¹ Nang Yeesho in sha toom ƙa shʊppɔ shinui ƙa tɛmɔ, Shĩĩ ĩn tewi ya, "Mannĩ niyoi tɔɓɓa dɔɔng inɑɑbini, ĩn ƙɔllɔ fɔƙĩ, ĩn ɔppɔ ta jwal pɔ ƙpaĩ dɔɔ inɑɑbii. Shĩĩ ĩn ɗig ganglangg pɔ ɗiyɑ an-gefen nang shĩĩ ĩn min dɔɔng inɑɑbii tĩ me an-gereni wɑnni pɔ jɛlɛl pɔ binɑ. ² Ɗɔb-ɗɔb ƙasshɔ weshiinɑ dɔɔngĩ, shĩĩ ĩn shɔɔƙ tĩ shik me an-gɛɛ dɔɔngĩ mɔ wa yĩnnĩ tĩ ta nii weshiinɑ dɔɔng inɑɑbii. ³ Pɛnɛ me an-gɛɛ dɔɔngĩ shinui ĩn yĩʊ shĩĩ yʊʊn tʊwa tĩ shiknii, shinui ĩn lĩ biinii ƙĩra waanĩ. ⁴ Ɓĩrang shĩĩ ĩn shʊr mannĩ la an-shʊranĩ, shinui ĩn yʊʊn tʊwa ĩn lĩyyɔn pĩra tĩ shik ƙwĩ shinui ĩn minin ɗʊʊlan-shik tĩ shiknii. ⁵ Ar wende ĩn shʊr mannĩ ɓĩrang, nang tenei shinui ĩn tʊƙĩ. Shinui ĩn yʊyyĩna tĩ peɗɗi ƙaa te, yʊyyɔ tʊwa tĩ peɗɗi ƙan ĩn tʊƙyɔ peɗɗi. ⁶ Shii ar wende kan manni niyo dok ye ta shurani, laani ye shii leka. Shii in shuri ka bi ding ya, 'Shinui ta min gba ti laano.' ⁷ Pene me an geren inaabi in tewi ti shaayi ya, 'Tenei la po-ganglangi. Ma waru, kama tuk shii, kan doong inaabi in yooro weemu kama.' ⁸ Shinui in tolloo shii, tuk shii kan in kpaalo shii won tali kan doong inaabii. ⁹ Longkuuno te, mo an ku doong inaabii ta ya wen? Shii ta waru in tukyo me an geren doong inaabii kan ta min doong inaabii ti peddi me an gereni dokro. ¹⁰ Mai nau maaro we te ti ta paaro Yamma maa? 'Shiila ye me an-diyee kuraa, Fo-mina shigan shiila shuglo mina. ¹¹ Tenei yaanno Fo-mina, kan minun nyimmina po geyanii we maam ti adoomu.' " ¹² Ka biino te men gbidina Yawudaawa in gassho koko po yiu Yeesho ka longku shinui penaa shii yuwaa shiwan-do paaroi ti shikju. Pene shinui in ti shi jimai. Longku kaa te shinui in wessho shii in kooni. ¹³ Nang shinui in shur peddi Parishaawa kan me an dau gunno Iriidush ti shiknii ka we jaklo shii ka pa-paaro. ¹⁴ Koddi ye shinui wanna, shinui in tewi ya, "An-shubet, min penaa ke ti turmina ka eleno mondokum, kan ke ti shuk kaali ti shakki memmem. Ke ti shuppinai ka kokono Yamma yen kulli. Shoro kunnga ya mo anngo kine-buk ti Keeshar ya koo onngoo? Mo min anngo ya koo onngoo?" ¹⁵ Pene Yeesho penaa a kulli ye shinui leka ya wee Yamma leka shinui in yam, nang in tewon ti shinui ya, "Longku wen ma ti ku naunoi? Ma warino ka dinaari longku nen gee shiki." ¹⁶ Shinui in waru ka dok ti Yeesho. Nang shii in tel shinui ya, "sheyyei kuuno nong? Kan wo shommono nong? " Shinui in liginna , " Keeshar" ¹⁷ Nang Yeesho in tewon ti shinui, "Ma min ti Keeshar wee weeno Keeshar kan ti Yamma wee weeno Yamma." Nang shinui in ya maamnii. ¹⁸ Nang shadukiyaawa, me teka yaa a doo ilit ta duwam, in waru shikno Yeesho ka telyo ya, ¹⁹ "An-shubet, Muuja ballamu ya mollo mondok maa murooni in wessho paamun, pene a doo shibom, molli ta dig paamun-koloi kulang in waan shibo ti molli. ²⁰ Ka me molon shaayi shin parilau. Mo dok yuwaa diyaa in muroni, a wessho lam. ²¹ An palawi in dig paamun koloi, pene shi sheeni in muroni, a wessho lam. Mo an tati sheeni maa kaa teerei. ²² An parilawi a wessho lam. Ti wiilan