¹ Yeso da təfi kun sawu aam, da nai i marem dageri. ² Se so, nda deu dici nən baci ranu da səna a ɗak buci. Yeso ika imanshi tənu,se da rami baci ranu ma, "Wən, a dlam pərrɗai. Nda tuptu dici aipapinci" ³ Se ndak taran jəgab da dlam ramma i gatukshi ma, "Nənangu a saɓo rro." ⁴ Yeso kuwa zəga na bee mi a gəhakhii tənu, se da ramma , "Gaɗa gəmo kwa kurrarram kəlado i gəshakun?" ⁵ Tawan ɗəkadi 'yale, 'Nda tuptu dici aipapinci rra, ko nda ramma, atlu ka dlam rakan'? ⁶ Amman gaɗa kwa zəgi ma wən gənən na kərrmai kə tupta aipapin i duniya,... " aci rami babu ranu, "Atlu , ka mi bucaci, kayi naci wənduwaci." ⁷ Se wařau da tli da yingəri wənduwagəri. ⁸ Algu ikau sau tənu, da dlam ajap, da sakəřci Kakasəku, wařa baru kəřmai kasau i ndawa. ⁹ Yeso ta kəma a nuta tin, se daiki nən dagai baci dlugun matiyu, da mbasu a ri gənyi ařajo. Dan da ramici ma, "A ɗəga yu."Aci da tli da dəgi na aci. ¹⁰ Lakwtu mi Yeso da mbasu a taa masana i wənduwa tənu, se so ndak gənyi arrajo gawa na ndak aipu danai, a ta masana na Yeso na pukurraucingəri. V 11 Parrisaucin ika kasau tənu, se da rami pukurraucingəru ma, "Gaɗa gəmo maləm kun gu, a tau i ɗa gayi na ndak genyi arrajo na ndak aipu ¹² Yeso kəma kasau tənu, da ramma, "Ai ndawa mi na kəlappiya, a merradi ləkəta bai, se ndak fera rukshi. ¹³ Ada dəgo kwa sanuci, ma'ana sutku gu nin tam, 'Iyu na ndəlam kanjəno, sanaam bai.' Iyu rro, na deu i daura ndak adalta da dlam tubi bai, amman ndak aipapin. ¹⁴ Se pukurraucin Yahai da nai i rigəri da ramma, "Gaɗa gəmo ja, na parrisaucin ja dlam ashaam aɗau-aɗau, amman pukurraucin ci a dlama ashaam bai ? V 15 Yeso da ramikshi ma, "Nda guzapəna i lakwtu zəba a dlam gəshi aiwa bi, lakwtu mi ango gu aɗa gayi na akshi, gusku yaye nin? Amman yiwan aye ni, lakwtu mi ndaa mana ango gu da rikshi, i lakwtu ne akshi a dlama ashaam. ¹⁶ Go nən mi a dlam paci karara bakta i təka gamana kacum, gaɗa paci gu a tləmpiyangara da təka kacum gu, to tləmpiyau a ɗəki na kə waci i gabshu. ¹⁷ Ndawa ke a pi karara aam inabi i kun gamana janjamiyayin bai. Akshi dlami kasən nin, janjamiyayingu a dladu nakshi, aam inabi gu a yayingara,se janjamiyayingu da kambeci nakshi. Da miya kasən, aksha pi karara aam inabi i kun karara janjamiyayin, to makshi a səkwakuya nakshi." ¹⁸ Lakwtu mi Yeso a kun dlamekshi rama, se so, nən gazgara ɗakai danai, da nai da dlamici nakwana. da ramma, "Wənya ga mutu gususku jab, amman ayen, kam pi amici, i adagara, a tlayingara." ¹⁹ Se Yeso da tli da ɗəga ci, na pukurraucingəri ke. ²⁰ Se so, ama ɗagai ke, mi dədəm a payi da təka gara tlaparr harr kə aman guma ayawau shirin, da nai da akau Yeso da lenci dəɗa/miya kacumgəri/miya arimama gəri. ²¹ Gaɗa ramdu i gəshigara ma, "Na ləntu bakta gəri jaɓ nin, na ngatan ga" ²² Yeso da məsci dai katu, da ramma, "Wənya, a dauzaci aɗa kum. iman kəm ngatu na kəm" Se amau da ngacingara i miyakda. ²³ Yeso təfeu i wənduwa nən gazgarau tənu, se daiki , so ndak fiya shila, na algagin a təka rurau. ²⁴ Yeso da ramma, "A barina rai, atərro wənyau mutu bai, amman a yuwan." Se ndau da dlami ci gamas muwa. ²⁵ Nda ji na algu i veda, aci da təfi səsugu, da jebi amigara da sukci, se wənyau da tli. ²⁶ Labarr biwu da vaikəngara i rawanke i larrdu. ²⁷ Yeso a nute kəma da riwu tənu, se dluguyaucin dagai shirin da ɗəga ci. A sukta wurakshi, a ramau ma, "A kəmi kanjino ja, wən Dauda!" V 28 Yeso təfengəri wenduwau tenu, dluguyayin gu da nai i rigəri. Yeso da ramikshi ma, "Kwa bari na jirrewa bi, iyu na kerrmai dlama kasənu?" Akshi da rami ci ma, "Auwo, Megenyi." ²⁹ Se Yeso da lənci dakshu da ramma, "Da dlabe kun kalkal iman kun." ³⁰ Se dakshu da rəpci nakshi. Se Yeso da dlamikshi gabaɗ, da ramma, "Na nen da zəga bitku bi pa." ³¹ Amman, ndo shiringu da bazaci na labarr bitku gu, i rawanke i larrdu. ³² Lakwtu mi dliguyayin shiringu aya nakshi tənu, se so nda de na bebe ɗagai i ri Yeso. ³³ Nda dau na zuwak gu tenu, se bebegu da da dlam rama. Algi gu da japci biyu da ramma, "Kai, ngalte nda ika zada bitku bai, i Isrraila." ³⁴ Amman se parrisaucin a ramau ma, "Ai na kərrmai kə dəgəm zuwawin ne, aca di zuwawingu." ³⁵ Yeso da vaiki ɗa marəmamin na ɗa-ɗa kə patatin. Aci da ci kəma na gugzau; i kun ləmamin ri cacpa yahudaucin, a wazək labarr herr kə garva Səku, a ngata zadak dagas tawanke, na fəra mak. ³⁶ Aci ikau algagingu tənu, se kanjənok shi da jəb na aci, gaɗa akshi a kun rəwawaɗ, na gafaka. Akshi ka tumamkin; mi go baci dawa. ³⁷ Yeso da rami pukurraucingəri, "Karam gu gawa , amman lebərraucingu rab ɗagai. ³⁸ Gaɗa kasən, kaɗe-kaɗe a dlamina magita i Megenyi karamgu, gaɗa da wane lebərraucin i ri karamgəri.