¹ الصدك الصدك أكوللكم: إنه إللي يدخل لحظيرة الخرفان مو من بابها فراح يتسلق إلها من غير طريق، وهو حرامي وبواك. ² بس إللي يدخل من الباب فهذا هو راعي الخرفان، ³ والبواب يفتحله، والخرفان تسمع صوته، فينادي خرفانه الخاصة كل واحد باسمه، ويقودها لخارج الحظيرة. ⁴ ومن يطلعها كلها، يمشي كدامهه وهيه وراه، لأنه تعرف صوته. ⁵ وهيه ما تمشي ورا غريب، بس تهرب منه، لأنه تعرف صوت الغرباء>>. ⁶ ضربلهم يسوع هذا المثل، بس ما إفتهموا معنى كلامه. ⁷ علمود هذا رجع وكال: << الصدك الصدك أكوللكم: آني باب الخرفان. ⁸ كل إللي إجوي قبلي كنوا حرامية وبواكين، بس الخراف ما تسمعلهم. ⁹ آني الباب. إللي دخل بيه يخلص، فيدخل ويطلع ويلكه المرعى. ¹⁰ الحرامي ما يجي غير بس علمود يبوك ويذبح ويهلك. بس آني إجيت علمود إتكون إلهم حياة، وحياة مليانة! ¹¹ آني الراعي الصالح، والراعي الصالح يضحي بحياته علمود خرفانه. ¹² والأجير مو مثل الراعي، لأن الخرفان مو ملكه. فمن يشوف الذيب جاي، يترك الخرفان حتى يخلّص نفسه، فياخذ الذيب الخرفان ويفرقها. ¹³ هو يهرب لأنه أجير وما يدير باله عل خرفان! ¹⁴ بس آني هو الراعي الصالح، وأعرف خرفاني، وخرفاني تعرفني، ¹⁵ مثل ما يعرفني الآب وآني أعرفه. وآني أضحي بحياتي علمود خرفاني. ¹⁶ وعندي خرفان ما تنتمي لهاي الحظيرة، لازم اجمعها يمي همين، وتسمع لصوتي؛ فيكون إهناك قطيع واحد وراعي واحد. ¹⁷ الآب يحبني لأني أضحي بحياتي علمود أستردّها. ¹⁸ محد ياخذ حياتي مني، بس آني اضحي بيهه باختياري. عندي سلطة أن اضحي بيهه وعندي سلطة أن استردّها. هاي الوصية أخذتها من أبوية>>. ¹⁹ فانقسموا اليهود بالرأي علمود هذا الكلام. ²⁰ فكال هواية منهم: << شيطان يسكن بيه، وهو مو بوعيه، ليش تسمعوله؟>> ²¹ وغيرهم كالوا: هذا مو كلام من واحد يسكن بيه شيطان. قابل يكدر الشيطان يفتح عيون العميان؟>> ²² وخلال الاحتفال بعيد تجديد الهيكل، بالشتا، ²³ كان يسوع يتمشى بالهيكل بقاعة سليمان. ²⁴ إتجمعوا اليهود عليه وكالوله: <<إلى متى تبقينه حايرين بيك؟ اذا كنت إنته المسيح صدك، كوللنه بصراحة>>. ²⁵ فجاوبهم يسوع: <<كلتلكم، بس إنتوا ما تصدكون. والأعمال إللي أسويها بسم أبويه، هيه تشهدلي. ²⁶ بس إنتوا ما تصدكون لأنكم مو خرفاني. ²⁷ خرفاني تسمع لصوتي، وآني أعرفهه وهي تتبعني، ²⁸ وأنطيهه حياة أبدية، فما تهلك للأبد، ومحد ياخذها من إيدي. ²⁹ الآب إللي إنطاني ياها هو أعظم من الكل، ومحد يكدر ياخذ من إيد الآب شي. ³⁰ آني والآب واحد!>> ³¹ فرفعوا اليهود، مرة ثانية، حجارة حتى يرجموه. ³² فكاللهم يسوع: <<شوفّتكم اعمال زينة هواية من يم أبوية، علمود يا عمل منهه ترجموني؟>> ³³ جاوبوه: <<ما دا نرجمك علمود أي عمل زين، بس علمود كفرك: لأنك دا تسوي نفسك الله، وإنته إنسان!>> ³⁴ فكاللهم يسوع: << مو مكتوب بشريعتكم: آني كلت إنكم الهة؟ ³⁵ فإذا كانت الشريعة تسمي ذولاك إللي نزلت إلهم كلمة الله آلهة والكتاب لايمكن أن ينقض ³⁶ فشنو تكولون للي قدسه لآب ودزه للعالم: إنته تكفر، لأني كلت: آني إبن الله؟ ³⁷ إذا كنت ما أسوي أعمال أبوية، فلا تصدكوني. ³⁸ بس إذا كنت أسوي هذا الشي. فصدكوا الأعمال، إذا كنتوا ما تصدكوني آني. إهنا راح تعرفون ويتأكد إلكم إنه الآب بيه وآني بيه>>. ³⁹ فارادوا مرة ثانية أن يلزموه، بس هو فلت من إيدهم، ⁴⁰ ورجع للجهة المقابلة من نهر الأردن، وين كان يوحنا يعّمد قبل، وبقه هناك. ⁴¹ فإجوله هواية وهمه يكولون: << ما سوه يوحنا ولا معجزة وحدة، بس كل إللي كاله عن هذا الرجل كان صدك!>> ⁴² وآمن بيه هواية إهناك.