¹ Lakwtu ngǝmurri burrodi mi go yist mi nda ɗauro ma, Ngǝmurri Paska dengara damtau tənu, ² mammamin prrisaucin na malamcin dumaya da maka dəvu jəba Yeso amman i kunu dəɓəs, gaɗa akshu a kalu ndau. ³ Se lǝspǝrr da tǝfi gǝshi Yahuda, mi nda ɗauraugǝri ma iskaryoti, gayi da kunu muwanaucin Yeso. ⁴ Se acu dayi i ri marəmamin pərrisaucin na marəm askarrabaucin ndak ɗəmi ləma Wənduwa Səku, gaɗa akshi da dlam shawarr i ɗa dǝvu warra aci a bari na Yeso. ⁵ Akshu da dlam pərrɗai tlaparr, Se akshi da dlam sapərra barici dagwda. ⁶ Yahuda da kasakcingəri, se da jəb maka dəvu mi aci a baridikshi Yeso i lakwtu mi go algi i riwu. ⁷ Gafa ngəmurri Burrodi mi go yist dengara, lawtu warra dolle nda ziiji gwamak sanam paska. ⁸ Se Yeso da ɗaurai Bitrrus na Yahai, da ramikshi ma "Ada, kwa sapəraciwa Ngəmurri paska, gaɗa wa ci." ⁹ Akshu da jayaci da ramma "kancu jayi ja sapərraci manasanau i rawan?" ¹⁰ Da wurikshi ma, "kwa təfi kunɗa nin, kwa ndagəma na nən ɗagai a kakar vakənak am. A ɗəgina warrau i wənduwa mi aci aya, ¹¹ Se kwa rami baci wənduwau ma, "maləmja a jayau ma, səsu mpi magərafcinci a rawan, ri warra naye ta masana Ngəmumi paska na pukuraucinga. ¹² Warrau a tatka dikun səsu dəsku ɗagai marəm, na karre mbasu da sərma ɗarai a kunu, se kwa sapərraci riwu." ¹³ Akshi dayi, da tashi tamke kalkal, kakə warra Yeso ramikshi, se akshi da sapərraci Ngəmurri paskau. ¹⁴ Lakwtu dengara tənu, Yeso dambashi na muwanaucingu. ¹⁵ Se da ramikshi ma, "Na ntutu tlaparr naci masana ngəmurri paska təku nakun, damba kabine ga danai ¹⁶ To na ramakun, na ta ngemurri təku wam bai, se lakwtu dalil dlamau niyu i garva səku." ¹⁷ Se Yeso dami gərgiya aam inabi, da sambarkaci Səku, da ramma, "Amina sau kwa ɓəri gadava kun. ¹⁸ To na ramekun, na sa aam kə ɗi inabi təku wam bai, se garva səku deu." ¹⁹ Se dami burrodi da sambarkaci Səku da barikshi, a ramau ma, "Sutku təka ganai,warra nda baru gaɗa kun. A dlamina sau gaɗaga nai." ²⁰ Kasən ke, dami gərgiya, da ku ta Masanau, da ramma, "Am inabi kə kun gərgiya təku, kararak arrdiya i kun dədəm ganai, mi nda pau gaɗa kun. ²¹ Amman akəmin. Nən warra aye bari na iyu i makuraucinga a təka ta masana a ɗagayi na iyu! ²² Wəngənən rro aye mutu kakə mi nda sapərratu, amman wadarre i nən mi acine aye bari Wəngənən." ²³ Se pukurraucinga da ɓanji jaya gatkukshi, ma, tai i gadavakshi aye dlama bitku. ²⁴ Se gamɗaya da tlengara i wita pukurraucingu, aɗak, tai da kunakshi nda lawangu ma ɗəkadi marəm. ²⁵ Yeso da ramikshi ma,"Dəgamcin duniya təku rro a dlama garva ndiwa na gantam, akshi warra na kərrmai bari lənok ke ancu