¹ Se ndak majalis kə yahudaucingu mak datli, dayi na Yeso i kəma Bilatus. ² Akshu da ɓanji zankam i Yesogu, a rammau ma, "Ja beu nənagu a shikshikta ndawa. A ramekshi ma da nguma arrajo bai, zam a təka ramau ma aci gu Masihu, dəgəm." ³ Bilatus da jayaci da ramma, "Cine dəgəm Yahudaucin ?" Yeso da ngumici ma, "Ka ramu kasənu." ⁴ Se Bilatus da rami marmamin pərrisaucin na algu ma, "Iyu rro na bau ko bike iri nənangu bai." ⁵ Amman akshi da jəb tatkau na awayau, ma, "Acu a shikshikta ndawa, a gugza i rawanke i larrdi Yahudiya, Ɓandeu da Galili, harr so dengəri ritku." ⁶ Bilatus kəma kasən tənu, se da jayi ma, "Warrau nən Galili bi?" ⁷ Acu kəma ma Yeso a dəɗa kərrmai Hirridus tənu, se da dabi na aci ri Hirridus, Lakwtu ke Hirridus a kun Urrushalima. ^{9 8} Hirridus ika Yeso tənu, se da dlam pərrɗai rrankata, acu maku daikaci tin kaɗe. Gaɗa acu kema labarrgəri, ke aci təka tuman launa bik ajap da rigəri. ⁹ Hirridus da dlami jaya i Yeso i kun təlalmin gawa, amman Yeso wurici bee waammbai. ¹⁰ Marəmamin pərrisaucin na malamcin dumaya mi darr'yi a riwu danai i kəma, a dlama zankam i Yeso i ɗa bee gawa. ¹¹ Hirridus na askarbaucingri da jəb nanga gəri, da dlamici muwa, da ɗawici karre dəgəm, a ngarrəmtagəri, da kaci na aci i ri Bilatus. ¹² Hirridus na Bilatus da dlaɓinakshi mangaucin gafogu. Waci kuwa akshi a gaba i gatukshi. ¹³ Bilatus da cacpe marmamin pərrisaucin na nda garva na algi ndawa, ¹⁴ da ramikshi ma "Kwa deu danai nənangu ma, 'A shikshikta ndawa i ɓədamu.' Sotai na jayaci i kəma kun, amman warrangu na bikekin warra kwa təka ramau ma acu dlamu bai. ¹⁵ Ko Hirridu ngum a tuma da acu acu na bike bai, gaɗa sənu, kate diwa aci. Nənangu go be mi dlamu warra bata na mutu. ¹⁶ Gaɗa kasənu, na dlameci lakodi na ta'yi na aci" ¹⁷ [Daaman i lakwtu Ngəmurri paska tawanke, Bilatus a ta'yi nən gayi da dəlo.] ¹⁸ Amman makshi da dlam kurwa, a ramau ma, "Aamina na warrangu nda təkədu, nda tayi ja Barrabas!" ¹⁹ Barrabas gu nən mi a kun dəlo, dlamu bike ɗagai kə tlatli ankal ndawa, harr təkə nən. ²⁰ Bilatus ancu da tayi na Yeso, se da dlamikshi rama wam. ²¹ Amman akshu da jəb kurwa, a ramau ma, "Nda dləga na aci! Nda dləga na aci!" ²² Bilatus da dlamikshi rama zəgər kə makwan ma, "Gaɗa gəmo? Aipu tawan nənangu dlamu? Iyu dai nabaci na bee ɗagai warra bata wuda shariya mutu bai. Na ɗawau nda dlamici lakodi, na ta'yi na aci." ²³ Amman akshi da jəb jəktagəri na kurwa, a makau ma se nda dləgi na Yeso. Se kurwakshu da nzəmi na Bilatus. ²⁴ Se Bilatus da dlamdikshi bee akshi ancu. ²⁵ Aci da taɗe dikshi nən mi akshi maku da taɗaigu, warra a dəlo gaɗa bike tlatli ankal ndawa na tək gənən. Amman da baridikshi Yeso gaɗa bee warra akshi ancu. ²⁶ Askarrabaucin mau yeso da ri Bilatus tənu, se akshi da jəbi ɗagai baci dləgun Simon kə Bakurane, warra a təka ni da ɗa pata, se da mpici dəm dləga i aɗa gəri, nda ɗawaci da ɗəgi aku Yeso. ²⁷ Algi ndawa gawa ke da jəb ɗəgakshi, harr na amatau warra gəshakshi ga-dləmatak, a təka aɗan Yeso. ²⁸ Amman Yesogu da məstai i rikshi, da ramma, "Amatin