¹ من عرف الرب انه الفريسيين سمعوا دا ياخذ تلاميذ و يعمد أكثر من يوحنا، ² ويسوع نفسه مو هو إللي دا يعمد بس إللي دا يعمد تلاميذه، ³ ترك منطقة اليهودية ورجع لمنطقة الجليل. ⁴ كان لازم يمر بمنطقة السامرة، ⁵ فوصل بلدة إهناك، اسمها سوخار، قريبة من الارض إللي انطاها يعقوب لابنه يوسف، ⁶ وين بير يعقوب. ومن تعب يسوع من السفر. كعد على حافة البير، وكانت الساعة حوالي ستة. ⁷ وإجت مره سامرية للبير حتى تاخذ ماي، فكالهه يسوع:<<اسكيني!>> ⁸ لأن تلاميذه راحو للمدينة علمود يشترون أكل. ⁹ كالتله المره السامرية:<< إنته يهودي وآني سامرية، شلون تطلب مني اسكيك؟>> لأن اليهود ما يتعاملون ويه أهل السامرة. ¹⁰ جاوبها يسوع:<< لو تعرفين عطية الله، ومنو إللي دا يكولج: اسكيني، كان إنتي طلبتي منه وانطاج ماي حي!>> ¹¹ كالت المره:<< بس يا سيد، ما عندك دلو، والبير عميقة. شلون عندك الماي الحي؟ ¹² قابل إنته أعظم من أبونه يعقوب إللي ورثنه منه هذا البير، وشرب منها هو وأولاده ومواشيه؟>> ¹³ كال إلها يسوع:<< كل إللي يشرب من هذا الماي يرجع يعطش. ¹⁴ بس إللي يشرب من الماي إللي انطيه آني، بعد ما يعطش أبد، لأن الماي إللي أنطيه يصير بداخله نبع يفيض فينطي حياة أبدية>>. ¹⁵ فكالتله المره:<< يا سيد، انطيني من هذا الماي علمود ما أعطش ولا أرجع إهنا حتى أخذ ماي>>. ¹⁶ كال إلهه:<< روحي جيبي زوجج، ورجعي إهنا>>. ¹⁷ جاوبته:<< ماعندي زوج!>> فكال:<<كلامج صحيح: ماعندج زوج ¹⁸ لأنه كان عندج خمس أزواج، وإللي تعيشين وياه هسة هو مو زوجج. هذا اللي حجيتيه صدك!>> ¹⁹ فكالتله المره:<< يا سيد، دا أشوف إنه إنته نبي. ²⁰ آباءنا عبدوا الله بهذا الجبل، وإنتوا اليهود مصرين إنه أورشليم تكون هيه المركز الوحيد للعبادة>>. ²¹ جاوبهه يسوع:<<صدكيني يا مره، راح تجي ساعة إللي بيهه تعبدون الآب لا بهذا الجبل ولا بأورشليم. ²² إنتوا تعبدون إللي ما تعرفوه، وإحنه نعبد إللي نعرفه، لأن الخلاص هو من يم اليهود. ²³ راح تجي ساعة، وهيه هسة، من يعبد العابدين الصادقين الآب بالروح و الحق. لأنه الآب يريد مثل هذولة العابدين. ²⁴ الله روح، علمود هذا لازم إللي يعبدوه يعبدوه بالروح و بالحق>>. ²⁵ كالتله المره:<< آني أعرف أنه المسيا، إللي هو المسيح، راح يجي، ومن يجي فهو راح يكشف إلنه كلشي>>. ²⁶ فجاوبهه:<< آني هو إللي دا يحجي وياج!>> ²⁷ وإهنا وصل التلاميذ، وإستغربوا من شافوه دا يحجي ويه المره. مع هذا محد منهم كاله:<< شتريد منهه؟>> أو << ليش دا تحجي وياها؟>> ^{28 30} المره عافت جرتها ورجعت للبلدة، وصارت تحجي للناس: ²⁹ << تعالوا شوفوا إنسان كشفلي كل إللي سويته! شنو قابل هو المسيح؟>> فطلعوا أهل سوخار وإجوا عليه. ³¹ وبهذا الوكت كان التلاميذ يكولوله بإلحاح:<< يا معلم، أكل>> ³² جاوبهم:<< عندي أكل أحسن إنتوا ما تعرفوه>>. ³³ التلاميذ صاروا يتساءلون:<< شنو أكو واحد جابله أكل؟>> ³⁴ كاللهم يسوع:<< أكلي هو أن أسوي مشيئة إللي دزني وأكمل شغله. ³⁵ إنتوا مو تكولون: بعد اربع أشهر يجي الحصاد! بس آني أكوللكم: باوعوا زين عل حقول، لأنه نضجت وصار وكت حصادها. ³⁶ والحاصد ياخذ أجرته، ويجمع الثمر للحياة الأبدية، فيفرحون الزارع والحاصد سوية، ³⁷ حتى يصير الكول: واحد يزرع، وواحد يحصد. ³⁸ آني دزيتكم حتى تحصدون إللي ما تعبتوا بيه، غيركم همه إللي تعبوا، وإنتوا دا تاخذون ثمر تعبهم>>. ³⁹ آمن بيه هواية من السامريين أهل ذيج المنطقة بسبب كلام المره اللي تشهد وتكول:<< كشفلي كل إللي سويته>>. ⁴⁰ ومن شافوه يم البير عزموه يبقى عدهم، وبقه إهناك يومين، ⁴¹ وزاد هواية عدد إللي آمنوا بيه بسبب كلامه، ⁴² وكالوا للمره:<< إحنة مو دا نؤمن بعد بسبب كلامج، بس نؤمن لأنه سمعناه بنفسنه، وعرفنه إنه هو مخلص العالم صدك!>> ⁴³ وبعد أن بقه يومين بسوخار، راح يسوع وسافر لمنطقة الجليل، ⁴⁴ وهو نفسه شهد من كال:<< ماكو نبي عنده كرامة بوطنه!>> ⁴⁵ فمن وصل للجليل رحبوا بيه اهلها، وهمه شافوا كل إللي سواه بأورشليم خلال عيد الفصح، لأنه همه همين راحوا للعيد. ⁴⁶ وصل يسوع لقانا الجليل، وين ما حول الماي الى مشروب العرس. و كان بكفرناحوم رجل من حاشية الملك، عنده إبن مريض. ⁴⁷ من سمع انه يسوع ترك اليهودية وإجه للجليل، راح عليه وطلب منه أن ينزل وياه لكفرناحوم حتى يشفي إبنه إللي على حافة الموت. ⁴⁸ كال يسوع:<< ما تؤمنون الإ اذا شفتوا المعجزات والعجايب!>> ⁴⁹ فتوسل إله الرجل وكال:<< يا سيد، إنزل وياية قبل لا يموت إبني!>> ⁵⁰ جاوبه يسوع:<< روح! إبنك حي!>> آمن الرجل بكلمة يسوع إللي كالها، وراح. ⁵¹ ومن كان نازل بالطريق شافوه قسم من عبيده وبشروه إنه إبنه حي، ⁵² سألهم بيا ساعة شفى، كالوله:<< البارحة ساعة سبعة بالليل، راحت عنه الحمه>>. ⁵³ عرف الأب انه هيه الساعة إللي كاله يسوع بيهه:<< إبنك حي>>. إهنا آمن هو وأهل بيته كلهم. ⁵⁴ هاي المعجزة هيه الثانية إللي سواها يسوع بعد ما طلع من اليهودية وراح للجليل.