¹ Pǝɗǝk-Pǝɗǝk gafak sukur kǝ magi, akshi da nai i ri auɗu akshi dan na kare aci fan karak mi akshi sapartu. ² Akshi da tasai na jǝmbuluna guguyak gu da miya auɗu. ³ Akshi da tǝfi l kunu, amman akshi ba tǝka Mǝgǝnyi Yeso bai. ⁴ Wakatu kasin, sartu mi akshi ga tlayak aɗa sǝnun, go tatsǝna nǝn shirin dar'i i kǝmakshi na kare mi a wiɗa. ⁵ Sartu mi amatau gu gutkina aɗakshi gaɗa kalau akshi da rami ma, "Gaɗa gǝmo kwa maka baci aro i kunu gamtatin? ⁶ A ri tuku bai amman tlangǝri! A tani na na rama wara rami kun sartu wara aci a kunu Galili, ⁷ maya nda barna Wǝngǝnǝn ndawa mi na aipu. Akshi da dligǝ na aci; aku yuwan kwan a tlayingǝri." ⁸ Se amatau gu da tanyi na tǝlam gǝri, ⁹ akshi da kacinakshi da ri auɗu akshi da rami i guma ayawa na ndawau Jǝgab bayangu mak. ¹⁰ Atu Maryamu Magadaliya Yagana Maryamu mi Yakubu na gagzhin amatau wara a ɗa gayi na akshi akshi da bar labar be wakatu i mawanaucingu. ¹¹ Amman mawanaucingu dami na ramau i ɗak be wambai, kuru akshi da kurna bar Jirewa i amatugu. ¹² Duk na kasǝn Bitirus da tlii se da rawi i ri auɗu, da gutki dai ki kunu, sai aci daki likafanu rugara. Da sǝn aci dayingǝri i wǝndugǝri aci a jabta be wara wakatu. ¹³ I gafau se so shirin da kunakshi a rakan i nye kauye mi nda ɗaurau ma imawus mi gadava gara na Urshalima ka mel kwan. ¹⁴ Akshi a rama gatukshi i ɗak be wara wakatu. ¹⁵ Sarta wara akshi a rama a jaya aɗau tunu, se Yeso na aɗa gǝri da dabe i dantau na akshi da jǝb rakan i ɗa gayi na akshi. ¹⁶ Amma dukshi dǝma rǝpta daa da yakinci ma aci bai. ¹⁷ Yeso da ramikshi ma, "Bi wu kun shirin kwa rama a ɗa gǝmo sartu mi kwa rakan?" Akshi darɗi i riwu gǝshak shi ga dlimatak. ¹⁸ Gayi da kunakshi, babu dlǝgun Kiliyobas da ngumi ci, "Ci ruci bi nǝn wara a kunu Urushalima, mi zǝga be wara wakatu bai i ri tǝnu i kunu yuwanangu?" ¹⁹ Yeso da ramikshi ma, "Biwu tawan?" Akshi da ngumici ma Be a ɗak Yeso kǝ nazarat, mi aci nabi, baci marmamin wana na tǝlam da ri sǝku na ndawa, ²⁰ na yadda marǝmamin priestaucin na ndak garva akshi barna aci gaɗa nda hagaci na aci i mutu zam nda dligǝ na aci. ²¹ Amman akshi dlam tumangu ma aci ne a ye dligdǝ kutli Israila. I, aku na sǝn zam gususku yuwan kwan na be wara wakatu. ²² Zama gusku yaye, amatin mi aɗa gayi na ja dlami ja bik ajab, lakwtu akshi ji ri auɗu tǝn pǝɗǝk. ²³ Akshi i ka tǝka gǝri bi tunu akshi da nai, a ramaw ma akshi ye ika wahayi da ri malekaucin mi akshi ramikshi ma aci na aro. ²⁴ Gamsaɗin jǝgab da kunu dayi ri auɗu, akshi da tashi ka ki wara amatugu ramu. Amman akshi i ka ci bai. ²⁵ Yeso da ramikshi ma, "Kun kakaɓawaɗ na ndak kur bar jirewa na be