¹ اوسو عیسی خِطاو وِ مردم و شاگردونش ایطور گُود: ² عُلمای دین و فَریسیا سَر مسند موسی نشستنه. ³ پَ هر چی وِایشا ایگون نِیَهدارین وُ وِ جا بیارین ؛ اما عِمَلتون مثل اونو نَبو؛ چونوکه هرچی درس ایدن خوشون وِ جا نیارن. ⁴ بارا جونگِرِن ایبندن و سُر کول مردم اینِن؛ اما خوشون حاضر نیستن سی حرکت دادنشون حتی یَ انگشتی تَکون بِن. ⁵ هر چی ایکُنن سی یونه که مردم اونون بینِن:آیه دوناشونن گَفتر و دامنا عباشونن پهنتر ایسازن. ⁶ دوست دارن مین ضیافتا بالا نشین مجلس بووِن؛وُ مین کنیسه ها بهترین مکونن داشته بُوِن. ⁷ وُ مردم مین کیچه بازار وِشون سلام بِکنن و استاد خِطاوشون بکنن. ⁸ اما ایشا استاد خونده نَووین؛چینو که فقط یَ استاد دارین ؛ ⁹ وُ همه ایشا گُووین. هیچکَسن ری زِمین پدر نخونین؛چینو که فقط یِ پدر دارین که مین آسمونه. ¹⁰ وُ همیطور نخوین معلم خونده وُوین؛ چینو که فقط یَ معلم دارین که مسیح هستو ¹¹ هو که میون ایشا اِز همه گَفتره؛خذمت کار ایشا ایبوه. ¹² چینوکه هر کی خوشن گَپ بُکنه؛ پست ایبوه وُ هر کی خوشن اُفتاده ؛بُکنه سَر فِراز ایوُوه. ¹³ وای وِایشا ای عالما دین و فریسیا ریاکار؛ایشا دَر پادشاهی آسمونِن ری مردم ایبندین؛نه خوتون داخل ایووین و نه ایلین اونویی که مین رَه هستن داخل وُوِن. ¹⁴ وای وِ ایشا ای عالما دین وفریسیا ریاکار؛ ایشا اِز یَطرف هُونهء زَنگَلِ بیون غارت ایکُنین؛وُ اِز اُوطرف سی تظاهر؛ دعا خوتون طول ایدین. سی هم چینو مکافاتِتون خیلی سخت تر ایوُوه. ¹⁵ وای وِ ایشا ای عالما دین و فریسیا ریاکار؛ ایشا دریا و هوشکین گَشتین تا یَ نِفرن وِ دین خوتون بیارین؛ اوسو که اِوردین هُون دوبراور خوتون اولاد جهنم ایکُنین. ¹⁶ وای وِ ایشا ای رَهنُمایان کور که ایگوین : اَیر کسی وِ معبد قسم بُخوره طوری نیست؛اما اَیر وِطلای معبد قِسم بخوره وا وِ قِسَمش وفا بُکنه. ¹⁷ ای بی عقلا کور ؛ کُو وِ کی گَفتَره ؟ طلا یا معبدی که طِلان پاک ایکُنه. ¹⁸ وُ هاموطور ایگوین:ایر کسی وِ قربونگاه قِسم بخوره طوری نیست ؛ اما اَیر وِ پیش کِشی که سر هو ناهاده ایبوه قِسم بخوره وا وفا بُکنه. ¹⁹ ای کُورون ؛ کُو وِ کی گَفتره؟