¹ Nang shii in teown ti shinui ya, "Ne ta teuma yen kulli, ka peddi ti shakki ma me shengrii ti po te me shinui a ta nau murom shinui ta we shik po ya-gubno Yamma wanna ti ta kumen." ² Ka bi shaklo paragbanang, Yeesho in ye ma Biiturush, Yaakubu kan Yuwaana in ammaju ku joori sheela ku-jalju. Nang shii in paaroo kuuni ti toomjui. ³ Lannani in shiwaro yen pek shak-shak, pei yeka pe wee mondok ti ku-buk ta dum wunin shinui. ⁴ Nang ma Ilya kan Muuja in perin ti jelejui, kan shinui in ti ya paaro kan Yeesho. ⁵ Biiturush in tewi ti Yeesho ya, "An-shubet, yuwaa kpang ye kama ti po te, kan shero mo min limma tam tat, dok ka longkuuko, dok ka longkuuno Muuja kan dok ka longkuuno Ilya." ⁶ (Longku shii a peno wee po tewanim, longku shinui yuwaa shewo.) ⁷ Nang shunngu in shaaru in kau kuujui, nang ele paaro in perin ti ta shunngui ya, "Leyyei Laano. Ma kaan kumo ti shii." ⁸ Kpantidi, koddi ye shinui shibyaa dooju ti jele gongoju, shinui a wa shik koo niyo dok kan shinuim, pene bara Yeesho. ⁹ Kaa ye shinui ti ku shaarin ti ku sheelai, shii in pekro shinui mo wessho tewani ti koo niyoi wee shin weena shikii we war koddi ye La Niyo ta illon ti shakki me kumai. ¹⁰ Longku kaa te shinui in wessho wei ti kuuju, pene shinui in ti deppina ti shakkiju "illani ti shakki kuma" ta shuklo wen. ¹¹ Shinui in tel shiiya, "Longku wen me an-shubet shoro tenna ya Ilya ta shiru ka toom an marku in tang warui?" ¹² Shii in ligno ti shinui ya, "Oo, Ilya ta shiru ka toom in meeru ka we ding. Pene ka longku wen ye ballaa ya La Niyo ta taa shilib we gbe kan ta kura shii? ¹³ Pene ne ta teuma na Ilya fuwaa po warini, me an-toomu kama in yuun wee pire shilib shiknii kaa ye shinui leka yuun ti shii, kaa ye balliin ti kuunii." ¹⁴ Koddi ye shinui wanna shik dogi mean yiu-shubeti, shinui in we tappan jima ti jelejui, kan me an-shubet ta shoro in ti ya jiram kan shinui. ¹⁵ Kpantidi kaa ye shinui weyaa shikno Yeesho, jimai ding in ya maam ka ye Yeesho foona kan ye shinui juuga ammoi kakyo shii. ¹⁶ Shii in tel me na yiu-shubetni ya, "Ma ti ku ya jiram kan shinui ti ku wen?" ¹⁷ Mondok ti shakki jimai in liginon ti shii ya, "An-shubet, ne wannako ka laano. Shii kan shoom ye a ti mini koko po ya paarom. ¹⁸ Ti shokro shii in ti birin buk, kan maa yuwaa fubul in t perin ti foki, in ti ar ku-wuroni, kan maa yuwaa shiknii in isshoro. Ne bennga me an yiu-shubetko mo shinui forin ti shiknii, pene shinui a dumum." ¹⁹ Shii in lignon ti shinui ya, "Mei kan lishaarim ti ku-kira te, ne ta diyani bakii ka yee nen ti shassho mai? Ma warin nen ka lai wono." ²⁰ Shinui in warin ka la-shwijii ti shii. Koddi ye shoomi weyaa shikno Yeesho, kpantidi in shokinna in birin buk ka Shii shiki in tari. La-shwijii in shugna ti buk kan fubul in ti perin ti ku-foki. ²¹ Yeesho in tel fonii ya, "We te liina gunii dimin?" Fowii in liginna ya, "Liina guni ye tida shii ti ta ya laani. ²² Manni koddii ti ter shii ti ta deet koo ti ta doo kan in ti gassho po tuk shii. Ke maa ta dum ya weenan dok, kunngomu ken shaumu." ²³ Yeesho in tewon ti shii ya, "Ke teka ka ne maa ta dum yaa'? We ding ta dum yooro ti piree kan mo kan lishaari." ²⁴ Kpantidi fowi lai in showin ka bang ele ya, "Ne liyaa shaari! Shau kenni lishaarino!" ²⁵ Koddi ye Yeesho weyaa