¹ كلتلكم هذا علمود ما تتزعزعون. ² راح تنطردون بره المجامع، وراح يجي وكت يظن بيه إللي يكتلكم إنو دا يسوي خدمة لله. ³ وهمه يسوون هذا بيكم لأنهم ماعرفوا أبوية، ولاعرفوني. ⁴ كلتلكم هذا علمود من يصير وكت حدوثه تتذكرون سبق أن نبهتكم بيه. وما كلتلكم هذا من البداية لأني كنت وياكم؛ ⁵ وهسة آني راجع للي دزني، ومحد منكم يسألني: وين رايح؟ ⁶ من كلتلكم هذا ملا الحزن قلوبكم. ⁷ بس آني أكوللكم الصدك: من الأحسن إلكم أن أروح، لأنه إذا ما أروح، ما يجيكم المعين. بس إذا رحت أدزه الكم. ⁸ ومن يجي يأنب العالم على الخطية وعلى البر وعلى الدينونة: ⁹ إذا على الخطية، فلأنهم ما يؤمنون بيه، ¹⁰ وإذا على البر، فلأني راجع للآب فما تشوفوني بعد؛ ¹¹ وإذا على الدينونة، فلأن سيد هذا العالم تم عليه إصدار حكم الدينونة. ¹² بعد عندي أمور هواية أكولها إلكم، بس إنتوا هسة متكدرون تتحملوها. ¹³ بس، من يجيكم روح الحق يرشدكم للحق كله، لأنه ما يكول شي من عنده، بس يكوللكم إللي يسمعه، ويكشفلكم على إللي راح يصير. ¹⁴ وهو راح يمجّدني لأنه كل إللي يكوله إلكم جاي مني. ¹⁵ كل إللي هو للآب، هو إلي. وعلمود هذا كلتلكم أنه إللي راح يكوله إلكم جاي مني. ¹⁶ بعد شوية ما تشوفوني، وبعد هذا بشوية تشوفوني!>> ¹⁷ فتساءل قسم من التلاميذ: <<شنو، معنى كلامه: بعد شوية ما تشوفوني، وبعد هذا بشوية تشوفوني، وهمين: لأني راجع يم الآب؟>> ¹⁸ وكالوا: <<شنو هو هذا القليل اللي يحجي عنه؟ ما دا نفهم إللي يكوله!>> ¹⁹ وعرف يسوع همه يريدون يسألوه، فكاللهم: <<دا تسألون عن معنى كلامي: بعد شوية ما تشوفوني وبعدين بعد شوية همين تشوفوني. ²⁰ الصدك الصدك أكوللكم: إنتوا راح تبجون وتنوحون، بس العالم يفرح. إنتوا راح تحزنون، بس حزنكم راح يتحول فرح. ²¹ المره تحزن إذا إجتي ساعتها علمود تولد. بس من ينولد طفلها، ما ترجع تتذكر وجعها، لأنه فرحت بإنسان إنولد بهذا العالم. ²² فهمين إنتوا، تحزنون هسة؛ بس من ارجع ألتقي بيكم، تفرح قلوبكم، ومحد يسلبكم فرحكم. ²³ بذاك اليوم لا تسألوني عن شي. الصدك الصدك أكوللكم: إنه الآب راح ينطيكم كل إللي تطلبوه منه باسمي. ²⁴ لحد هسة ما طلبتوا باسمي شي. اطلبوا تاخذون، فراح يكون فرحكم كامل. ²⁵ ضربتلكم أمثال بكلامي عن هاي الأمور، بس راح يجي وكت أحجي وياكم بيه عن الآب بكلام صريح، بدون أمثال. ²⁶ بذاك اليوم تطلبون من الآب باسمي. وما دا أكوللكم آني أطلب إله بدالكم. ²⁷ لأن الآب نفسه يحبكم، لأنكم حبيتوني، وآمنتوا بأنه آني من يم الله طلعت. ²⁸ طلعت من يم الآب، وإجيت للعالم، وراح أترك العالم وأرجع للآب>>. ²⁹ فكالوله تلاميذه: <<هسة إنته دا تحجي ويانة كلام صريح مو أمثال. ³⁰ فهسة نعرف إنته تعرف كل شي، وما تحتاج أن يسألك واحد. علمود هذا نؤمن أنك إجيت من يم الله>>. ³¹ فرد يسوع: << هسة يلة تؤمنون؟ ³² راح تجي ساعة وهاي جتي هسة بيها تتفرقون كل واحد لبيته، وتعوفوني وحدي. بس آني مو وحدي، لأن الآب وياية. ³³ كلتلكم بهذا كله علمود يصير إلكم بيه سلام. لأنكم بالعالم راح تعانون الضيق. بس إتشجعوا، لأن آني انتصرت عل عالم!>>