¹ Yaganaucin, kwasgabiko (iyu naa rama naa ndawa waarra zəga naa linok), ma linok naa garva ii ɗak nən fatawanke ii kunu mbasu gəri? ² Atəro ama zəba da vaika naa sharya məsək gara aci na aro gəri nən, amman məsək gu mətən gəri nən atu naa sharya zəba gəri aa ɗa gara wambai. ³ Gaɗa sən, məsək gu naa aro gəri nən, atu mbasu na ɗagai nən, dlaɓən gara mii tapai. Amman məsək gu mətən gəri nən, atu na sharya zəba ii aɗa gara bai, gaɗa kasən atu mii tapai bai mbasu na ɗagai nən. ⁴ Gaɗa kasən, yaganaucin ga, kun cam nda dlamu naa kun gamtak na dumaya ii kunu təka Masihu. Nda dlamu kasau gaaɗa wa dlaɓi be gayi, ii kunu nən wara tlau da kunu ndaawa gamtak, gaɗa wa dlamu be waarra naa ampa ii Səku. ⁵ Laktu wa kunu təka tən, mbasawa kə mangarrta bik aipu, waarra aa niidu nən dumaya, waarra aa wana ii gadava wa waarra aa ɗi kutlai ii mətu. ⁶ Amman gusku kasau wa katu nawa darik sharya, Wa mətu nawa ii kunu be waarra jibu nawa. Sutku kasən gaɗa wa dlamu mbasu ii kunu karara nənuwa Səku, amman ii kunu gamana be waarra nda tarnu bai. ⁷ Wate waa ram gəmo? Sharrya naa aɗa gara aipu bi? Ngalte aa dlama bai. Dək na kasən, gaɗa sharrya biinən, daa na zəga aipu bai. Gaɗa sharrya da rama ma "Kwa dlama kalɓe bai." biinən da na zəga kalɓe bai. ⁸ Amman aipu ba duvu darik linok, dani na mangarrta waarra aa kunu ga. Atərro gaɗa sharrya biinən, daa aipu rro gamtak. ⁹ Waaci iyu naa arro amman na sharrya bai, amman nda dena linok tənu, se aipu da dlɓən gara na arro, se iyu ke namcinga. ¹⁰ Linok waarra kamatu ii ri ga danna arro, se da məscin gara ii mətu. ¹¹ Atərro aipu bana kaada dari linok da gəzaci na iyu. Dari linok atu da təkə na iyu. ¹² Wate sharrya na aipu bai, linok ke na aipu bai, jiirewa ke naa bəlan ke. ¹³ To be bəlan dlamən gara mətu kenan ii iyu? Ngalte aa dlama bai. Amman aipu waarra nda tatkə atu aipu darik be wara bəlan, se danna mətu ii aɗa ga. Sutku dlamən gara kasən gaɗa ɗarik linok, aipu da dlamən gara bik aipu tlaparr. 14 Atərro wa zəgadu sharrya gu kə Nənuwa Səku, amma iyu naa kunu təka. Nda ɗəɓdu naa iyu guzɓəkwina ii aipu. ¹⁵ Atərro be waarra naa dlamau, na saanutu bai ko rrap. Be waarra nancu dlamau na dlama gara bai, be waarra na nguptu ke na dlama gara. ¹⁶ Amman na dlamu be waarra nancu bii nən, na kasaktən ga na sharrya iiɗa sharrya bəlan. ¹⁷ Amman gusku kasau na dlamo nən iyu wambai, amman aipu waarra da mbasu a kunu ga. ¹⁸ Atərro na zəgadu go be bəlan da mbasu a kunu ga, wato ii kunu təka ga. Iyu naa ntu be bəlan ii kunu ga, amman na dəmu dlamo bai. ¹⁹ Be bəlan waarra nancu na dlami, naa dlamo bai, amman be gaɓshu waarra nancu dlamo bai, na dlama gara. ²⁰ Gusku kasau be waarra nancu dlamo bai naa dlamo nən, to naa dlamo nən iyu naa aɗa ga wambai, amman aipu waarra aa kunu ga. ²¹ Se naiki, kaane dlaɓen gara kasasau naa iyu, nancu dlama be waarra kalkal, amman se naiki be gaɓshu ii kunu ga. ²² Iyu kam, ii kunu gəshi ga naa pərɗai naa linok Səku. ²³ Amman naa lawan be daama ii kurarin təka ga. A tləri na be karara waarra aa kunu gəshi ga. harr kata naa iyu guzuɓ ii bik aipu waarra aa kunu kurarin təka ga. ²⁴ Na dlamən ga bii alaki! Aa laata ga nən tai da kunu təka waarra aaya naa iyu ii kunu mətu? ²⁵ Amman naa sambarkata Səku dari Yeso Masipu Məgənyawa! kasən ke, Iyu naa aɗaga naa dumaya linok Səku ii kunu gəshi ga. Amman, naa təka ga nən naa linok naa bik aipu.