¹ Mukulekelesha, bamunyinane, tukomipapata no kumikonkomesha muli Shikulu Yesu. Pamo nga fintu mwapokelele isambililo ukufuma kuli fwebo ifintu mufwile ukwenda no kusekesha Lesa, Na muli iyi nshila mwenda, pakwebati mucite fyo no kucilapo. ² Pantu mwalishiba isambilisho twamipele muli Shikulu Yesu. ³ Pantu uku ekufwaya kwa kwa Lesa, ukusangululwa kwenu, ukwebati mufumeko ku bulalelale, ⁴ ukwebati onse muli mwebo eshibe ukukwata umukashi wakwe muli bumushilo no mucinshi, ⁵ te mu mufimbila wa lunkumbwa (kubati bena fyalo abataishiba Lesa). ⁶ Umuntu nangu umo talingile ukubifya no kulufyanya wabo muli ici cintu pantu Lesa eulandula muli ifi fyonse, nga fintu twamisokele libela no kupela ubunte. ⁷ Pantu Lesa tatwitile mukukowela, lelo kuli bumushilo. ⁸ Eco, uwakana ici takana bantu, lelo Lesa, uupela Umupashi wa Mushilo kuli mwebo. ⁹ Ulwa kutemwa kwa bwananyina, tamwinga kabila umuntu ukumilembela, ico mwebo mwebene mwalisambilishiwe na Lesa ukutemwa umo no munankwe. ¹⁰ Mucine, efyo mucita kuli bonse aba bwananyina aba mu Makedonia. Lelo tukomikonkomesha, bamunyinefwe, ukulacita ici no kulacishapo. ¹¹ Kabinge tukomikonkomesha ukufwaisha ukwikala mu mutalalila, musakamane imilimo yenu, no kubomba na maboko yenu, filya fine twamikambishe, ¹² pakwebati mwingenda bwino bwino muba kunse no kukana ba no ku kabila akali konse. ¹³ Tatukofwaya mwebo mube abashaishiba, bamunyinefwe, pali abo abalala, pakwebati tamuli no bulanda nga bambi, abatakwata isubilo. ¹⁴ Pantu umfwa twatetekela ukwebati Yesu alifwile kabili alikubukile nakabili, efintu Lesa akaleta pamo na Yesu abo abalala utulo muli wene. ¹⁵ Pantu tukolanda ici kuli mwebo mu cebo cakwa Shikulu, ukwebati fwebo fwe ba mweo, abakashala pakwisa kwa kwa Shikulu, tatwakatangilile abalala utulo. ¹⁶ Ico Shikulu umwine akekila ukufuma mu mulu. Akesa no kubilikisha, ne shiwi lyakwa malaika mukalamba, na kuntandala yakwa Lesa, na bafwile muli Kristu bakabalilapo ukubuka. ¹⁷ Nolu fwebo fwe bamweo, abakashalapo, tukolulwa pamo nabo mu mulu mu makumbi kuku kumanya Shikulu mu lwelele. Muli iyi nshila efyo tukaba lyonse na Shikulu. ¹⁸ Eco, koseleshanyeni muli fi fyebo.