ding, paamuni in muroro sheero. ²³ Ti ta ilit ta duwo, tei ta yooroi manna nong, Kaa ye shin parilawii digyaa tei?" ²⁴ Yeesho in liginna ya, "Duma tenei ye liyaa ma man sheki maa, longku mai peno paaro Yamma koo kumennim maa? ²⁵ Me kumai maa illaa, shinui a ta ya diyaam yei diginum, shinui ta yooju kaa me an shuranno Yamma ti ku-dang. ²⁶ Pene ti ku paaro me murooju me illaa, mai maaro ti ta takardano Muuja, ti ku kuran duk-duk, ye Yamma tekan ti shii ya, "Nei Yammano Ibiraayim, Yammano Ishaako, kan Yammano Yaakubu maa? ²⁷ Shii Yamma me kumaim, penei we me kan dwei. Mam maa teka maa me muttaaju a ta illani birangum, Ma sheka gbe" ²⁸ Dok ti shakki me an-shubet ta shoro in waru, in wa we shinui ti ku ya jiram. Penaa Yeesho lignaan ti shinui kpang, shii in tel Yeesho. "Ti shakki shoro ding, ye yeka gbai shire?" ²⁹ Yeesho in liginna ya, "Yen gbei lee, 'Ma yaaro, ta memme Ishereila, Fo-mina Yammamu kama, Fo-mina shi dokni. ³⁰ Lewo Fo-mina Yammako ka poshaariko ding, kan nyimmoko ding, kan bangko ding. ³¹ An palawii lee, " Lewo an ganglangko kaa ye ke lekan kuuko. A doo manni shoroi ye yeka meen shurme gbam. ³² Shwijii in liginnan, " An-shubet" Ke teka ye ka Yamma dok kan a doo mannim pene jalli. ³³ Ken leu shii ka poshaariko ding, kan penanko ding kan bangko ding, kan ken leu an ganglangko kaa kuuko, ye tei yeka kur ding-ta-kira kan der dom gbe." ³⁴ Bara ye Yeesho weyaa shii liginaa ka shen, shii in tewon ti muyei, "Kei tali kan gubno Yammam." Nang we yikka koddi te, a doo niyo dok ye telaa shii ka telyo birangum. ³⁵ Kaa ye Yeesho ti ku ya shubet ti kudam ta mina Yamma, shii in ya telyo, "Ka yee me an-shubet ta shorono Muuja ta tewani ya kiritii laano Daudai? ³⁶ Dauda po kuuni, teka ti ta shoom ya, Fo-mina teka ti Fo-minano, "Deeko ti ku kira temmeno we war koddi ye ne ta li me an ³⁷ geiko in yooju po-shooko." Dauda po kuuni yeyaa shii ka, 'Fo-mina,' Oo, ka yee pene kiriti ta yooni la ti piree kan shii?" Galan jimoi in kaan kumoju ti shiknii ka beere. ³⁸ Kaa ye shii ti ku shuppon, Yeesho in tewi ya, " Ma jooro me an-shubet shoro. Shinui leka in ti shali kan lannan jodiri ti shikju kan in ti yuuju kaa ti po piplo-we, ³⁹ kan in ti deeju ti ku we po-diyo yen kpang ding ti ta mina for-fok kan po-diyo min gba ti po temre. ⁴⁰ Shinui in wiilo we kira shereb-kolo kan in shuki ka joori for-fok. Peen shwiji shurme te Yamma ta minin kelmo ti shinui kping." ⁴¹ Nang Yeesho in deeni ti ta mina Yamma adwei shiwii ti po min ding ta kira in ti gee jimai ti ku ganglo kineju ti ta gurang ta mina Yamma. Gbe me an jikko in ti ukkon kine gbe ta gurangi. ⁴² Pene paamun kolo an kenni in waru in galin ar kine eemro palau, ye fooraa tuulan ta kine dok. ⁴³ Nang Yeesho in ye me an yiu-shubetni in tewon ti shinui ya, "Ne ta teuma yen kulli, paamun-kolo ye galaa kine gbe ti gurang gal-we, ye yeka sheeno koo nong. ⁴⁴ Shinui ding minaai ti ta birmaju, pene tei, ti ta kenniro, minaa koo wen, ding wee tei po keen kerangro."