¹ وقبل الفصح بست أيام إجه يسوع لبيت عنيا، بلد لعازر إللي كومه من بين الأموات. ² فسووله عزيمة عشه، وصارت مريم تخدم، وكان لعازر واحد من الكاعدين وياه. ³ فأخذت مريم مناً(يعني ثلث لتر) من عطر الناردين الخالص الغالي الثمن. ودّهنت بيه رجلين يسوع، وبعدين مسحتهم بشعرها، فالريحة الطيبة ملت البيت كله. ⁴ فكال واحد من التلاميذ، وهو يهوذا سمعان الاسخريوطي، إللي كان راح يخون يسوع: ⁵ << ليش ما باعوا هذا العطر بتلاثمية دينار وإتوزع عل فقره؟>> ⁶ وما كال هذا لأنه يعطف عل فقره، بس لأنه كان حرامي، لأنه كان أمين للصندوك وكان ياخذ من إللي ينحط بيه. ⁷ فجاوبه يسوع: <<عوفها! لأنها إحتفظت بهذا العطر ليوم دفني، ⁸ لأن الفقره يمكم بكل وكت؛ بس آني ما راح أكون يمكم بكل وكت>>. ⁹ وعرفوا هواية من اليهود إنو يسوع إبيت عنيا، فإجوي مو علمود يشوفون بس يسوع، بس همين يشوفون لعازر إللي كومه من بين الاموات. ¹⁰ فقرروا رؤساء الكهنة أن يكتلون لعازر همين، ¹¹ لأنه هواية من اليهود كانوا يعوفوهم بسببه ويؤمنون بيسوع. ¹² وباليوم التالي، عرف الجمهور الهواية إللي إجه للعيد إنو يسوع جاي لأورشليم. ¹³ فشالوا سعف النخل وطلعوا يستقبلوه هاتفين: <<أوصنّا! إتبارك الجاي بسم الرب! هو ملك اسرائيل!>> ¹⁴ ولكه يسوع جحش فركب عليه، مثل ما مكتوب: ¹⁵ <<لا تخافين يا بت صهيون، لأن الملك مالتج جاي إلج راكب على جحش أتان>>. ¹⁶ وما فهموا تلاميذ يسوع أول شي إنه هذا يكمل النبؤة. بس بعد أن إتمجد يسوع إتذكروا إنو الكتاب كال هذا عنه، وهمه سووا هذا علموده. ¹⁷ والناس إللي كانوا وياه من دعا لعازر من الكبر وكومه من بين الأموات، كانوا يشهدوله بهذا. ¹⁸ وعلمود هذا طلعوا الناس حتى يستقبلوه. لأنهم سمعوا إنه سوا ذيج المعجزة. ¹⁹ فكال الفريسيين واحدهم للثاني: << شفتوا شلون إنو ما راح تستفادون شي؟ هاي الناس كلهه راحوا وراه!>> ²⁰ وكان بين إللي أجوي لأورشليم للعبادة بالعيد قسم من اليونانيين، ²¹ فراحوا لفيلبس، وهو من بيت صيدا بمنطقة الجليل، وكالوله: <<يا سيد، نريد نشوف يسوع>>. ²² فإجه فيلبس وكال لأندراوس، وبعدين راحوا سوية وكالوا ليسوع. ²³ فكاللهم يسوع: << صارت قريبة ساعة تمجيد ابن الانسان. ²⁴ الصدك الصدك أكوللكم: إنو حبة الحنطة تبقه وحيدة إذا ما وكعت عل أرض وتموت. بس اذا ماتت، فراح تثمر حبوب هواية. ²⁵ إللي يتمسك بحياته، يخسرها. وإللي نبذها بهذا العالم يوفرها للحياة الأبدية. ²⁶ إللي راد يخدمني خل يجي وراية. وين ماراح أكون آني يكون خادمي همين. وكل من يخدمني يكّرمه أبوية. ²⁷ نفسي هسة قلقة، فشنو أكول؟ يا آب خلصني من الساعة الجاية عليّ؟ لا! علمود هاي الساعة إجيت. ²⁸ يا آب مجّد إسمك!>> وإذا صوت من السما يجاوب: << مجّدته وراح أمجده همين>>. ²⁹ فكال قسم من الموجودين إللي سمعوا الصوت: <<هذا صوت رعد!>> بس غيرهم كالوا: << حجى وياه ملاك>>. ³⁰ فجاوب يسوع: << ما كان هذا الصوت علمودي بس علمودكم. ³¹ هسة وكت الحكم على هذا العالم! هسة ينطرد سيد هذا العالم بره! ³² ومن أرتفع من الأرض أجذب يمي الكل>>. ³³ كال هذا يلمح للموته إللي راح يموتها. ³⁴ فكال قسم من الموجودين: <<علمتنه الشريعة إنو المسيح يبقى حي للأبد، فشلون تكول إنو ابن الأنسان لازم يتعلك؟ منو هو إبن الأنسان هذا؟>> ³⁵ فكاللهم يسوع: <<النور باقي وياكم وكت قصير. فكمّلوا مشيكم مادام النور دا يشرق عليكم، حتى لا يطبك عليكم الظلام، فإللي يمشي بالظلام ما يعرف وين يروح. ³⁶ آمنوا بالنور مادام النور وياكم، حتى تصيرون اولاد النور>>. وبعدما كال يسوع هذا، راح وإختفى عنهم. ³⁷ ومع إنو سوا كدامهم معجزات هواية كلش، ما آمنوا بيه، ³⁸ حتى يصير كول النبي إشعياء: <<يا رب منو آمن بكلامنه؟ ولمنو انكشفت إيد الرب؟>> ³⁹ فما كدروا يؤمنون، لأن إشعياء كال همين: ⁴⁰ << عمى عيونهم وقسّى قلوبهم، حتى ما يشوفون بعيونهم ويفهمون بقلوبهم، ويتوبون وأشفيهم>>. ⁴¹ وكال إشعياء هذا من شاف مجد الرب فحجى عنه. ⁴² ومع هذا فهواية من الرؤساء آمنوا بيسوع، من دون أن يعلنون إيمانهم لأنه يخافون أن ينحكم عليهم بالطرد من المجمع، ⁴³ يفضلون المجد الجاي من الناس على المجد الجاي من الله. ⁴⁴ فكال يسوع بصوت عالي: <<إللي يؤمن بيه، فهو يؤمن مو بيه آني بس وهمين باللي دزني، ⁴⁵ وإللي شافني، شاف إللي دزني ⁴⁶ إجيت للعالم نور، حتى ما يبقى بالظلمة كل من آمن بيه. ⁴⁷ وإذا سمع واحد كلامي وما آمن بيه، فآني ما أحكم عليه، لأنه جيت مو حتى أحكم عل العالم، بس علمود أخلص العالم. ⁴⁸ فاللي يرفضني وما يقبل كلامي، إله إللي يحكم عليه: لأنه الكلمة إللي كلتها هيه تحكم عليه باليوم الأخير؛ ⁴⁹ لأني ما دا أحجي بشي من عندي، بس أكول إللي وصاني بيه الآب إللي دزني ⁵⁰ وآني أعرف إنه وصيته هيه حياة أبدية: فإللي أكوله من كلام، أكوله مثل ما كاله إلي الآب>>.