¹ عیسی دوواره وا مِثل وا اونو صحبت کرد و فِرمون دا: ² پادشاهی آسمون مثل شاهی ایمَنه که سی کُر خُوش جشن عروسی وِپا کرد. ³ هو خادماشن رونه کرد تا وِ دعوتیا بُگن وِجشن بیاهِن؛ اما اونو نخواستن بیاهِن. ⁴ پَ خادمونی دیه رونه کرد وگو:دعوتی یَلن بُگوین همی حالا سفرهء جشنن آماده کِردمه؛گایل وگُوریل پرواریمن سر بریدمه وُ همه چی آماده هستوپَ وِ جشن عروسی بیاهین. ⁵ اما اونو اعتنا نکردن وُ هر کی وِ رَه خوش رَد یکی سر زِمینش ؛ یکی وِ تجارت خوش. ⁶ دیگرون هم خادمونش گِرهدن آزار دادن وُ کشتن. ⁷ شاه تا یون اَشنید غضوناک وُوید لشکرخوشن رونه کرد و قاتلونِ کشت وُ تش نهاد وِ شَهرشون. ⁸ اوسو وِخادمومونش دستور دا؛جشن عروسی آماده یه ؛ اما دعوتیل لیاقت اویدن مین هون ناشتن. ⁹ پَ برین مین میدون شهر وُ هرکین جُستین وِجشن عروسی دعوت بُکنین. ¹⁰ غلامون رَهدن مین کیچیل وُ هرکین که جُستن چه خو وچه بد؛ وا خوشون اِوردن و تالار عروسی اِز مِهمون پروُوی. ¹¹ اما اوسو که شاه سی دیدن مهمونا اِوی مین مِیلِس؛ مِردین دی که لَواسا عروسی وَرش نَبید. ¹² اِزش پرسی:ای رفیق چطور بی لَواس عروسی اِویدی ایچو؟ او مِردو جُواوی ناشت. ¹³ اوسو پادشاه وِ خادمون خُوش گُود:دست و پاشِن بندین و هون بین وِدَرمین تاریکی؛جایی که گریوه و دندون وِ دندون سایدن هستو. ¹⁴ چینو که دعوت وُویل زیادن اما برگزیدیل کم. ¹⁵ اوسو فریسیا زیدن وِدر وُ شُور کردن تا بِنرن چطور ایترن هُون وا حرفها خوش وِ تَله بِن. ¹⁶ اونو شاگردا خُشونِن وا هیرودیا رُونه کردن رَهدن تیش وُ گُودن:استاد ایدونیم تو مِرد صادقی هستی وُ رَه خُدان وِ درستی یاد ایدی وُ اِز کسی ترسی ناری چینوکه ظاهری سیل کَسی نیکنی. ¹⁷ پَ رأی خوتِن وِ ایما بُگوآیا دادن خراج وِ قیصر رَوایه یا نه؟ ¹⁸ عیسی وِِ فِکر بَدشون پی بردوُ گو:ای ریاکارون سیچه مُون ایازمایین؟ ¹⁹ سکه این که وا هُو خراج ایدین نشونُم بِدین. اونو سکهء یَ دیناری وِش دادِن. ²⁰ اِزِشون پرسی :نَقش و نوم ای سکه یو اِز کیه؟ ²¹ جواو دادن: اِز قیصر.وِ اونو گُود:پَ مال قیصرن وِ قیصر بین وُ مال خُدان وِ خدا. ²² چینو که یُون اَشنیدن تعجو کردن وُ وِلش کِردن رَهدن. ²³ مین هامو روز صدوقیا که قیومتن غِوول نارن اِویدن طیش وُ اِزش سوال کردن؛ ²⁴ گُودن: استاد موسی وِ ایما دستور داده که اَیر میره ای بی اولاد بمیره ؛ گُووش وا بیوهونِن وِزینه ای بِستونه تا اِز هوسی گُو خُوش نَسلی جا بِنه. ²⁵ زِمونی میون ایما هفتا گُو بیدِن .گُو اَولی زینه اِستید وُ مُرد وُ چینوکه اولادی ناشت؛زینه بیوه خُوشن سی گُوش ناهاد. ²⁶ همیطور دومی و سومی ؛تا هفتمی. ²⁷ سر اَنجوم زینه هم مُرد. ²⁸ حالا؛مین قیومت ؛او زینه یو ؛اِز هفتا گُو زینهء کُوِکیشونه؛چینو که همهء اونو هُون وِ زینه ای گِرِدِن بی؟ ²⁹ عیسی جواو دا:ایشا گُمراه هِستین؛ چینو که نه اِز کتاوا مفقدس آگاهین وُ نه اِز قدرت خدا. ³⁰ مین قیومت نه کسی زینه ایستونه نه کسی شیی ایکونه ؛چینو که همه مثل فرشتیل آسمون ایبووِن ³¹ اما دروارهء قیومت مُردیَل؛آیا نَخوندینه که خدا وِ ایشا چه گُوده؟ ³² هُو فِرمون دا که : مو هِستوم خدای ابراهیم ؛ خدای اسحاق وُ خدای یعقو؛هُو نه خدای مُردیله چینو که خدای زندیله. ³³ مردم وا اَشنیدَن ای سُخنون هُو شگفت زیده وُوین. ³⁴ چینو که فریسیا اَشنیدن که عیسی چطور وا جُواواش دُون صدوقیان بسته؛ دورِ یَک جَم وُوین. ³⁵ یکی اِز اونو که عالمی بی وِ ای قَصد که عیسان بِ مین تِله؛ اِزش پُرسی: ³⁶ ای استاد؛ گَفترین حکم ؛ مین شریعت چنه؟ ³⁷ عیسی جواو دا:خداوند؛ خدای خوتونِن؛ وِ تمومی دل ؛ تمومیِجون و تمومیه فکرتون محبت بکُنین. ³⁸ یُو اولین وُ گَفترین حکم هِستو. ³⁹ دومین حکمم مثل حکم اولیه : هُمساتِن چینو خُوت مُحبت بُکن. ⁴⁰ تمومیه شریعت موسی و نِوشتیلِ پیومبرا سَر ای دو حُکم ُ ایواسته. ⁴¹ هاموسو فریسیل که دور یک جَم بین ؛ عیسی اِزشون پُرسی: ⁴² نظر ایشا در وارهء عیسی چنه؟هُو کُر کیه؟ جواو دادن: کُر داوود. ⁴³ عیسی گو: پَ چطور داوود مین روح؛ هون خداوند ایخوند؟ چینو که ایگو : ⁴⁴ خداوند وِ خداوندِ مو گُود: وغ دست راست مُو بنشین تا اوسویی که دشمنونتن قالی زیر پات بُکنوم. ⁴⁵ اَیر داوود هُون خداوند ایخوند ؛ چطور هُو ایتره کُرِ داوود بِوه ؟ ⁴⁶ ایطور وُوی که هیچکس نَترست جُواو هُون بده و اِز اوسو دیه هیچکس جرآت نکرد پُرسشی وِش بُکنه.