¹ <<لا تخاف قلوبكم. إنتوا تؤمنون بالله، آمنوا بيه همين. ² إبيت أبوية بيوت هواية، ولو ماكان الموضوع هيج همين كان كلتلكم! آني رايح أحضرلكم مكان. ³ و بعد أن أروح وأحضرلكم مكان أرجعلكم وأخذكم يمي، حتى تكونون وين ما آني أكون. ⁴ إنتوا تعرفون آني وين رايح، وتعرفون الطريق>>. ⁵ فكال توما: <<يا سيد، ما نعرف إنته وين رايح، فشلون نعرف الطريق؟>> ⁶ فجاوبه يسوع: <<آني هو الطريق والحق والحياة. ما يجي واحد يم الآب إلا بيّه. ⁷ إذا كنتوا عرفتوني، فإنتوا عرفتوا أبوية همين، ومن هسة عرفتوه وشفتوه>>. ⁸ فكاله فيلبس: <<يا سيد شوفنه الآب وكافي!>> ⁹ فجاوبه يسوع: <<كل هاي المدة الطويلة وآني وياكم وما عرفتني يا فيلبس؟ إللي شافني شاف الآب، فشلون تكول: شوّفنه الآب؟ ¹⁰ ليش إنته ما تؤمن إنه آني بالآب، والآب بيه؟ الكلام إللي أكوله ما أكوله من عندي، بس الآب إللي هو بيّه هو يسوي أعماله هذي. ¹¹ صدكوا كلامي: إنه آني بالآب والآب بيه، وإلا فصدكوني علمود ذيج الأعمال. ¹² الصدك الصدك أكوللكم: إللي يؤمن بيه يسوي الأعمال إللي آني أسويها، ويسوي أعظم منها، لأني رايح يم أبوية. ¹³ فأي شي تطلبوه باسمي أسويه إلكم، خل يتمجد الآب بالأبن. ¹⁴ إذا طلبتوا شي باسمي، فآني أسويه. ¹⁵ إذا كنتوا تحبوني سووا وصاياي. ¹⁶ وراح أطلب من الآب أن ينطيكم معين ثاني يبقى وياكم للأبد، ¹⁷ وهو روح الحق، إللي ميكدر العالم أن يتقبّله لأنه ما يشوفه ولا يعرفه، بس إنتوا تعرفوه لأنه هو بوسطكم، وراح يكون بداخلكم. ¹⁸ ما راح أعوفكم يتامى، بس راح ارجعلكم. ¹⁹ بعد شوية ما يشوفني العالم. بس إنتوا راح تشوفوني. ولأني آني حي، فإنتوا همين راح تحيون. ²⁰ بذاك اليوم راح تعرفون إنه آني بأبوية، وإنتوا بيّه، وآني بيكم. ²¹ إللي كانت عنده وصاياي، ويسوي بيها، فهذا يحبني. وإللي يحبني، يحبه أبويه، وآني أحبه وأكشفله ذاتي>>. ²² فسأله يهوذا، مو الاسخريوطي: <<يا سيد، شنو صار حتى تكشفلنه ذاتك وما تكشفها للعالم؟>> ²³ جاوبه يسوع: <<إللي يحبني يسوي كلمتي، ويحبه أبوية، ويمه نجي، ويمه نسويلنه بيت. ²⁴ وإللي ما يحبني ما يسوي كلامي. وهذا الكلام إللي تسمعوه مو من عندي، بس من الآب إللي دزني، ²⁵ وآني كلتلكم هاي الأمور وآني بعدني يمكم. ²⁶ والروح القدس، المعين إللي راح يدزه الآب باسمي، فهو يعلمكم كل شي، ويذكركم بكل إللي كلته إلكم. ²⁷ سلام أترك إلكم. سلامي أنطيكم. مو مثل ما ينطي العالم أنطيكم آني. فلا تتشوش قلوبكم ، ولا تنرعب. ²⁸ سمعتوني كلتلكم: آني رايح من يمكم وبعدين أرجعلكم. فإذا كنتوا تحبوني، كنتوا تفرحون لأني رايح للآب، لأن الآب أعظم مني. ²⁹ وآني كلتلكم بالموضوع قبل ما يصير، حتى من يصير تؤمنون. ³⁰ ما راح احجي وياكم هواية بعد، لأن سيد هذا العالم جاي عليّه، وما عنده شي بيّه. ³¹ بس هذا راح يصير علمود يعرف العالم آني أحب الآب، وآني مثل ما وصاني الآب هيج أسوي. كوموا! خلي نروح منا!