¹ وإتمرض إنسان إسمه لعازر، وهو من بيت عنيا قرية مريم ومرثا أختهه. ² ومريم هاي هيه إللي دهنّت الرب بالعطر ومسحت رجليه بشعرها وكان لعازر المريض أخوها. ³ فدّزوا الأختين ليسوع يكولون: <<يا سيد إللي تحبه مريض>>. ⁴ فمن سمع بهذا كال: << ما راح ينتهي هذا المرض بالموت، بس راح يودي لتمجيد الله، لأنه بيه راح يتمجد ابن الله>>. ⁵ ومع إنه يسوع كان يحب مرثا وأختها ولعازر، ⁶ بس بقه وين ما كان مدة يومين ورا ماعرف بمرض لعازر. ⁷ وبعد هذا كال لتلاميذه: << خل نرجع لليهودية!>> ⁸ فكالوا التلاميذ: <<يا معلم، إتريد ترجع لليهودية، ومن وكت قريب رادوا اليهود يرجموك؟>> ⁹ فجاوب يسوع: <<مو ساعات الصبح اثنعش؟ فإللي يمشي بالنهار ما يعثر لأنه يشوف نور هذا العالم. ¹⁰ بس إللي يمشي بالليل فراح يتعثّر، لأن النور مو بيه>>. ¹¹ بعدين كال يسوع: << لعازر حبيبنه نام، بس آني راح أروح أكعده>>. ¹² فكالوا التلاميذ: <<يا سيد، إذا كان نام، فهو راح يكعد متعافي>>. ¹³ بس يسوع دا يقصد موت لعازر؛ بس التلاميذ عبالهم يقصد النوم. ¹⁴ إهنا كاللهم صراحة: <<لعازر مات. ¹⁵ وعلمودكم آني أفرح بأنه ماكنت إهناك، حتى تؤمنون. خلي نروحله!>> ¹⁶ فكال توما، المعروف بالتوأم، للتلاميذ الباقين: <<خلي نروح إحنه همين حتى ننكتل وياه>> ( يعني ويه يسوع). ¹⁷ ومن وصل يسوع لبيت عنيا كان لعازر إندفن من اربع ايام. ¹⁸ وكانت بيت عنيا ما تبعد عن أورشليم إلا حوالي خمستعش غلوة ( تلاث كيلومترات). ¹⁹ وكان هواية من اليهود إجوي لمرثا ومريم يعزوهم عن اخوهم. ²⁰ فمن عرفت مرثا إنه يسوع جاي طلعت دا تتلكاه، وبقت مريم كاعدة بالبيت. ²¹ وكالت مرثا ليسوع: << يا سيد، لو كنت إهنا، ما كان مات أخوية. ²² بس آني متأكدة بالتمام بأنه الله ينطيك كل إللي تطلبه منه>>. ²³ فجاوب يسوع: <<راح يكوم أخوج>>. ²⁴ كالت مرثا: << أعرف راح يكوم بالقيامة، باليوم الأخير!>> ²⁵ فرد يسوع: <<آني هو القيامة والحياة. إللي يآمن بيه، حتى لو مات راح يحيا. ²⁶ وأللي كان حي ويآمن بيه ما راح يموت للأبد. إتأمنين بهذا؟>> ²⁷ جاوبته: <<نعم يا سيد. آني آمنت إنه إنته المسيح إبن الله إللي إجه للعالم!>> ²⁸ كالت هذا، وراحت تصيح إختهه مريم، فكالتلها بالسر: << المعلّم إهنا، وهو يريدج!>> ²⁹ فمن سمعت مريم كامت وكفت، وبسرعة راحت ليسوع. ³⁰ وما كان بعده واصل للقرية، بس كان بالمكان إللي لاكته بيه مرثا. ³¹ فمن شافوهه اليهود، إللي كانوا وياها بالبيت يعزوها، تكوم واكفة وبسرعة طلعت، لحكوها، لأنهم ظنوا إنو رايحة تبجي يم القبر. ³² ومن وصلت مريم وين ما كان يسوع وشافته، حتى نزلت على رجله تكول: <<يا سيد، لو كنت إهنا ما كان مات أخوية!