¹ آني شجرة العنب الحقيقية، وأبوية هو الزارع. ² كل غصن بيّه ما ينتج ثمر يكطعه؛ وكل غصن ينتج ثمر ينقيه حتى ينتج ثمر أكثر. ³ إنتوا هسة أنقياء علمود الكلمة إللي حاجيتكم بيها. ⁴ فثبتوا بيه وآني بيكم. مثل ما الغصن ميكدر يجيب ثمر إلا إذا ثبت بشجرة العنب؛ فإنتوا همين، إلا إذا ثبتوا بيه ⁵ آني شجرة العنب وإنتوا الأغصان. إللي يثبت بيه وآني بيه، فذاك يجيب ثمر هواية. بس إذا انعزلتوا عني متكدرون تسوون شي. ⁶ إذا كان واحد ما يثبت بيّه ينطرح بره مثل الغصن فينشف؛ بعدين تنجمع الأغصان الناشفة، وتنذب بالنار فتحترك. ⁷ بس إذا ثبتوا بيّه، وثبت كلامي بيكم، فطلبوا إللي تريدوه يكون إلكم. ⁸ إبهذا يتمّجد أبوية: أن تجيبون ثمر هواية فتصيرون صدك تلاميذي. ⁹ مثل ما حبني الآب، حبيتكم آني، فثبتوا بمحبتي. ¹⁰ إذا سويتوا بالوصايا مالتي، تثبتون بمحبتي، مثل ما آني سويت وصايا أبوية وأثبت بمحبته! ¹¹ كلتلكم هذا علمود يكون بيكم فرحي، ويكون فرحكم كامل. ¹² وصيتي إلكم هيه هذي: أن يحب واحدكم الثاني مثل ما آني حبيتكم. ¹³ ماكو لواحد محبة أعظم من هذي: أن يضحي واحد بحياته فدى أحبابه. ¹⁴ وإنتوا أحبابي إذا سويتوا باللي أوصيكم بيه. ¹⁵ بعد ما أسميكم عبيد، لأن العبد ما يكشفله سيده على إللي يسويه، بس آني سميتكم أحباب لأني كشفت إلكم كل إللي سمعته من أبوية. ¹⁶ مو إنتوا إختاريتوني، آني إختاريتكم وعينتكم حتى تنطلقون وتجيبون ثمر ويدوم ثمركم، فينطيكم الآب كل إللي تطلبوه باسمي. ¹⁷ فبهذا أوصيكم: أن تحبون واحدكم الثاني. ¹⁸ إذا كرهكم العالم، فعرفوا إنه كرهني من قبلكم. ¹⁹ لو كنتوا من أهل العالم، كان العالم يحب أهله، بس لأنه إنتوا مو من أهل العالم، بس آني إختاريتكم من وسط العالم، علمود هذا يكرهكم العالم. ²⁰ إتذكروا الكلمة إللي كلتها إلكم: ماكو عبد أعظم من سيده. فإذا كان أهل العالم ظلموني، فراح يظلموكم؛ وإذا كانوا سووا بكلمتي، فراح يسوون بكلمتكم. ²¹ بس راح يسوون هذا كله بيكم علمود إسمي، لأنه ما يعرفون إللي دزني. ²² لو ما أجيت وحجيت وياهم، ما كان عدهم خطية؛ بس ماعدهم عذر هسة بخطيتهم. ²³ إللي يكرهني، يكره أبوية همين. ²⁴ ولو ما سويت اعمال ما سواها واحد غيري، ما كانت إلهم خطية. بس همه كرهوني وكرهوا أبوية، مع إنه شافوا ذيج الاعمال. ²⁵ وهذا الشي صار علمود تصير الكلمة المكتوبة بشريعتهم: كرهوني بلا سبب! ²⁶ ومن يجي المعين، إللي راح أدزه إلكم من يم الآب، روح الحق إللي ينبثق من الآب، هو يشهدلي، ²⁷ وتشهدون إلي إنتوا همين، لأنكم وياية من البداية.