nda ɗaurakshi ma, "Ndak marrtapa." ²⁶ Amman da dlaɓa kasən bai na kun, da miya kasən, ngalko nən mi ɗəkadi marəm i witakun da dlaɓi ka warra ɗəkadi gangam i witakun, aci baci garva ke da dlaɓi ka gabayi. ²⁷ To tai ɗəkadi marəm? Nən mi a təka ta abənguu, ko baci guzapənau? Ai nən mi a təka tau ne ɗəkana baci gapənau i marəm. Amman so iyu na kunakun ka baci guzapəna. ²⁸ Amman kun ne mi kwa rrəɗu na iyu i kun sa jarrababinga . ²⁹ Kakə mi Afəkganai baridanai garva, kasən ke na bardikun, ³⁰ gaɗa kwa ci, kwa shi i ɗagayi na iyu i kun garva ganai, kwan mbashi i ɗa gwajerarin garva, kwa dlam sharriya i auɗaɗin guma ayawo shirin kə Isrraila. ³¹ "Siman, Siman, Ləspərr jayu da bi kun, gaɗa da tlaryikun, kakə alkamac. ³² Amman na dlamna magita gaɗaci Siman, gaɗa ka ci kema na aaman na iyu. Da ku ka kateu wam nin, ka ɗauzaci yaganaucinci kaskci na iyu." ³³ Bitrrus da ramici ma, Məgənyi, iyu na bəza ɗəgaci bai, ko i nye kun dəlo ko mutu." ³⁴ Yeso da ngumi ma, "Na rameci, Bitrrus, damba gaskam da dlam kwarya gusku, kaye dlama gamɗaya zəgər kwan ma ka zəgayu bai." ³⁵ Se Yeso da rami pukurraucingəri ma, "Lakwtu na wana kun go lalitarr, go kare buwa, ko sonanin tənu, kwa buku tam?" Akshi da wuri da ramma, "ja buku bee waammbai! ³⁶ Acu da ramikshi ma, "Amman lakwtu təku tənu, nən na lalintar nin, daa maa, harr na karre buwa cam. Tike mi go kasakarr nin, da ɗəbda kachumgəri da mashi gayi. ³⁷ To na ramekun, bee warra nda tarrnu game na iyu dolle da wakaci. Nda tarna ma, 'Nda nau na aci i kun ndak bike,' Auwo, bee warra nda tarrnu i ɗagagu a təka wakata." ³⁸ Se pukurraucingu da ramici ma, "Aiki, Məgənyi, sotai kasakarr shirin." Se aci da ramikshi ma, "Bata du." ³⁹ Dagaduwau, se Yeso da vəri, kakə mi aci kawau, i nye ɗa guguyak Zaitun, pukuraucin gu ke da ɗəgaci. ⁴⁰ Akshi zada riwu tənu, se aci da ramikshi ma, "A dlama magita, gaɗa kwa vəgee kun jarrapta bai." ⁴¹ Se acu da dabi kəma rap da rikshi, da pi kufugəri da dlam magita. ⁴² Aramau ma, "Baaba, ka laməntudu nin, amidanai gərgiyak bone təku da ɗaga. Dəkna kasən, ka ɗəga bee nacu bai, a kəci da dlaɓa!" ⁴³ Se so maleika da pakai da dəsku, a ɗauzatagəri. ⁴⁴ Gaɗa acu a kun kabine tlaparr, se da ci kəma na magita , harr ɗafugəri da jəb payi tlaparr ka ɗatlka dədəm i ɗa. ⁴⁵ Yeso tla dari magitagəri tənu, se da kaci ri pukurraucingəru, da tashakshi a yiwan, gaɗa ayuwa gəshi. ⁴⁶ Da ramikshi ma, "Kwa yiwan gaɗa gəmo? A tlina kwa dlam magita, gaɗa kwa vəge kun jarapta bai." ⁴⁷ Acu a kun dlamekshi rama, se so algi ndawa da pakai. Yahuda, gayi da kunu muwanaucingəri guma ayawo shiringu, deu