¹ بعد هذا بدا يسوع يتنقل بمنطقة الجليل، يتجنب يروح لمنطقة اليهودية، لأن اليهود كانوا يريدون يكتلوه. ² ومن قرب عيد المضال اليهودي، ³ كالوله إخوته:<< إترك هاي المنطقة وروح لليهودية حتى يشوفون جماعتك إللي تسويه من اعمال، ⁴ ماكو واحد يشتغل بالخفية اذا كان يريد الشهرة. ومادامك تسوي هاي الأعمال، إكشف نفسك للعالم>>. ⁵ لأن إخوته ما كانوا مؤمنين بيه. ⁶ فجاوبهم يسوع:<< ما إجه وكتي بعد، بس وكتكم هو مناسب دائماً. ⁷ ما يكدر العالم أن يكرهكم، بس يكرهني آني، لأن آني أشهد عليه إنه أفعاله شريرة. ⁸ صعدوا إنتوا للعيد، بس آني ماراح أصعد هسة لهذا العيد لأن وكتي بعده ما إجه>>. ⁹ هيج كاللهم وبقى بالجليل. ¹⁰ و بعد ما راحوا إخوته للعيد، هو همين راح بس متخفي، مو ظاهر. ¹¹ فكاموا اليهود يدورون عليه بالعيد، ويسألون:<< وين ذاك الرجل؟>> ¹² وإنتشر بين الناس مناقشات هواية علموده، فكال قسم منهم:<< هو زين>> وغيرهم كالوا:<<لا! هو يتّيه الشعب>> ¹³ بس محد إتجرأ وحجى عليه بالعلن، خوفاً من اليهود. ¹⁴ ومن راح نص العيد، صعد يسوع للهيكل وبدا يعلم الناس. ¹⁵ فاندهش اليهود وإتسألوا:<< شلون يعرف هذا الكتب وهو ما متعلم؟>> ¹⁶ فجاوبهم يسوع:<< تعليمي مو من عندي، تعليمي هو من إللي دزني ¹⁷ وإللي يريد يسوي إرادة الله هو راح يعرف إذا كان تعليمي من الله، أو آني دا أحجي من يمي. ¹⁸ إللي يحجي من يمه يطلب المجد لنفسه؛ بس إللي يطلب المجد للي دزه فهذا صادق وما بيه إثم. ¹⁹ مو إنطاكم موسى الشريعة؟ بس ماكو واحد بيكم يسوي إللي بالشريعة! ليش تريدون تكتلوني؟>> ²⁰ جاوبوه الجمع:<< بيك شيطان! منو يريد يكتلك؟>> ²¹ فكال يسوع:<< اشتغلت بيوم السبت شغل واحد وإستغربتوا كلكم. ²² وموسى وصّاكم بالطّهور وهذا مو يعني إنه الطهور يرجع لموسى بس همين للآباء وعلمود هذا تطّهرون الأنسان ولو يوم السبت. ²³ فإذا كنتوا تسوون الطّهور للأنسان يوم السبت حتى ما تخالفون شريعة موسى، ليش تضوجون مني لأنه شفيت انسان كله بيوم السبت؟ ²⁴ لا تحكمون حسب الظاهر، بس حكموا حكم عادل>>. ²⁵ بعدين كال قسم من أهل أورشليم:<< مو هو هذا إللي يريدون يكتلوه؟ ²⁶ هيانه دا يحجي علني ومحد دا يعارضه بشي. هسة، شنو إتاكد الرؤساء إنه هو صدك المسيح؟ ²⁷ لأنه المسيح من راح يجي محد يعرف من وين إجه، بس هذا إحنه نعرف أصله!>> ²⁸ فرفع يسوع صوته، وهو دا يعلم بالهيكل، كال:<< إنتوا تعرفوني وتعرفون من وين آني! وآني ما إجيت من يمي، بس إللي دزني هو حق وإنتوا ما تعرفوه. ²⁹ بس آني أعرفه، لأن آني منه وهو إللي دزني>>. ³⁰ فراد اليهود يلزموه، بس محد ما خله ايده عليه، لأن وكته بعده ما إجه بعد. ³¹ بس هواية من الموجودين آمنوا بيه، وكالوا:<< قابل المسيح، من يجي، يسوي معجزات أكثر من إللي دا يسويها هذا الرجل؟>> ³² وسمعوا الفريسيين إللي دا يهمسون بيه الناس عنه، فدزوا همه ورؤساء الكهنة قسم من الحراس حتى يلزموه. ³³ فكاللهم يسوع:<< آني باقي وياكم وكت قليل، وبعدين أرجع للي دزني. ³⁴ بعدين راح تدورون عليه وما راح تلكوني، وما تكدرون تروحون للمكان اللي راح اكون بيه>>. ³⁵ إهنا إتسأل اليهود بيناتهم:<< ليش وين يريد يروح حتى ما نلكاه؟ قابل يروح للمدن اليونانية إللي إطشروا بيهه اليهود، ويعلّم اليونانيين؟ ³⁶ وشنو دا يقصد بكوله: تسعون وتدورون عليه وما تلكوني، وما تكدرون تروحون وين ما آني أكون؟>> اذا واحد عطش خل يجيني ³⁷ وبأخر يوم من العيد، وهو أعظم أيامه، وكف يسوع وكال بأعلى صوته:<< إذا واحد عطش خلي يجي يمي ويشرب. ³⁸ ومثل ماكال الكتاب، إللي يآمن بيه تجري من داخله أنهار ماي حي>>. ³⁹ كال يسوع هذا عن الروح القدس إللي كان المؤمنين بيه راح يقبلوه. وبعده الروح ما كان معطى لأن يسوع بعده ما كان متمجد. ⁴⁰ ومن سمع الحاضرين هذا الكلام كال قسم منهم:<< هذا هو النبي من صدك>>. ⁴¹ وغيرهم كالوا:<< هذا هو المسيح>>. بس قسم منهم كالوا:<< هل يطلع المسيح من الجليل؟ ⁴² مو كال الكتاب المسيح راح يجي من نسل داود، و من قرية بيت لحم وين ما كان داود؟>> ^{43 44} وهيج صار بسببه إنقسام بين الناس بالرأي. وقسم منهم رادوا يلزموه؛ بس محد خله ايده عليه. ⁴⁵ ورجع حراس الهيكل للفريسيين ورؤساء الكهنة، فسألوهم:<< ليش ما جبتوه؟>> ⁴⁶ فجاوبوا:<< أبد ما سمعنه إنسان يحجي مثل كلامه!>> ⁴⁷ فجاوبوا ضايجين:<< وإنتوا همين تيهتوا؟ ⁴⁸ همين شفتوا واحد من الرؤساء أو من الفريسيين آمن بيه؟ ⁴⁹ بس عامة الشعب إللي ما يعرفون الشريعة، فاللعنة عليهم!>> ⁵⁰ بس واحد منهم، وهو نيقوديموس اللي إجه ليسوع بالليل، ⁵¹ كاللهم:<< هل تسمح شريعتنه بأنه ينحكم على واحد من دون ان نسمع دفاعه او نعرف شنو ذنبه؟>> ⁵² فجاوبوه:<< شنو إنته همين من الجليل؟ إدرس الكتاب وإتعلم ما طلع نبي أبد من الجليل!>> ⁵³ وبعدين كل واحد راح لبيته.