nabaucin ramu! ²⁶ Dlamǝngara katanas bai ma, Masihu da shi bone bayangu mak, zam aci da tǝfin geri i kunu saksakta gǝrí?" ²⁷ Tunda sǝkur Musa, har i nye nabaucin mak, Yeso da parak cikshi duk be mi nda ram i ɗa gǝri na kakkadu mak. ²⁸ Da akshi zadenakshi dantu kaye gutunu ri mi akshi aya, Yeso da dlam ka aci a nutana akshi. ²⁹ Amma akshi da ɗawaci i awayu, maya, am mbashi naja, gaɗau dlamingara afa atuke gaza gawabai da vǝgǝrigara." Se Yeso dayi da mbasin gǝri i rikshi. ³⁰ Lakwtu mi aci aɗa gayi akshi aya taa bikta sai aci dami boridi da barkawaci da pishashiri da barikshi. ³¹ Dasǝn daakshi da rǝpcin gara, akshi yakintu na aci tunu, se da ɗayin gǝri da rikshi. ³² Se akshi da rami gatukshi ma, "gǝshawa baki bai i kunawa sartu mi aci a rakan aɗa gayi na wa i ɗak dǝvu, sartu mi aci rǝptiwa kakkadadin?" ³³ Akshi datli i sartu, se da ka ci nakshin i Urshalima. Akshi da tasi guma awaya gayu a aɗa gayi na ndau jǝb na akshi, ³⁴ maya, "Katanas mǝgǝnyi Yeso tlan gǝri aci dagǝmu na Siman." ³⁵ Se akshi da ram be wakatu i ɗak dǝvo mak, na ka ki mi nda tatkikshi Yeso na lakwtu wara aci pishashuru burodi. ³⁶ Sartu mi akshi a tǝka rama bayangu se Yeso dar'i gadavakshi, se da ramikshi ma, "Salamko." ³⁷ Amman akshi da kalwunakshi na kalau akshi a tumangu ma akshi i kana nǝnuwa. ³⁸ Yeso da ramikshi ma, "kwa jǝkta gaɗa gǝmo? Gaɗa gǝmo kwa jaya i kunu gǝshakun? ³⁹ Aikina amiga na zǝgǝrga, i ɗak Iyu ne na aɗaga. A lǝnta kwai ki. Gaɗa nǝnuwa na tǝka bai na awǝk bai ka ki wara kwai kau Iyu na atu." ⁴⁰ Aku aci dlam rama tuku se aci da tatkishi ami gǝri na zǝgǝ gǝri. ⁴¹ Sartu mi akshi da niya na pǝrdai na bi ajab tunu Yeso da ramikshi ma, "kuna bikta ɗagǝ bi?" ⁴² Se akshi da ba ri ci vǝnekau da baka, ⁴³ Yeso da gǝnyi, da ci kimakshi ⁴⁴ Se aci da ramikshi ma, "Sartu mi na ɗa gayi na kun tunu, na ramdikun maya, duk be mi nda tarnu i kunu linok Musa na kǝ nabaucin na, zabura katanas da jǝbki." ⁴⁵ Se aci da rǝpci hankalshi gaɗa akshi da yakinci kakkadadin. ⁴⁶ Da ramikshi ma, "Da tarna ma, "masipu a sa bone, a tlayin gǝri da kunu mutu, i kunu yuwun kwan. ⁴⁷ A dlamina wa'azik tubi na kǝ tubta aipapin i kunu dlǝgun gǝri i duk ndawa mi zǝga Sǝku bai, a bandina da kunu Urshalima. ⁴⁸ Kun saida ne i bayangu mak. ⁴⁹ Aikina na wana akawar Afǝk ga i ɗa kun. Amma a dirina i kunu Alkariya. Se da nyi kun na kǝrmai da dǝsku." ⁵⁰ Dasǝn se Yeso dayin gǝri i ɗa gayi na akshi har i dantau Betanya. ⁵¹ Se da sukci ami geri da pikshi barka. ⁵² Se akshi da dlami ci nakwana da kalakcinakshi i Urshalima na pǝrɗai gawa. ⁵³ Fatawanke akshi a kunu sǝsu magita akshi a barkata Sǝku.