¹ Yeesho in wessho po teere in wanni ta buk Yawuudiya kan piree kpakan-fok Shiiruk Urdun, kan jimai in waru shiknii. Shii ti ku shuppo shinui birang, kaa ye waarii kunngan ti shii mo yu. ² Nang Parishaawa in waru shiknii ka we nau shii kan in ya telyo ya, "Shoro kunnga ya mo shwiji tuk diyaano mannani ya?" ³ Shii in liginna ya, "Muuja pekraa ma ya yee?" ⁴ Shinui in tewi ya, "Muuja kunnga mo shwiji ballo takarda tuk diyaa kan in kai biiroi won." ⁵ Yeeshon in lignon ti shinui ya, "Ka longku bang poshaari ma ye shii ballaa ma shoro te.' ⁶ Pene ti liyaan gun ku-buk, 'Yamma yuuna shinui shwiji kan paamun.' ⁷ 'Longku kaa teshwiji ta wessho foni kan nonni kan in deeni kan mannani, ⁸ kan shin palawi ta yooju lo-shik dok.' Kaa te shinui birang a palawum, pene lo-shik dok. ⁹ Longkuuno te, wee Yamma kponngan shaayi mo la niyo wessho bwaaranii." ¹⁰ Koddi ye shinui ti ta minai, me an yiu-shubeti in tel shii ti ku we te. ¹¹ Shii in lignon ti shinui ya, "Maa mo tuka diyaa mannani kan in dig manni paamuni yuwaa shomak kan tei. ¹² Ma tei maa bwaaraa diyaaro kan mannaro kan in digaro nanni shwijii tei yuwaa shomak." ¹³ Nang shinui in wangittu ka nyitti shibaju ti shii ka longku shii in tau shikjui, pene me an yiu-shubetni in yiu pekro shinui. ¹⁴ Pene koddi ye Yeesho jemlaa kaa te, shii a shu-tomonim nang in tewon ti shinui ya, "Ma wessho nyitti shiba mo waru shikno, kan mo ma foddon foki ti shinuim, longku gubno Yammai we peen me kaa shinui. ¹⁵ Kulli ne ta teuma, maa moi yiu gubno Yamma kaa kattan lam, shamma-det a ta ri taim." ¹⁶ Nang shii in shokro nyitti shiba ti ku kirani kan in liin kpang ti kuujui kaa ye shii liyaan kirani ti kuujui. ¹⁷ Koddi ye shii liyaa gun mereni, manni shwijii in juuru yaba ti biinii in juunan nen ti toomnii kan in tel shii ya, "An-shubet mon kpang, ne ta yaanii wen mem waan kerang po dingii?" ¹⁸ Yeesho in lignon ti shii ya, "Longku wen ke ta yeeno kaa kpangii? Adoo mon kpamgum bara Yamma shi dokni. ¹⁹ Ke penaa shoroi: Moko tuk niyom, moko yu shomakum, moko yu jirim, moko yu jimram shabam, moko dokko niyom, min gba ti ma foko kan nonko.' " ²⁰ Shwijii in tewi ya, "An-shubet, ween shurme te ding ne fuwaa-po joorani ye tida ne ta ya laano." ²¹ Yeesho in dira shii ka gee lewan. Shii in tewon ti shwijii, "Ka we dok ye ke kan tem. Yikka ti gbare-do ken piplon ka wee ke kan te ding kan ken mibinna ti me an kenni, kan ken ta yooko kan birma ti ku-dang. Nang ken waru ken yiru biino." ²² Pene ka longku yaan paaro te shwiji shurme in dungyo dooni kan in kooni won ka gbanan-ta-gongo, longku shii kan birma gbe. ²³ Yeesho in gee jelen-gongoni kan in tewi ti me an yiu-shubetni ya, "Ta yooro shilib ti shik me an birma shinui in ri ta gubno Yamma!" ²⁴ Me an yiu-shubeti in ya maam ka pa-paaronii. Pene Yeesho in tewon ti shinui birang ya, "Me an jeereno, ta yooro shilib ka ri ta gubno Yamma! ²⁵ Ta yooro maj-maj penwe in ri ta jwal yiri kan ye mo an birma in ri ta gubno Yamma." ²⁶ Shinui in ya gbong maam kan in tewi ti shaayi ya, "Nang wo nong ta kauranii?" ²⁷ Nang Yeesho in dira shinui in tewi ya, "Ti piree kan memme a ta dum yoorom, pene a kaa te ti piree Yammam." ²⁸ Biiturush in sha-toom ka yuun paaro ti shii ya, "Gee, min wesshina koo wen minun yirumu biiko." ²⁹ Yeesho in tewi ya, "Kulli