jimai juun yoba waru shikju, shii in pekro piire shoomi in tewi ya, "Ke baaba kan gballa shoom, Ne pekraako, periko ti shiknii, kan moko tokko shaari ri shiknii birangum." ²⁶ In yallina kan bangi kan in tar shik la-shwijii kping kan nang in periro. Lai in yooni kaa mo muraani, longku kaa te memme gbe in tewi ta shinui ya, "Shii murooni." ²⁷ Pene Yeesho in yiwin lai ti kirai in shokro shiknii ti po sheri, kan lai in shereni sherii. ²⁸ Koddi ye Yeesho riina ta minai,me an yiu-shubetnii in tel shii ku-jalju ya, "Longku wen ye minui dum foranmmi?" ²⁹ Shii in tewon ti shinui ya, "Peen ween shurme te a ti perim nang bara ka fura-fok." ³⁰ Shinui in pereju ti po teere yiwaju shakki Galiili. Shii a lewo koo niyo in pen piree kan shinum, ³¹ longku shii ti ku shuppo me an yiu-shubetni. Shii in tewon ti shinui ya, "La Niyo ta waraa minani ti ta kira memme, kan shinui ta tuk shii. Koddi ye tukaa shii, ka bi shaklo tat shii ta illani birang." ³² Pene shinui a peno paaro tem, nang shinui in ya shewo tel shii ka wee paaroi ta shuklani. ³³ Nang shinui in foottu Kapanaawum. Ka bi ye shii riyaa ta Minai shii in tel shinui ya, "Ma ti ku deppanii wenee ti ku kokoi?" ³⁴ Pene shinui in yooju yititi. Longku shinui ti ku ya jiram kan shaayi ti koko ti ku ye mon gba dingii nong. ³⁵ Nang Yeesho in deeni dii, shii in ye kpumu gee-palawi ti do shaayi kan in tewon ti shinui ya, "Maa mo leka in yooni an toom, yikka shii ti gbare-do in yooni mo an-gbattorok kan shook ti memme ding." ³⁶ Nang shii in ye la la-weeu in sheron ka shii ti shakkijui. Shii in shokro shii ti kirani kan in tewon ti shinui ya, ³⁷ "Maa mo yikka peen nyitti shiba te ti ta shommono yikkai ne; maa mo yikkano a yiwii nem penei mo shunnano." ³⁸ Yuwaana in tewon ti shii ya, "An-shubet, min weena manni niyoi ti ku foddo shanngau ti ta shommoko kan nang minun beelon foki ti shii, longku shii a ti yiu biimu kamam." ³⁹ Pene Yeesho in tewi ya, "Mo ma beelo shiim, longku adoo mo ta ya gbidina shuran ti ta shommono kan kpantidi ka bi in teu manni piire wei ti kuunom. ⁴⁰ Maa moi ta ya gei ka kamam shii sheemu kama. ⁴¹ Maa mo minaa ma la temme doo ti ta shommono longku mai sheeno Kiriti, kulli ne ta teuma, shii a ta kaano we we shik shurannim ⁴² Maa mo ta li dok ti shakki nyitti meere me kunnga kan ne in shugna, ta ya kpang ti muyei in dawin gbong vin issho-we ti ta bongi kan in ving shii ti ta paali-doo. ⁴³ Ma kirako maa ti liiko ya shasshalau, peero nyit. ⁴⁴ Ta yuuko kpang ken ri ta ta kerang ka gbiiran kira kan ye ken ri ka ta deet po ding kan kirako palawi, deet yei ti bittinam. ⁴⁵ Ma shooko dok maa ta liiko ya shasshalau, peero ken kpaalla won. ⁴⁶ Ta ya kpang ken ri ta kerang ka gbiiran sho dok kan ye in vingko ti ta deet po ding kan shooko ding palawi. ⁴⁷ Ma adooko maa ti liiko ya shasshalau, kukullu ken vingi won. Yuwaa kpang ken ri ta ya-gbno Yamma ka adooko dok kan ye in ving lo-shikko ti ta deet po ding, ⁴⁸ ti piree dolooni me ta sha niyo a ti murin, kan deet a ti bittinam. ⁴⁹ Koo nong ta pen anjyaa shiknii ka deet. ⁵⁰ Anjyaa kpang, pene anjyaa maa adoo tomonim, ka yee ye ma ti liyan in ya tomon birangi? Ma yu kpang ti shaayi kaa ye anjyaa ti tokko shaari tomon ti weshiina, kan man dee ma ti ta kuttan shaari kan shaayi."