>> ³³ فمن شافهه يسوع تبجي ويبجون اليهود إللي إجوا وياها، فاض قلبه بالحزن القوي، ³⁴ وسأل: << وين دفنتوه؟>> فجاوبوه: <<تعال، ياسيد، وشوف!>> ³⁵ إهنا بجه يسوع. ³⁶ فكالوا اليهود بيناتهم: <<شوفوا شكد كان يحبه!>> ³⁷ وإتسألوا قسم منهم: <<ما كان يكدر هذا إللي فتح عيون الأعمى أن يبعد الموت عن لعازر؟>> ³⁸ فانملى قلب يسوع بالحزن القوي مرة ثانية. وبعدين اتقّرب للقبر، وكان كهف على بابه حجر جبير. ³⁹ وكال: << إرفعوا الحجر!>> فكالت مرثا: <<يا سيد، هذا يومه الرابع، وصار عفن>>. ⁴⁰ فكال يسوع: <<مو كلتلج: إذا آمنتي تشوفين مجد الله؟>> ⁴¹ فرفعوا الحجر، ورفع يسوع عيونه للسما وكال: <<يا آب، اشكرك لأنك سمعتلي، ⁴² وآني أعرف أنك دوم تسمعلي. بس آني كلت هذا علمود الجمع الواكفين داير ما دايري حتى يؤمنون إنك إنته دزيتني>>. ⁴³ وبعدين صاح بصوت عالي: <<لعازر إطلع!>> ⁴⁴ فطلع الميت والاكفان تشد ايديه ورجليه، والمنديل يلف راسه. فكال يسوع للي يمه: <<حلوه وخلي يروح!>> ⁴⁵ وآمن بيسوع هواية من اليهود إللي إجو يعزون مريم، من شافوه يسوي هيج. ⁴⁶ بس قسم منهم راحوا للفريسيين وكالوللهم باللي سواه يسوع. ⁴⁷ فسووا رؤساء الكهنة مجلس، وكالوا: <<شنو نسوي؟ هذا الرجل دا يسوي معجزات هواية. ⁴⁸ فإذا تركناه وعفناه راح يأمن بيه الكل، فيجون الرومانيين ويدمرون هيكلنا المقدس وشعبنه!>> ⁴⁹ فكال واحد منهم، وهو قيافا إللي كان رئيس للكهنة بذيج السنة: <<إنتوا ماتعرفون شي! ⁵⁰ شنو متفهمون إنه من الأحسن أن يموت رجل واحد فدى الأمة، بدال ما تهلك الأمة كلهه>>. ⁵¹ وما كال قيافا هذا الكلام من عنده، بس لأنه كان رئيس للكهنة بذيج السنة إتنبأ إنه يسوع راح يموت فدى الأمة، ⁵² ومو بس فدى الأمة، بس همين علمود يجمع أولاد الله الضايعين ويخليهم واحد. ⁵³ من ذاك اليوم قرروا اليهود يكتلون يسوع. ⁵⁴ ما رجع بعد يتجول بينهم بالعلن، بس راح لمدينة إسمها إفرايم، إتصير بمكان قريب من البرية، بقى إهناك وية تلاميذه. ⁵⁵ وكان عيد الفصح اليهودي صار قريب، فإجوي هواية من القرى لأورشليم حتى يسوون طقوس التطّهر إللي تسبق العيد. ⁵⁶ وكانوا يدورون على يسوع، ويتسألون وهمه مجتمعين بالهيكل: <<شنو رأيكم؟ قابل ما يجي للعيد؟>> ⁵⁷ وكان رؤساء الكهنة والفريسيين إنطوا أمر بانه كل من يلكه يسوع لازم يبلغ عنه علمود يلزموه.