¹ وباليوم الثالث كان عرس في قانا بمنطقة الجليل، وكانت موجودة أم يسوع. ² وكان معزوم يسوع وهمين تلاميذه. ³ من خلص مشروب العرس، أم يسوع كالتله:<< ما بقه عدهم مشروب!>> ⁴ جاوبهه:<< شعليج بيه يا مره؟ بعده وكتي ما إجه!>> ⁵ كالت أمه للخدم:<< كل إللي يكوله إلكم سووه>>. ⁶ وكان أكو ست براميل حجر، يستعمل اليهود الماي مالتهه للتطهر، يكفي الواحد منها بين المكيالين او تلاثة( يعني بين الثمانين الى مية وعشرين لتر) ⁷ فكال يسوع للخدم:<< ترسوا البراميل ماي>>. ترسوها حتى رادت تفيض. ⁸ كال الهم:<< هسة اخذوا منها وانطوا لصاحب العزيمة>> سووا كلامه. ⁹ من ضاك صاحب العزيمة الماي إللي اتحول مشروب. و ماكان يعرف مصدره، بس الخدم اللي انطوه كانوا يدرون، صاح العريس، ¹⁰ وكاله:<< الناس كلهم يقدون المشروب الزين أول شي، وبعد ما يسكر الضيوف يقدون الهم الأقل جودة، بس إنت بقيت المشروب الزين لحد هسة!>> ¹¹ هاي المعجزة هيه أول وحدة سواها يسوع بقانا بالجليل، وبّين مجده، فآمن بيه تلاميذه. ¹² و بعدهه، نزل يسوع وأمه وإخوته وتلاميذه لمدينة كفرناحوم، وكعدوا إهناك أيام قليلة. ¹³ من صار قريب عيد الفصح اليهودي، صعد يسوع لأورشليم، ¹⁴ إهناك لكه إللي يبيعون البقر والغنم والحمام، والصرافين كاعدين على ميوزتهم، ¹⁵ فسوه سوط من الحبل، وطردهم كلهم من الهيكل، ويه الغنم والبقر، و طشر فلوس الصرافين وقلب ميوزتهم، ¹⁶ و كال للي يبيعون الحمام:<< طلعوا هاي منا. لا تخلون بيت أبوية يصير بيت تجارة!>> ¹⁷ إتذكر تلاميذه إللي كان بالكتاب:<< الغيرة على بيتك تاكلني>>. ¹⁸ اليهود قاوموا يسوع وكالوله:<< انطينه معجزه تثبت بيها السلطة مالتك حتى تسوي إللي سويته!>> ¹⁹ جاوبهم يسوع:<< فلشوا هذا الهيكل، وبتلاث أيام أبنيه>>. ²⁰ كالوله اليهود:<< إحتاج بناء هذا الهيكل ستة وأربعين سنة، وانته تكدر تبنيه بتلاث أيام؟>> ²¹ بس هو كان دا يقصد هيكل جسده. ²² بعدين من كام من الموت إتذكر تلاميذه هذا الحجي، فآمنوا بالكتاب و بالكلام إللي كاله يسوع. ²³ ومن كان باورشليم بعيد الفصح، آمنوا بسمه هواية لأن شافوا المعجزات إللي سواها. ²⁴ بس هو ما كان مأمن بيهم على نفسه، لأنه كان يعرف الكل ²⁵ و ما كان محتاج للي يشهدله عن الأنسان، لأنه يعرف أعماق الإنسان.