¹ Yeso suktu aɗagəri tənu se daiki ndak ləman a təka ta'yi kakshi barri i kun Wənduwa Səku ² Daiki gudugum ɗagai mi tluwa a pi anini shirin ³ Se da ramma, "Jirre na ramekun, gatluwak gudugum tǝku dlamu bari warra ɗǝka na kakshi mak ⁴ Ndangu mak dlamu bari da kunu bərrəɗ mi akshi na atu rro. Amman gudugum təku da kun tluwagara baru bee warra atu na atu cak cak" ⁵ Sartu mi ndau jǝgab a samana i ɗak Wǝnduwa Sǝku, a mangarrta zada guyuyayin bǝlan mi nda lǝmu na atu, na zada karre mi ndawa baru warra nda dlamitu jage na atu tənu, se Yeso da ramma, ⁶ "Gaɗa bayangu mi kwa təka lawangu nin, lakwtu aye ni warra ko guyuyak gaitak ndaivau bai i ɗa kamancu, makshi nda rǝbgadu." ⁷ Se akshi da jayaci ma, "Maləm, bayangu a wakata fatawan? Ke, tam a tatka gənawa lakwtu mi bayangu gu aye damtu wakata? ⁸ Se Yeso da wuri da ramma, "A dlamina ankal kada nda ləvaci kun. Gaɖa gawa aye ni i kunu dləgunga, a ramau ma, 'Iyu gu aci.' ke ma 'Lakwtuu dengara damta.' Kwa ɗəgakshi bai. ⁹ Kwa kəma zha na tlati ankal nin, kwa kalwa bai, gaɗa dolle bayangu da wakaci səkurr, amman dadəəriu aye wakata gususku-gususku bai." ¹⁰ Se da ramikshi ma, "Larrdi a tlayi na zha i ɗa larrdi, garva ke i ɗa garva. ¹¹ Ndaye gawa rǝb gagai tlaparr, na maya na dlamra i ri gawa.Bik ɗawa kalau na bik ajap aye wakata i dǝsku. ¹² "Amma kapǝn bayangu mak da wakaci, akshi aye jǝbakun da ravǝnyi kun,daya nakun i lǝma gazgaraucin kunu ləma ri cacpa yahudaucin, na dǝlo, nda yi nakun i kǝma dǝgamcin na ndak garva, mak gaɗa dləgunganai. ¹³ Sutku a bardikun kaada bari labarr i ɗa ga. ¹⁴ Gaɗa kasǝn, ampina di gǝshakun, kwa dlama saperra bai, i ɗa bee mi kwa ramau gaɗa ra aɗakun. ¹⁵ Atərro na baridikun tǝlam na aasǝm mi harr makuraucinkun ngum adǝmu mǝstekun rama bai, balle da dlamikun gamɗaya na bee mi kwaye ramau. ¹⁶ Amman harr Afafkin na miwaɗkun na yaganaucinkun na mangaucinkun ngum a bari nakun, nda tǝki na jǝgab da kunakun. ¹⁷ Tike a kuri nakun, gaɗaganai. ¹⁸ Amman ko yaɗ gaitak kǝ aɗakun a kambeta bai. ¹⁹ I kunu kanadakun, kwa gənna arro. ²⁰ "Lakwtu mi kwaika nda vaikǝna Urrushalima na askarrabaucin nin, a zǝgǝnadu ma kambeta gara dengara damtau. ²¹ To, ndawa mi a kunu Yahudiya da rawanakshi i aɗa guguyayin, ndawa warra a kunu marǝm ɗa ke, da vəra nakshi, kwaiva nda kunu pata ke da təfine kwakunu bai. ²² Atərro, sutku ne lakwtu foro, gaɗa bee mi nda tarrnu mak da wakacingara. ²³ Wadarre i amatin mi na madau, na warra na gudaf mi a sa anyi i lakwtu! Gaɗa ndaye dlama gaɓshu bone i larrdu, dlǝmatu gǝzhi kakasǝku aye vǝgayi i ɗak ndangu, ²⁴ Nda tǝknakshi na kasakarr, ko makuraucinshi da ngwinakshi i guzapǝna i larrdadin dama. Ndawa mi Yahudaucin bai a taa na Urrushalima na zha, da dlamikshi garva, harr se lakwtu mi Səku ampau damu. ²⁵ "Ndaye lawan gənawawin i kun afa, na tərra, na gəshaucin. I duniya ke, ndaye dlama bone kə duniyabu , na ruwawaɗ gaɗa ganjau aam kə madlarram. ²⁶ Arro ndawa aye vərangara gaɗa kalau, tumaan bee warra aye fəwayi aɗak duniya a ɗawa na ndawa i kalau. Kərmai kə duniya aye rəɓ. ²⁷ I lakwtu, ndaye lawan wǝngǝnǝn ani i kun kǝraɓak na kǝrrmai na saksakta tlaparr. ²⁸ Kwaika bayangu ɓanduna wakata nin, a ɗauzatina aɗakun gaɗa ra kun dengare damtau." ²⁹ Se da dlamikshi rama na gagənawa ma, "Aikina wakakin mak ba, ³⁰ ɓanduna ɗuwayu nin, kwa zəgidu dəman dengara damtau. ³¹ Kasən ke, kwaika bayangu a wakata nin, a zəgnadu ma garva Səku dengara i damtau. ³² "Jirre na ramekun, zaman tǝku a nuta bai, harr se bayangu mak wakatu, ³³ Dəsku na ɗa a damangara, amman təlamga a nuta bai alambaram. ³⁴ "Amman a dlamina ankal, gaɗa gǝshakun da niya bai na mbamba na kuyo, na ruwawaɗ duniya. Kada yuwangu a ni go tasǝna da jǝb nakun. ³⁵ Gaɗa aye ni i ɗak ndawa mak warra a duniya. ³⁶ A dlaɓina a kun ɗmai,kwa magita fatawanke gaɗa kwa bi awayau gwapi dari bee mi aye wakata, kwa bi kwaryi kəma wəngənən. ³⁷ Da tlanu wai, Yeso a gugza i wǝnduwa Səku, aduwau wai a vǝra dayi ɗak zəgawu warra nda ɗaurau Zaitun da wunyi riwu. ³⁸ Ndawa mak da nai pəɗəkpəɗək i wǝnduwa Səku gaɗa da kərramtaci.