na akshi. Se da dabai i ri Yeso, da jəbaci i guvagəri. ⁴⁸ Amma Yeso da jayaci ma, "Yahuda, kane na jəba gənən i guva bi, kaye bari wəngənən?" ⁴⁹ Lakwtu pukurraucin warra a ɗagayi na Yeso ika bee warra a wakata tənu, se da jayi Yeso ma, "Məgənyi, ja dlam karam bi, na kasakarr? ⁵⁰ Se gayi da kunu pukurraucingu da karmi guzəɓ marəm pərrisgu, dagəjidici aguɗgəri kə mata. ⁵¹ Amman Yeso da ramikshi ma,"Kwa dlama kasu wam bai." Se da lənci aguɗ warrau, da ngaci na aci. ⁵² Se Yeso da rami marəm pərrisaucingu, na marmamin askarabu ɗəmi wənduwa Səku, na ndawa gazgaraucin mi mi a gaaba na acu ma, "kwa deu na kasakarr, na zawawin gaɗa jəbagaa, kabe iyu baci bmbəɗa? ⁵³ Fatawanke na ɗagayi nakun, i wənduwa səku, kwa jəbayu bai. Amman sutku atu ne lakwtakun, na kərrmai Ləspərr da dlam wana ." ⁵⁴ Akshi da jəbna Yeso dayinkakshi na naci i wənduwak marəm pərris. Amman Bitrrus da jəb ɗəgagshi da pəɗəm. ⁵⁵ Ndak ɗəmi wənduwau da fici aka i gandərvu wənduwau, dambashinakshi i miyau, se Bitrrus ke dambashingəri i witakshi. ⁵⁶ Gabayi dabaku ɗagai ikau Bitrrus dambasu a miya akau tənu, se da pəci da, da ramma, "Nənangu a ɗagayi na aci." ⁵⁷ Amman Bitrrus da dlamna gamɗayau, daramma, "Ama, na zəgaci bi pa." ⁵⁸ Aku lakwtu rap, warrau ɗagai ikaci tin, se da ramma, "Ci cam gayi da kunakshi." Amman Bitrrus da ramma "Kaici, iyu bai." ⁵⁹ Aku lakwtu rap, se nən ɗagi wam da ramma, "Katanas ,nənangu a ɗagayi na aci, gaɗa acu nən Galili." ⁶⁰ Amman Bitrrus da ramma, "Warra! Na zəga bee ka ramau ngum bai!" Damba da dami ramau, se gaskam da dlam kwakuryakok. ⁶¹ Məgənyi da məsci daiki Bitrrus. Se Bitrrus da tanyi təlam Məgənyi, warra ramici, "Damba gaskam da dlam kwarya gusku, ka dlamagamɗaya zəgər kwan ma, ka zəgayu bai." ⁶² Se Bittrus da vəri vəda, da ɗanyi tlaparr. ⁶³ Se ndawa warra nda mpakshi i ɗəmai Yeso, da ɓanji ngarrəmtagəri da dadgaci. ⁶⁴ Akshi cimdici daagəri tin, da jayaci ma, "A rami təlam da ri Səku! Kəmu ci nin warrau tawan?" ⁶⁵ Aksh dlamu rama gaɓshu gawa i ɗa Yeso, da dlamici ngadar i ɗagəri. ⁶⁶ Da tlanu tənu, gazgaraucin kə Yahudaucin, na marmamin pərrisaucin, na malacin dumaya da cacpi, se ndanna Yeso i kəma majalis, ⁶⁷ da ramma, "Aramija, ci ne Masihu?" Amman aci da ramikshi ma, "Ko na rami kun, kwa kasakta na iyu bai, ⁶⁸ ke na dlamikun jaya nin, kwa ngumugu bai. ⁶⁹ Amman da kəmangu, Wəngənən aye dlɓa da mbasu i ami mata kərrmi Kakasəku." ⁷⁰ Se akshi mak, da ramma, "kane cigu wən Kakasəku bi? ' Dangumikshi ma, "Kwa ramdu kal kal, kasənu." ⁷¹ Se akshu da ramma, "Wate, wa maka zada saida tawam zam? So, wa kəmadu da miyagəri."