پیش کشی یا قُربونگاهی که پیش کشین پاک ایکُنه. ²⁰ پَ اُو کسی که وِقربونگاه قِسم بُخوره ؛ عین یُونه که وِ قربونگاه و هرچی سَر هو هِستو قسم خَرده. ²¹ وُ هر کی وِ معبد قسم بُخوره ؛ وِ معبد و هر چی مین هُو هِستو قسم خَرده. ²² وُ هر کی آسمون قسم بُخوره ؛ وِ تخت خدا و هرکی سَرش نشسته قِسم خرده. ²³ وای وِ ایشا ای عالما دینی وُ فریسیا ریاکار ؛ ایشا اِز نعنا و شویدو زیره ده یِکِتون ایدین؛ اما حکما مُهمتر شریعتن که عدالت و رحمت و امانت هستو ؛ نا دیده ایگرین ؛ اینون وا وِ جا ایوردین وُاونون یادتون نیرَه. ²⁴ ای رَهنُمایان کُور؛ ایشا پَشقَن وِ صافی رَد ایکُونین ؛اما شُترِن یَ جا قُورت ایدین. ²⁵ وای وِ ایشا ای عالما دینی وُ فریسیا ریاکار؛ایشا دُور پیاله و پُشقاوِن پاک ایکُنین؛اما داخلش پُر اِز طِمَع و ناپَرهیزیه. ²⁶ ای فریسیه کُور؛اول داخل پیاله و بُشقاوِن پاک بُکُن که بیرونش خوش پاک ایوُوه. ²⁷ وای وِ ایشا ای عالما دین و فریسیا ریاکار؛ ایشا مثل گُورهایی هستین؛ سِفی کاری وُویه که اِز بیرون قِشَنگ وِ نِهر اِیاهین اما داخلش پُر هِست اِز استخونها مُردیل وُ هر نُوع نِجِستی. ²⁸ وِ ای صورت ایشا خُوتونن تی مردم درستکار نشون ایدین ؛ اما مین باطنتون پُر اِز ریاکاری و شِرورَتین. ²⁹ وای وِ ایشا ای عالما دین وُ فریسیان ریاکار؛ ایشا سی پیومبرا زِریح درست ایکُنین؛وُ آرومگاه درستکارُنِن زینتی اِیکونین ³⁰ وُ ایگُوین: اَیر مین روزگار پدرامون بیدیم ؛ هیچوقت مین کُشتن پیومبرا واشون شیریک نیوُویدیم. ³¹ ایطوُرُنی وِ ضد خوتون شُهودی ایدین؛ که اولادِ قاتِلونِ پیومبرایین. ³² حالا که ایطوره؛ پَ هر چی که بُویَلتون شروع کردن؛ایشا وِ کمال رِسُندین. ³³ ای مارون ؛ ای افعی زادییَل ؛ چطور اِز جِزای جَهنم فِرار ایکُنین؟ ³⁴ چینوکه مُو انبیا و حکیما و عالما تی ایشا رُونه ایکُنُم وُ ایشا بعضیاشون ایکُشین وُِ وِ صلیب ایکِشین ؛وُ بعضیاشون مین کِنیسه ها شلاق ایزنین وُ شهر وِ شهر دینداشون ایرین. ³⁵ پَ همه خینِ درستکارا که سر زمین رِده وُویه ؛ اِز خینِ هابیلِ درستکار بِگر تا خینِ زکریا کُر برخیا ؛ که مابینِ مِحراب و قُربونگاه کُشتینش؛ وِ گَردن ایشانه. ³⁶ آمین وِ ایشا ایگوم ؛همهء اینو دامنگیره ای نسلُ ایبوه. ³⁷ ای اورشلیم ؛ ای اورشلیم؛ ای قاتلِ پیومبرا ووُ سنگسار کُنندهء رسولایی که تی تو رُونه کرده وُوین ؛ چند وِلا خواستُم مثل مُرغی که تیلییَلِش زیر پَر و بالش جمع ایکُونه؛ بَچیَلِتن جمع بُکنوم اما نخواستی. ³⁸ حالا دیه هُونهِ ایشا وِ خوتون ویرون کرده داده ایبووه. ³⁹ چینوکه وِ ایشا ایگُوم دی اِز حالا وِ بعد مُون دی نیبینین تا روزی که بُگُوین: مُوارک هست هو که وِ نُوم خدا ایاهه.