¹ واحد من الفريسيين، إسمه نيقوديموس، وهو عضو بالمجلس اليهودي، ² اجه ليسوع بالليل وكاله:<<يا معلم، إحنة نعرف إنه إنت جيت من الله معلم، لأنه محد يكدر يسوي إللي إنته تسويه من معجزات إلا اذا كان الله وياه>>. ³ جاوبه يسوع:<< الصدك الصدك أكولك: محد يكدر يشوف ملكوت الله إلا إذا انولد من جديد>>. ⁴ سأله نيقوديموس:<< شلون يصير الأنسان ينولد وهو جبير بالعمر؟ قابل يكدر يدخل إبطن أمه مرة ثانية وبعدين ينولد؟>> ⁵ جاوبه يسوع:<< الصدك الصدك أكولك: محد يكدر يدخل ملكوت الله إلا إذا انولد من الماي والروح. ⁶ لأن المولود من الجسد هو جسد، والمولود من الروح هو روح. ⁷ لا تتعجب إذا كلتلك أنتوا لازم تنولدون من جديد. ⁸ الريح تهب وين ما تريد وتسمع صوتها، بس ما تعرف منين تجي ولا وين تروح. مثل هيج كل إللي انولدوا من الروح>>. ⁹ رجع نيقوديموس يسأل:<< شلون يصير هذا؟>> ¹⁰ جاوبه يسوع:<< إنت معلم إسرائيل وما تدري! ¹¹ الصدك الصدك أكولك: إحنة نحجي باللي نعرف ونشهد باللي شفناه، ومع هذا ما تقبلون شهادتنه. ¹² إذا كنت حجيتلكم بامور الأرض وما آمنتوا، شلون راح تؤمنون اذا حجيتلكم بأمور السماء؟ ¹³ ومحد صعد للسماء الا اللي نزل من السماء، وهو إبن الأنسان إللي هو بالسماء. ¹⁴ ومثل ما علك موسى الحية بالصحراء، لازم همين يتعلك إبن الأنسان، ¹⁵ حتى تكون الحياة الأبدية لكل واحد يؤمن بيه. ¹⁶ لأنه هيج حب الله العالم لحد ما ضحى بأبنه الوحيد، حتى ما يهلك كل واحد يؤمن بيه، بس تصير إله الحياة الأبدية. ¹⁷ لأن الله ما دز إبنه للعالم حتى يحكم عل عالم، دزه علمود يخلص بيه العالم، ¹⁸ اللي يؤمن بيه ما ينحكم عليه، بس إللي ما يؤمن بيه إهنا صدر عليه حكم الدينونة، لأنه ما آمن بسم إبن الله الوحيد. ¹⁹ وهذا هو الحكم: النور إجه للعالم، بس الناس حبّوا الظلمة أكثر من النور، لأن افعالهم كانت شريرة. ²⁰ لأن كل واحد يسوي الشر يكره النور، وما عنده خوف انه تنفضح افعاله. ²¹ بس إللي يمشي بالحق هذا يجي للنور حتى تبين اعماله انه صارت بقوة الله>>. ²² وبعد هذا راح يسوع وتلاميذه لبلاد اليهودية وكعد وياهم إهناك، وصار يعمد. ²³ ويوحنا همين كان يعمد بعين نون قريب على ساليم، لأن الماي إهناك كان هواية فالناس كانوا يجون ويتعمدون. ²⁴ لأنه يوحنا كان بعده ما دخل للسجن. ²⁵ صار جدال بين تلاميذ يوحنا وواحد من اليهود بخصوص التّطهر. ²⁶ فراحوا ليوحنا وكالوله:<< يا معلم، الرجل اللي شفناه وياك وره نهر الاردن، وإللي شهدتله، هو همين يعمد، والكل دا يروحون يمه!>> ²⁷ جاوب يوحنا:<< ما يكدر واحد ياخذ شي إلا يكون إنطه إله من السماء! ²⁸ إنتوا تشهدون انه كلت: مو آني المسيح، بس آني رسول يمهدله الطريق. ²⁹ إللي إله العروس، يصير هو العريس! بس صديق العريس، هو إللي يوكف يمه ويسمعه، فيفرح لفرحه بصوت العريس. وهسة فرحي اكتمل. ³⁰ إهنا لازم هو يزيد وآني أنقص>>. ³¹ إللي يجي من فوك هو فوك الكل. بس اللي هو من الأرض. هو أرضي ويحجي كلام أرضي. الجاي من فوك هو فوك الكل، ³² وهو يشهد باللي سمعه وشافه، ومحد يقبل شهادته! ³³ لأنه إللي يقبل بشهادته، هذا يأيد على انه الله حق، ³⁴ لأن إللي يدزه الله يحجي بكلام الله لأن الله ينطي الروح مو بالوزن. ³⁵ الأب يحب الأبن، وإنطه بيده كل شي. ³⁶ إللي يؤمن بالأبن، إله الحياة الأبدية. وإللي ميريد يؤمن بالأبن، ما راح يشوف الحياة، راح يستقر عليه غضب الله.