¹ Wende kaa ye shinui foonna Urshaliima, shinui yuuna nimmi kan Betapaaji kan Betannya ti ku Sheela Jaitun, nang Yeesho in shur palau ti shakki me an yiu-shubetni ² kan in tewon ti shinui ya, "Koo ma ri tarang meno-minai ye ti toommu kama. Kpantidi mam maa riyaa, ma ta we la-girbi yei nau ammo kwim. Man piddiru man warin nen. ³ Ma mondok maa telaa ma ya 'Longku wen ye ma ta yaani kaa tei?, ma ta tewon maa, 'Fo-mna leka tei kan ta meerin piri peeb.' " ⁴ Shinui in kooju in wa we la-girbii tooi ti po-dang gbong koko ri tarang gok-minai, nang shinui in piddina. ⁵ Peddi memme shengrii ti po teere nang in tel shinui ya, "Ma ti ku ya wen, ma ti ku piddo la-girbi teere ya?" ⁶ Me an yiu-shubeti in yuun paaro ti shinui kaa ye Yeesho tennanjun, kan memmei in wessho shinui in kooju. ⁷ Shinui in waru ka la-girbii ti Yeesho nang shinui in lippan Lanna kawoju ti ta bi, nang shii in deen nin ti kwi. ⁸ Memme gbe in wejiyon lannaju ti Ku kokoi, kan peddi in wejiyon sheeju alau Biro ye shinui keyyina ti dan-doong. ⁹ Me kookan ti toomnii kan me ti bi in ti shoppo foki ya, "Shokrani! Kpangii sheeno mo ta waru ti ta shommono Fo-mina. ¹⁰ Kpangii gubno fomu Dauda ye ta waru! Shokrani ti ku-dang back!" ¹¹ Nang Yeesho in ti Urshaliima kan wanni ta Mina Yamma many in gejiyo shii koo wen. Wende koddii kuugaro, shii in wanni Betaani kan me kpumu gee-palawi. ¹² Pirbang shinui ti Ku perani ti Betaani, ta aanii daklaaro. ¹³ Shii in we Biro dugni tali ye kan alau gbe ti taaro, shii in wanni ka we geyani koo shii ta waan shiili ti tai, kan koddi ye shii shiki, shii in a waan we ti tai bara alau, longku shii a koddi shiili dugnim. ¹⁴ Shii in ya paaro ya, "Adoo niyo ta sha shiili ti taaji birangum." nang me an yiu-shubetnii in yaarra. ¹⁵ Shinui in waru Urshaliima, nang shii in ri ta mina Yamma kan in yiu kajiyo bi me an pilin kan pilani ti ta mina Yammai. Shii in ramyo bi dangla me an paaro ku-kine kan juk po diya me ti piplo-we ka bagri. ¹⁶ Shii a kumu ti koo nong in shar koo we ti ta mina Yamma ye ta pilin-wem ¹⁷ Shii in tewo ti shinui ya, "Ballii ya, 'Minano ta yeyanii ka mina po fur-fok ka longku ta piri ding maa'? Pene man shiwan ten vuluk me an-jiri." ¹⁸ Mongba me ankpaa kan me an-shubet ti ta shoro shinui in yaaro wee shii teka, nang shinui in gassho koko ye po tukin shii. Longku shinui shiyaa shii longku gbe jimai yuwaa maam ka shubetni. ¹⁹ Koddi ye kiryippa yuwaaro, shinui in wessho tarang gok-minai. ²⁰ Kaa ye shinui ti ku kowani ka shaat, shinui in we shik biro dugnii isshaaro ar kan shoorini. ²¹ Biiturush in nyimmina in tewi ya, "An-shubet, Gee! Biro dugnii ye shaamaai isshaaro." ²² Yeesho in lignon ti shinui ya, "Ma lishaari kan Yamma. ²³ Yen kulli ne ta teuma na maa ka mo ta tewani ti sheela te, 'Illaji shin wa sheeweji ti ta paali-doo,' kan ma poshaarinii maa yu shorum pene liyaa shaari ya wee shii teka ta yooro, teerei wee Yamma ta yaani. ²⁴ Longkuuno te ne ta teuma: Wee ding ma ta fur-fok kan bengani, ma lishaari ma ta yiwani, kan ta yooro weema. ²⁵ Maa koddi ye ma ta fur-fok, yikka ti gbare-do man fuddo wee ma kan te ti piree kan koo nong, longku Foma mo ti ku-dang shii ta fuddo ma sheema shasshalawi." ²⁶ [Pene mam maa foddom, Foma sheeni ye ti ku-dang a ta foddo ma shasshalau mam]. ²⁷ Shinui in waru Urshaliima birang. Kaa ye Yeesho ti ku merko ta mina Yammai, mongba me ankpaa kan me an-shubet ti ta shoro, kan men gbidina in waru shiknii. ²⁸ Shinui in tel shii ya, "Wo ka kumenno nong ye ke ti yuun we te, kan wo nong ye minnako kumen ka we ya shinui?" ²⁹ Yeesho in lignon ti shinui ya, "Ne ta tel ma ka telyo dok. Ma teuno kan ne ta teuma ka kumen shire ye ne ti yuyyon ween shurme te. ³⁰ Yulmano Yuwaana, shaanai ti ku-dang ya koo ti piree kan memme? Ma lignano." ³¹ Shinui in deppina ti shakkiju kan jimro kan in tewi ya, "Kama maa teka, 'Ti ku-dang,' shii ta tewani ya, 'Longku wen ye mai liin shaari kan shiimmi?' ³² Pene ma kama maa teka, 'Ti piree kan memme teere a ta ya kpangum,' Shinui ti ku shi memme, longku koo nong kunnga ya Yuwaanai an-pigra. ³³ Nang shinui in liginna ti Yeesho ya, "Minui penom." Nang Yeesho in tewon ti shinui ya, "Ne sheeno ne ta teuma ka kumen shire ye ne ti yuyyon ween shurme tem."