ne ta teuma, adoo mo wesshina minani koo molli koo molani koo nonni koo foni koo shibani koo bukni ka longkuuno kan paaro Yamma ³⁰ ye shii a ta yiu shig-dok sho gbe wendei ti ku-buk tem: mina-mina kan ma molon men shwiji kan men shereb kan noni kan shiba kan buk, kan kunne ti piree kan memme, kan ti ku-buk ye ta waru, tenei kereng po ding. ³¹ Pene gbe me ka toom ta yooju an-gbattokrok, kan me an-gbattokrok ta yooju me an toom." ³² Shinui ti ku koko ammo Urshaliima, kan ye ti toojui. Me an yiu-shubeti in ya maam, kan me shinui ti ku waru ti bi yuwaa shewo. Nang Yeesho ye me shin kpumu gee-palawi ti jele birang kan in yiu tewo ti shinui wee ta yooro peeb ti shikni. ³³ "Ma gee, kama ta ammo Urshaliima, kan ta min La Niyo ti mon gba me ankpaa kan me an-shubet shoro. Shinui ta kar kemmo muro kan in min shii ti mei Yawudaawam. ³⁴ Shinui ta nwinnyo-foknii, fisshan elet ti shiknii, bir shiik kan in tuk shii. Pene ka bi shaklo tata shii ta illani." ³⁵ Ma Yakuubu kan Yuwaana shibano Jabadi, in amru shiknii in tewi ta shinui ya, "An-shubrt, min leka ken yuumu wee min bennganken." ³⁶ Shii in lignon ti shinui ya, "Ma lekai wen nen ya ka longkuumai?" ³⁷ Shinui in liginna ya, "Kummu piri minun deemu ka shaayi kan ke ti ta shokranko, dok ti ku-kira temmeko kan dok ti ku-kira jiyauko." ³⁸ Pene Yeesho in lignon ti shinui ya, "Mai pene wee ma po benganim, ma ta dum she la-temme ye ne ta dum shayani koo shassho yulma ye ne ta yaanii ya?" ³⁹ Shinui in lignon ti shii ya, "Min ta dumani." Yeesho in tewon ti shinui ya, "La-temme ye ne ta sheyani, kan yulma ye ne ta yaani, ma sheema ta yuuma. ⁴⁰ Pene mo ta diyani ti ku-kira temmeno koo ku-kira jiyauno a ne ye ta minanim, pene tei longku me limmaan ti shinui." ⁴¹ Pene dogi me an yiu-shubet shin kpumui maa ti yaaro guni, shinui in yiu ya den kan ma Yaakubu kan Yuwaana. ⁴² Yeesho in ye shinui ti do shaayi kan in tewon ya, "Ma penaa me shinui sharaa yaa me an-toom mei Yawudaawm tappaajui, kan me an toomju sheeju ti ya gub ti ku memmei ka kumen kping. ⁴³ Pene a ta yooro kaa te ti shakki mam. Mo leka in yooni mon gba ti shakki ma yikka ti gbare-do ta yooni an-shuran ma, ⁴⁴ kan mo leka yooni an-toom ti shakki ma yikka ti gbare-do in yooni shook me ding. ⁴⁵ Longku La Niyo a warui kulang in waunim, pene in wawi, kan in min kerangni ka we paaro-ku memme gbe." ⁴⁶ Shinui in waru Jeeriko. Kaa ye shii ta wessho jeeriko kan me an yiu-shubetni nang ka gbong jima, ka an-fugum shommonii Batalamaaweush an bengo, shii laano Timotaawush, deeni ti jele koko. ⁴⁷ Koddi ye shii yaaraa yaa Yeesho niyo Naajeret, in yiu shoppo yallo in ti tewi ya, "Yeesho, Laano Dauda, kunngono!" ⁴⁸ Memme gbe in pekro shii mo yu yititi. Pene shii in shuun-toom ka yalloi ya, "Laano Dauda, kunngono!" ⁴⁹ Yeesho in shereni in ya paaro ya mo yeeru shii mo waru wono. Shinui in yeeru an-fugumi in ti tewi ya, "Yu bang-vurum! Illo shikko! Yeesho ti ku yeeko." ⁵⁰ Shii in ving la-biro mereni, in illiru-jura, in waru shikno Yeesho. ⁵¹ Yeesho in lignon ti shii in tewi ya, "Ke leka nen ya wen ka longkuukoi?" An-fugumi in liginna ya, "An-shubet, Ne leka nen yiu weyani." ⁵² Nang Yeesho in tewon ti shii ya, "Koo. Lishaariko tasshaako." Kpantidi shii in yiu weyani birang, nang shii in yiwani biino Yeesho ti ku kokoi.