبون باللي يجيكم بسم نفسه. ⁴⁴ من وين الكم تؤمنون بيه وانتوا تقبلون المجد واحدكم من الثاني، من دون أن تسعون بطلب المجد إللي ماينطيه بس الله! ⁴⁵ لا تظنون آني اشتكي عليكم يم الآب،لأن إهناك إللي يشتكي عليكم، وهو موسى إللي علكتم عليه رجائكم. ⁴⁶ لو كنتوا صدكتوا موسى، كان صدكتوني، لأنه هو كتب عني. ⁴⁷ واذا كنتوا ما تصدكون إللي كتبه موسى، شلون راح تصدكون كلامي؟>>