¹ مین او روز، پادشاهی آسمون عَین ده بِکر ایبو که چِراشون وَرگیِن، سی خوش آمِدی دوماد رَهن سی استقوالش وِ دَر. ² پَین نِفر اِز اونو دونا و پَین نِفر دیِه نادون بیِن. ³ بِکریَل نادون چِراشون وَرگیِن، اما روغن وا خوشون نَبُردِن. ⁴ اما دونایَل، وا چِرا خوشون دَرف پُر روغن هم بُردِن. ⁵ چون اِویدَن دوماد دیر وُوی، همه تیلِشون سنگین وُوی، وُخُوسیِن. ⁶ مین نیمه شُو، صدای بلندی وِ گوش ایرِسی که ایگود: دوماد هِی ایا! وِ خوش آمِدی هُو برین! ⁷ اوسو همه باکِریَل بیار وُویِن و چِراهاشون اوماده کِردِن. ⁸ نادونیِل وِ دونایَل گُودِن: یَه ذِره اِز روغَنِتون وِ ایما بین، چون چِراها ایما هِی خاموش اییُوِه. ⁹ اما دونایَل جُواو دان: نیدیمِتون، چینوکه روغن سی همه ایما کفاف نیه. بِرین و اِز اونو که ایفروشِن سی خوتون بِخِرین. ¹⁰ اما اوسو که اونو رَهدن بی روغن بخرن، دوماد رِسی و بِکریَلی که اُماده بیِن، وا هُو وِ مهمونی عروسی رَهدِن و در بسته وُویی. ¹¹ بعداِز هُو، بِکریَل دیِه هَم رِسیِن و گوهدِن: سرور ما، سرورما، دَرِن سی ایما واز کن! ¹² اما هُو وِ اونو گُود: آمین، وِ ایشا ایگُوم، مُو ایشان نیشناسُوم. ¹³ پَ بیار بویین، چونکه اِز او روز و ساعت خِوَر نارین. ¹⁴ هَمیطور پادشاهی آسمون عِین میره ای ایمَنه که قصد سِفر داره. هُوخادمین خوشِن خواست و پیلاشِن وِ اونو دا. ¹⁵ و اندازه قاولیته هر خادم، وِ یکی پَنشتا قنطار دا، وِ یکی دو وُ وِاویکی یَه قنطار. اوسو رَه سفر. ¹⁶ میره ای کِه پَینشتا قنطار گِرِهده بی، فورا وا هُو کار کِرد و پَینشتا قنطار دیِه سود کِرد. ¹⁷ وِ همی طریق هُو که دو قنطار دیه هم گِرِهد. ¹⁸ اما هُو که یَه قنطار گِرِهده بی، رَه و زمینِن کند و پیل اربابِشِن قام کِرد. ¹⁹ بعد اِز چند وقت، ارباب او خادمینو وَرگَشت و اِز اونو حِساو خواست. ²⁰ میره ای که پَینش قنطار گِرِهده بی، پَینشتا قنطار دیه هم وا خوش اِوِرد و گُو: سرورم، وِ مُو پَینشتا قنطار دایی، یُوهَم پَینشتا قنطار دیِه که سود کِردُم. ²¹ اروابِش جُواو دا: آفرین، ای خادم درستکار و امانت دار! مین چی کَم امین بیدی، پَ تُون مین چیا زیاد اینوم. بیُو و مین خوشی ارواوِت شِریک بو! ²² خادمی که دو قنطار گِرهده بی هم اِوِی و گُو: وِ مُو دو قنطار دایی، یُوهم دو قنطار دیه که سود کِردُم. ²³ اَروابِش جُواو دا: آفرین، ای خادم درستکار وامانت دار! مین چی کم امین بیدی، پَ تون وِ چیَل زیادی اینوم. بیُو و مین خوشی اَرواوِت شِریک بو! ²⁴ اوسو خادمی که یَ قنطار