¹ Nomba ukulingana ifya nshita ne nshiku, mwe bamunyinane, tamukokabilwapo icintu nangu cimo ukumilembela. ² Pantu mwebene mweka mwalishiba fye bwino ukwebati ubushiku bwa kwa Shikulu bukoisa kubati mupupu mu bushiku. ³ Ulo bakolanda, "Mutende no bucingo," Elo uboni bwakupumikisha bukesa pali bena. Cikaba kubati bukali bwa pakupapa ku mwanakashi uli ne fumo. Takwakabe nelyo panono ukupusuka. ⁴ Lelo mwebo, mwe bamunyinane, tamuli mu mfifi pakwebati ubushiku bulya bumipumikishe kubati mupupu. ⁵ Pantu mwebo bonse muli bana ba lubuto kabili abana ba kasuba. Tatuli bana ba bushiku nangu aba mu mfifi. ⁶ Eco twiba abakulala ngefyo bambi bacita. Mukucilapo, tube abakulola kabili abakutekanya. ⁷ Pantu abo abakulala balala ubushiku kabili nabo abakolwa bakolwa ubushiku. ⁸ Lelo fwebo pa kuba aba mu kasuba, tufwile ukuba abatekanya kabili abafwala icitetekelo ne icitemwiko nge cakucinga icifuba, kabili ne subilo lye pusukilo eca kucingo mutwe. ⁹ Pantu Lesa tatusontele ukulola ku bukali, lelo ukuba ne pusukilo ukupitila muli Shikulwifwe Yesu Kristu, ¹⁰ uwa tufwilile pakwebati nangu tube abakulole nangu abakulale, tungekala pamo nankwe. ¹¹ Eco koseleshanyeni umo no munankwe kabili kulishanyeni, ngefyo mukocita. ¹² Icine cine tukomupapata, mwe bamunyinane, ukwishiba abo abakopyunga muli ba mwebo kabili abalashikwa pali mwebo muli Shikulu kabili abakomikonkomesha, ¹³ kabili ukubacindikisha mu kutemwa pamulandu wa milimo yabo. Beni abamutende pakati kenu mwebene beka. ¹⁴ Twamikonkomesha, mwe bamunyinan: Cenjesheni abanang'ani, koselesheni abatompoka, afweni abanaka, beni abatekanya kuli bonse. ¹⁵ Moneni ukwebati peba wa kubwesesha ububi pa bubi kuuli onse. Lelo, mweshe ukucite icabune kuli umo no munankwe na kuli bonse. ¹⁶ Sekeleleni lyonse. ¹⁷ Pepeni ukwabula ukuleka. ¹⁸ Muli fyonse toteleni. Pantu uku ekufwaya kwa kwa Lesa muli Kristu Yesu kuli mwebo. ¹⁹ Mwishimyo Mupashi. ²⁰ Mwisula ifisesemwa. ²¹ Lingululeni ifintu fyonse. ikatisheni ku cabune. ²² Talukeniko kububi bwa musango onse. ²³ Lekeni Lesa wa mutende amushishe umupwilapo. Lekeni imipashi yenu, ne myeo, ne mibili ibakwe iya bula akalema pakwisa kwa kwa Shikulwifwe Yesu Kristu. ²⁴ Wacishinka uyo uumwita, uyo kabili eukacicita. ²⁵ Mwe bamunyinafwe, tupepeleniko na fwebo. ²⁶ Posheni bonse aba bwananyina no kufyompana ukwashila. ²⁷ Nkomikonkomesha muli Shikulu ukwebati iyi nkalata ibelengwe kuli bonse aba bwananyina. ²⁸ ukusenamina kwa kwa Shikulwefwe Yesu Kristu kube na mwebo.