Urrushalima, kwa dlama aɗan gaɗaga bai, a dlamina gaɗa aɗakun na kutlatlkin kun. ²⁹ Aikina, lakwtu aye ni, mi ndawa aye ramau ma, 'Barrka i amatin duguraucin , na bazhi mi ngalte yawu bai, na anyi mi ngalte tliɗu bai' ³⁰ I lakwtu ne, akshi aye rame guguyayin ma, 'A vəgine aɗa ja!' Da rami zəgawawin ke ma, 'A cimina na ja!' ³¹ To. akshi dlamu bayangu sartu mi waka gatla nin, tam a wakata sarrtu mi wakau gauɗak?" ³² Askarrabaucingu dayi na Yeso na ndak bike shirin, gaɗa nda təki na akshi. ³³ Akshi zadeu i ri mi nda ɗaurau, "Kwankwayak" tənu, se akshi da dləgi na aci na nnda bikegu. Nən gayi da baka mata gəri, gayi ke da madlawai gəri. ³⁴ Yeso da ramma, " Baaba, a təptidikshi, gaɗa akshi zəga bee mi aksha dlamau bai. " Se askarrabaucingu da dlam baama, i ɓəra kacumamin gəri. ³⁵ Ndau darr yi a launa bee warra a wakata, nda garva ngum da jəb dlameci muwa, a ramau ma, "Aca ra ndawa, to da ra aɗagəri ba, aci Masihu kə Kakasəkugu nin." ³⁶ Askarrabaucingu ca da dlamici muwa. Da ɗəvarici am i inabi warra zhomungara tlaparr, ³⁷ a ramau ma, "Ci dəgəm Yahudaucin nin, ari aɗaci ba." ³⁸ Nda dlam tarran ɗagai i dəsku aɗagəri ma, "Stku dəgəm yahudauci." ³⁹ Gayi da kun ndak bike warra nda dləgakshi ɗagayi na acu da dlamici muwa, a ramau ma, "Biwu, ci Masihu bi ko? To ari aɗaci ba, ka ri ja ke." ⁴⁰ Amman nən gayu da gərrnyi aɗagəri, da ramma, "Ci ka kalu Səku bi ko, Ci warra nda hagatu ci kal kal na aci? ⁴¹ Wa rro nda hagatuwa kal kal na bikewa, amman nənangu go bike, ko rrab." ⁴² Se da ramma, "Yeso a tanayu, ka deu i kun garvaci nin!" ⁴³ Yeso da ngumici ma, "Jirre na rameci, katanas gusku ka dlaɓa na iyu i kun janna." ⁴⁴ I adliyadliya, se ɗagu da dlaməngara ayuwa pələk harr miya aduwau, ⁴⁵ afa dlaməngara ayuwa tənu, se ɓabərəm kə kun Wənduwa Səku da tləmpiyingara da dəsku harr dəɗa da gadava. ⁴⁶ Yeso da sukci wuragəri na awayau da ramma, "Baaba, na baru na arroga i amici." Ramu kasu tənu, damcingəri. ⁴⁷ Marəm askarrabu ika bee warra wakatu tənu, se da səkarrci Səku da ramma, "Pakat, nənangu baci adalta." ⁴⁸ Algagin mi deu i riwu gaɗa saida riwu, ika bee mi nda dlamu tənu, da kacinakshi wənduwa, akkəma adlakshi i kun dləmatu gəshi. ⁴⁹ Amman ndiwa mi zəga na Yeso mak, harr na amatin mi ɗəge aci da larrdi Galili, da rrə'yinakshi pəɗəm, a lawan bee wakatu. ⁵⁰ Na nən ɗagai baci dləgun Isubu,, gayi da kun marəmamin majalis Yahudaucin, baci adalta na kunu gayi, ⁵¹ (Aci kuru na kwapta i ɗa na bee mi akshi dlamu). Aci nən ɗa Arrimatiya kə kun larrdi Yahudiya. Acu kuwa a kun dəri ni garva Səku. ⁵² Isubugu dayi ri Bilatus, da jayi guvu Yeso. ⁵³ Se da wurtedi ɗa, da yayiɗidu i kun bakta lilin, da ɗawudi kun auɗu, mi nda bədlu i kun guguyak, warra ngalte nda dabgu nən i kunu bai. ⁵⁴ Gafogu, gazarrab nda ɓanji na gafa putu. ⁵⁵ Amatin warra ɗəge Yeso da larrdi Galili tənu, da ɗəgi Isubu, gaɗa akshi daiki ri auɗugu, na zada dabak mi nda dlami guvu Yeso gu. ⁵⁶ Se amatingu da kacinakshi wənduwa, da dlam sapərra mərak zuwa, na atərrshan. Se gafa putu gu, akshi da ji mafiya, kakə mi dumaya ramu.