گرهدِه بی ،نِزیک اِوی وُ گو:چینوکه ایدونستوم مِرد تُندی هستی ، اِز جایی که نکاشتیه دِرو ایکونی وُ از جایی که نَفِشنیدیه جَم ایکونی، ²⁵ پَ ترسِستوم وُ پیلِتِن مین زِمین قام کردُم. یُ هم پیلت! ^{26 27} اما سرورش جواو دا: ای خادم بدکاره و بی عار! تو خو ایدونستی از جایی که نکاشتُمه ، درو ایکُنوم وُ از جایی که نَفشگِنیومه ، جمع ایکُنوم، پَ سیچه پیلِ مون نادی صرافا تا چینو که وَرگشتوم هون وا سودش بستونوم؟ ²⁸ او قنطارُن از هو بستونین وُ و هو که دهتا قنطار داره بدین. ²⁹ چینوکه وِ هرکی داره ،بیشتر داده ایبوتا وِ فراوُنی داشته بووِه؛اما هو که ناره، هامونم که داره ازش گرهده ایبو. ³⁰ ای خادم بی فایده یون بینش وِ در مین تاریکی، جایی که گریوه و دندون و دندون ساییدن هستو. ³¹ اوسو که کُر انسون وا شکوه و جلال وُ هُمراهی همه فرشتیل ایاهه، سر تخت شکوهمند خوش اینِشینه ³² وُهمه قومون جلوش حاضر ایبووِن وُ هو مثل شُوونی که گوسفندیلن از بُزگل جدا ایکُنه،مردمونن و دو گروه تقسیم ایکُنه؛ ³³ گوسفندیلن اینه سمت راستش وُ بُزگلن اینه سمت چپ خوش. ³⁴ اوسو و اونو که سمت راستشن ایگو:بیاهین ، ای برکت گردیَل از پدر مو، پادشاهین وِ ارث بُرین که از شروع جاهان سی ایشا آماده وُویه. ³⁵ چینوکه گُسنه بیوم ،وِم خوراک دادین؛ تشنه بیوم ، وِم آو دادین؛ غریو بیوم،وِم جا دادین. ³⁶ عُریون بیوم، مون پوشنیدین؛مریض بیوم،عیادتم کردین؛مین زندان بیوم،وِ دیدنُم اِویدین. ³⁷ اوسونیکوکارا جواو این:سرورایما، کی تون گُسنه دیدیم و وِت خوراک دادیم،یا تشنه دیدیم و وِت آو دادیم؟ ³⁸ کی تون غریو دیدیم و وِت جا دادیم وُیا عُریون دیدیم و تون پوشنیدیم؟ ³⁹ کی تون مریض یا مین زندون دیدیم و وِدیدنت اویدیم؟

⁴⁰ پادشاه مین جواوشون ایگُوهه:آمین،وِایشا ایگُوم، هرچی سی یکی از ای کُچیریل ترین گُویل مو کردین، در اصل سی مو کردین. ⁴¹ اوسو وِ اونو که سمت چپشن ایگو:ای ملعونیل،از مو دیر وُوین وُ مین تَش ابدی برین که سی ابلیس و فرشتیلش آماده وُویه، ⁴² چینوکه گُسنه بیوم،خوراک نادین،تشنه بیوم،آو نادین؛ ⁴³ غریو بیوم ، جا وِم نادین؛ عُریون بیوم،مون نپوشنیدین؛مریض و زندونی بیوم ،وِ دیدنم نویدین. ⁴⁴ اونو جواو این : سرورمون، کی تون گُسنه و تشنه و غریوُ عریون و مریض و مین زندون دیدیم وُ خدمتت نکردیم؟ ⁴⁵ مین جواوشون ایگو: آمین، وِ ایشا ایگوم ،هر چی سی یکی از ای کُچیریلُ نکردین،در اصل سی مو نکردین. ⁴⁶ پَ اونو وِ مجازات ابدی داخل ایبووِن، اما نیکوکارا و حیات ابدی.