¹ ومن كان يسوع ماشي، شاف رجل أعمى من إنولد، ² فسألوه تلاميذه: <<يامعلم، منو غلط: هذا لو والديه، حتى ينولد أعمى؟>> ³ فجاوبهم يسوع: <<لاهو غلط ولا والديه، بس علمود تبين بيه أعمال الله. ⁴ فلازم أسوي أعمال إللي دزني مادام الوكت صبح. لأن راح يجي الليل، ومحد يكدر يشتغل بيه. ⁵ ومادام آني بالعالم، فآني نور العالم>>. ⁶ كال هذا، وتفل بالتراب، وسوه من التفال طين وبعدين خلاه على عيون الأعمى، ⁷ وكاله: <<روح غسّل إبركة سلوام>>، يعني المرسل، فراح وغسّل ورجع يشوف. ⁸ إتساءل الجيران واللي كانوا يشوفوه من كبل يجّدي: <<مو هذا هو نفسه إللي كان يكعد علمود يجّدي؟>> ⁹ كال قسم منهم: <<هو هذا>>. وغيرهم: <<لا، بس يشبهه!>> بس هو جاوب وكال: <<بلي هو آني!>> ¹⁰ فكالوله: <<شلون انفتحت عيونك؟>> ¹¹ جاوب: <<الرجل إللي إسمه يسوع سوه طين ودّهن بيه عيوني، وكالي: روح لبركة سلوام وغسّل بيهه. فرحت وغسّلت وصرت أشوف!>> ¹² فسألوه: <<وهسة هو وينه؟>> فكال: <<ما أعرف!>> ¹³ فراحوا بالرجّل إللي كان أعمى يم الفريسيين. ¹⁴ وكان اليوم إللي سوه بيه يسوع الطين وفتح عيون الأعمى، يوم سبت. ¹⁵ فسألوه الفريسيين همين شلون شفت فجاوب: <<خله طين على عيني، وغسّلت، وهذا آني دا أشوف!>> ¹⁶ فكال قسم من الفريسيين: << ما ممكن ان يكون هذا الرجل من الله، لأنه يخالف سنّة السبت>>. بس قسم منهم كالوا: << شلون يكدر رجل خاطي يسوي مثل هاي المعجزات؟>> فوكع الخلاف بينهم. ¹⁷ ورجعوا يسألون إللي كان أعمى: << وشنو رأيك إنته بيه مادام فتح عيونك؟>> فجاوبهم: <<هذا نبيّ!>> ¹⁸ ورفضوا اليهود يصدكون إنو كان أعمى وشاف، فجابوا ابوه وامه ¹⁹ وسألوهم: <<هذا ابنكم المولود أعمى مثل ما تكولون؟ شلون دا يشوف هسة؟>> ²⁰ جاوبهم الأبوين: <<نعرف إنه هذا ابنّه وانولد أعمى. ²¹ بس ما نعرف شلون دا يشوف هسة، ولا منو فتح عيونه. هو عمره ناضج، يجاوبكم عن نفسه، إسألوه!>> ²² وأبوه وأمه كالوا هيج لأنه يخافون من اليهود، لأن اليهود كانوا إتفقوا أن يطردون من المجمع كل واحد يعترف أنه يسوع هو المسيح. ²³ علمود هذا كالوا: <<هو ناضج بالعمر إسألوه>>. ²⁴ وجابوا الفريسيين، الرجل إللي كان أعمى مرة ثانية، وكالوله: <<مجّد الله! إحنه نعرف إنه هذا الرجل خاطي>>. ²⁵ فجاوب: <<خاطي هو، ما أعرف! بس أعرف شي واحد: أنه آني كنت أعمى وهسة دا أشوف!>> ²⁶ فسألوه مرة ثانية: <<شنو سوالك؟ شلون فتح عيونك؟>> ²⁷ جاوبهم: <<كلتلكم وما سمعتولي، فليش تريدون تسمعون مرة ثانية؟ شنو تريدون إنتوا همين تصيرون تلاميذ إله؟>> ²⁸ غلطوا عليه وكالوله: <<إنته تلميذه! بس إحنه تلاميذ موسى. ²⁹ إحنه نعرف إنو موسى حجى وياه الله؛ بس هذا، منعرف أصله من وين!>> ³⁰ فجاوبهم الرجل: << هذا بيه العجب! هو فتح عيوني، وتكولون إنه متعرفوله أصل! ³¹ إحنه نعرف إنه الله ما يستجيب للخاطئين، بس يسمع للي يتقيه ويسوي ارادته. ³² ومحد سمع على مدى أجيال إنو واحد فتح عيون مولود أعمى! ³³ فلو ما كان هو من الله، ما كان كدر يسوي شي>>. ³⁴ فصاحوا بيه: <<إنته كلّك إنولدت بالخطية وتعلّمنه!>> بعدين طردوه بره المجمع. ³⁵ وعرف يسوع طردوه بره، فراحله وسأله: <<إتأمن بابن الله؟>> ³⁶ جاوب: << هو منو يا سيد حتى أؤمن بيه؟>> ³⁷ فكاله يسوع: <<إللي شفته، وإللي يحاجيك، هو نفسه!>> ³⁸ فكال: <<أؤمن يا سيد!>> وسجدله. ³⁹ فكال يسوع:<< للحكم إجيت لهذا العالم: حتى يشوف العميان، ويعمى إللي يشوفون!>> ⁴⁰ فسمعوا قسم من الفريسيين إللي كانوا وياه فسألوه:<< ليش إحنة همين عميان؟>> ⁴¹ فجاوبهم يسوع:<< لو كنتوا بالفعل عميان، ما كان أكو عليكم خطية. بس انتوا تكولون إحنه نشوف، علمود هذا خطيتكم باقية>>.