¹ وقبل عيد الفصح، ويسوع يعرف إنه ساعته جتي علمود يروح من هذا العالم للآب، ولأنه كان يحب جماعته إللي بالعالم، حبهم هسة أقوى محبة: ² خلال العشه، وكان الشيطان خله بقلب يهوذا إبن سمعان الاسخريوطي أن يخون يسوع. ³ وكان يسوع يعرف إنو الآب خله كل شي بإيده وإنو من الله طلع ولله راح يرجع، ⁴ كام عن ميز العشه، ونزع رداءه وأخذ منشفة لفها على خصره، ⁵ وبعدين صب ماي بسطل مال غسل، وبدا يغسل رجلين التلاميذ ويمسحها بالمنشفة اللي على خصره. ⁶ فمن وصل يم سمعان بطرس، كاله سمعان: <<يا سيد، إنته تغسل رجليّه!>> ⁷ فجاوبه يسوع: <<إنته هسة ما راح تفهم إللي دا أسويه، بس راح تفهم بعدين>>. ⁸ بس بطرس أصرّ كايل: <<لا، ما تغسل رجلي أبد!>> فجاوبه يسوع: <<إذا كنت ما أغسلك، فما عندك نصيب وياية!>> ⁹ إهنا كاله سمعان بطرس: <<يا سيد، مو بس رجلي، إيدي وراسي همين!>> ¹⁰ فكال يسوع: <<إللي إنغسل صار كله نقي، وما يحتاج غير بس غسل رجليه. وإنتوا انقياء، بس مو كلكم>>. ¹¹ لأنه يسوع كان يعرف منو إللي راح يخونه، وعلمود هذا كال: <<مو كلكم أنقياء>>. ¹² وبعد ما خلّص من غسل رجليهم، أخذ رداءه وكعد من جديد، وسألهم: << إفتهمتوا إللي سويته بيكم؟ ¹³ إنتوا تسموني معلم وسيد، وصدكتوا، لأن آني هيج. ¹⁴ فإذا كنت، وآني السيد والمعلم، غسّلت رجليكم، فلازم إنتوا همين تغسلون رجلين واحدكم الثاني. ¹⁵ لأنه انطيتكم مثال حتى تسوون مثل ما آني سويت إلكم. ¹⁶ الصدك الصدك أكوللكم: <<ماكو عبد أعظم من سيده، ولا رسول أعظم من إللي دزه. ¹⁷ فإذا كنتوا عرفتوا هذا، فهنيالكم إذا سويتوا بيه. ¹⁸ وآني مدا أكول هذا على كلكم، لأنه آني أعرف إللي اختاريتهم. بس لازم يصير الكتاب من يكول: ‘اللي ياكل من خبزي، رفع عليّ كعبّه! ¹⁹ وآني أكوللكم إللي راح يصير، قبل ما يصير، حتى إذا صار تؤمنون إني آني هو. ²⁰ الصدك الصدك أكوللكم: اللي يقبل باللي ادزه، يقبلني؛ وإللي يقبلني، يقبل إللي دزني>>. ²¹ ومن كال يسوع هذا قلقت نفسه وعلن كايل: <<الصدك الصدك أكوللكم: إنو واحد منكم راح يسلمني!>> ²² فإتبادلوا التلاميذ نظرات الحيرة وهمه ما دا يعرفون منو هو إللي يقصده. ²³ وكان التلميذ إللي يحبه يسوع منتجي على حضنه. ²⁴ فأشرله سمعان بطرس علمود يسأل يسوع منو هو إللي يقصده. ²⁵ فمال على صدر يسوع وسأله: <<منو هو يا سيد؟>> ²⁶ فجاوب يسوع: <<هو إللي أنطيه اللكمة إللي اغمسها>>. بعدين غمس اللكمة وإنطاها ليهوذا ابن سمعان الاسخريوطي. ²⁷ وبعد اللكمة، دخله الشيطان. فكاله يسوع: << إسرع باللي نويت أن تسويه!>> ²⁸ وما افتهم أحد من الكاعدين ليش كاله هيج. ²⁹ بس ظن قسم منهم إنو دا يطلب منه يشتري إللي يحتاجوه للعيد، أو أن ينطي للفقره قسم من الفلوس، لأنه كان أمين الصندوك. ³⁰ وبس أكل يهوذا اللكمة، حتى طلع وكان الليل صار أظلم. ³¹ ومن طلع يهوذا، كال يسوع: <<هسة إتمجد ابن الانسان وإتمجد الله بيه، ³² وما دام الله إتمجد بيه، فهو راح يمجده بذاته، وسريع راح يمجده. ³³ يا أولادي الصغار، راح ابقى يمكم وكت قصير بعد، بعدين تريدوني، بس أكوللكم إللي سبق وكلته لليهود: إنتوا ماتكدرون تجون وين ما آني رايح. ³⁴ وصية جديدة آني أنطيكم: حبّوا بعضكم بعض، مثل ما حبيتكم آني، تحبّون بعضكم. ³⁵ بهذا يعرف الكل إنتوا تلاميذي: إذا كنتوا تحبّون بعضكم بعض>>. ³⁶ فسأله سمعان بطرس: <<يا سيد، وين تروح؟>> جاوبه يسوع: << ما تكدر تجي وراية هسة وين راح أروح، بس راح تجي وراية بعدين>>. ³⁷ فرجع بطرس يسأل: <<يا سيد، ليش ما أكدر اجي وياك هسة؟ آني أضحي بحياتي بدالك!>> ³⁸ جاوبه يسوع: << إتضحي بحياتك بدالي؟ الصدك الصدك أكولك: ما يصيح الديج لحد ماتنكرني تلاث مرات!>>