¹ Uku kulanda kwa cishinka: umfwa umo nga akofwaisha ukuba cilolo, akofwaisha umulimo uwabune. ² Eco cilolo alilingile ukuba uutatungwa akabi. Alingile ukuba umulume wa mukashi umo. Uwa misango ya bune, uwakutekanya, uwakuicindika, kabili uupokelala abeni. Alilingile ukwishiba ukusambilisha. ³ Uutali cakolwa wa mwangashi, uutali wa lubuli, lelo, uwa mutembo, uwa mutende. Tafwile ukuba uwatemwisha indalama. ⁴ Alilingile ukulekusunga bwino abang'anda yakwe, kabili alilingile ukushininkisha ukweba ati abana bakwe bali ne cumfwila no ku mucindika ena munshila shonse. ⁵ Pantu umfwa umuntu teshibile ukusunga abang'anda yakwe, kuti asunga shani ulukuta lwakwa Lesa? ⁶ Tafwile kuba umuteku mucisumino, pakweba ati tali na katutumushi kabili kuti awila mukusekwa kwakwa kasebanya. ⁷ Alilingile ukuba uwa kushimikwa ukwabune kuba kunse, pakweba ati taponene mukusebana na muciteyo cakwa kasebanya. ⁸ Mu nshila imo ine, Badikone balilingile baba abamucinshi, teba ndimi shibili. Tabalingile abakunwa umwangashi uwingi nangu aba bulili. ⁹ Balingile baba abakusunga ica nkama ca citetekelo muli kampingu uwa kusanguluka. ¹⁰ Balingile babalilapo ukusuminishiwa, kabili nolu bakotendeka ukupyunga pantu bakaele. ¹¹ Mu nshila imo ine, abakashi babo balingile baba aba mucinshi, teba mulomo, lelo abatekanya kabili abacishinka muli fyonse. ¹² Badikone babe abalume ba mukashi umo. Balingile baba abakusunga abana na ba ng'anda yabo ubune. ¹³ Pantu abo bonse abapyunga ubune balaimwena incende iya bune no kushipa ukwingi mucitetetelo icili muli Kristu Yesu. ¹⁴ Ulo nkolemba ifi fintu kuli mwebo, nkosubila ukwisa uko kuli mwebo bwangu. ¹⁵ Lelo umfwa nakokola, nkomilembela pakweba ati mwishibe ifyo mufwile ukwikala mu ng'anda ya bakwa Lesa, iili lukuta lwakwa Lesa uwa mweo, uluceshi kabili ishintililo lya cine. ¹⁶ Bonse tukosuminisha ati ifya nkama fya bu Lesa fikulu: "Alisokolwelwe mu mubili, alipelwe insambu ku Mupashi, alimwenwe kuli ba malaika, alibililwe ku nko, alicetetelwemo mucalo, kabili alisendelwe mu bukata."