¹ Kaa ye Yeesho ti ku wessho ta mina Yammai, dok ti shakki me an yiu-shubetni in tewon ti shii ya, "An-shubet, gee kpattirin shiila kan ililo digyan mina shurme te!" ² Yeesho in tewon ti shii ya, "Ke ti we shik gbidina digyan mina shurme te ya? A doo dok ye ta wesshani ti kuuno shatto yei ta shiwa shikin." ³ Kaa ye shii diyaani ti ku sheela Jaitun shiwan dwei ti shik mina Yamma, Biiturush kan Yaakubu kan Yuwaana kan Andaraawush in tel Yeesho ku jalju ya, ⁴ "Teumu, wo diminee ye ween shurme te ta yoojui? Kan temoi ta yooroi ka yee, ya wei nennga kemroroi?" ⁵ Yeesho in li gun tewon ti shinui ya, "Ma jooro mo mondok dokko mam. ⁶ Memme gbe ta waru ti ta shommono kan in ti tewi ya, 'Nei Kiriti.' kan shinui ta dokko memme gbe. ⁷ Koddi ye ma yaaraa pi gei kan shinnyi gei, mo ma turmo mam, ween shurme te yikka ti gbare-do in yooju, pene wiila tidai foottum. ⁸ Longku buk ta illo shabbi kan buk, kan po ya-gub ta illo shabbi kan po ya-gub. Ta yuyyo mirid buk ti piri gbe kan kpiyam yen shilib. Ween shurme te ta yooju kaa shilib ye ka toom ye paamun ta yaarani koddi ye tei tannga patto la. ⁹ "Ma shere ma shwei. Shinui ta min ma ti me katiran me an-toom, kan yuyyo ma biro-biro ti ta mina-mina fur-fok. Ma ta shengrani ti toom me an-toom kan me an-gub ka longkuuno, kan we jimro ti shinui. ¹⁰ Pene ta ya kaawi paarono Yamma ka toom ti me ti ku-buk ding. ¹¹ Koddi ye shinui yippaa ma in mibno ma, mo ma turmo ti ku wee ma ta tewanim. Longku ti ta koddi teere, wee ma po tewani ta min ma; a ta yooroi ma ye ta ya paaroim, penei Shoom Yen Shaana. ¹² Moli ta liyani an moli in muri, kan an fowi ti laani. Shiba ta illo shabbi kan me an-pariju kan in li shinui in waan kaara muro. ¹³ Koo nong ta kurama ka longku shommono. Pene maa mo shasshaa we war wiilani, niyo teere ta kauroni. ¹⁴ "Koddi ye ma weyaa shik we kunne ye ta daklo ween kpangno Yamma shengrii ti pirii a nennom," (shero mo mo an-maari peno) "Shero mo me ti Yawuudiya juwaju we ammo ku sheela, ¹⁵ shero mo ti ku daalan-ku mina tewo ya shi ta shaarui shar-we ti ta minaim, ¹⁶ kan shero mo shii ti doong tewo ya shi ta shirui shar lanna kawonim. ¹⁷ Pene dogii she me kan uu kan me ti ku min weri ti dum ti ta darang teere! ¹⁸ Ma fur-fok yoo yoba ma yooro ka viyo. ¹⁹ Longku shurme ta yooju darang taa-shilib kping, kaa ye a nau yaani ti liyan gun, koddi ye Yamma yuunan ku-buk we foottu booi, kan a ta yaani birangum. ²⁰ Modaa kuma ye Fo-mina kuuga peddi shaklo tem, daa koo niyo dok ye ta tuulanim. Pene ka longku me shakkaa, shii in kuwa peddi darangi dwakra. ²¹ Nang ma mondok maa teka ma ya, 'Gee, Kiriti wono!, koo gee, shii won!' Mo ma kumum. ²² Longku me an-shaba Kiriti kan me an-shaba pigra ta pipittu kan ta yuyyo we temo kan maam longku in shalin-do, koo modaa, me shakkaai. ²³ Ma sheroma ka geren! Ne sheeraa ma ween shurme ye ti tida koddii yum. ²⁴ Pene ka bi taan shilib shaklo shurme, 'Darang ta yooro dil, tere a ta shallanim, ²⁵ ar-shal ta shugiyyu ti ku-dang, kan kumen me shinui ti ku-dang ta midiro shikjui; ²⁶ Nang shinui ta we shik La Niyo ti ku waru ti ta shungu kan gbong kumen kan shokran. ²⁷ Nang shii ta shuru me an-shuranni kan shinui ta ganglo-do me shii shakkaa ti kudo-kudo ku-buk peereu, we yikka ti kpakan-fok buk we war kpakan-fok ku-dang. ²⁸ Ma shar shubet ti piree kan biro dugni. Kpantidi ma ku-fungai maa yikka yooro-alau kan shiki buk alawi in yiu moottu, ma peno koddi sha-buk nemna. ²⁹ Longku kaa te, koddi ye ma weyaa shik ween shurme ti ku yooro, ma peno La Niyo nemna, nimmi kan po-dangi. ³⁰ Kulli ne ta teuma, ku-kira te a ta muttoju dingum, we te maa yoorom. ³¹ Ku-dang kan ku-buk ta kooju, pene paarono a ta dum kowanim. ³² Pene ti ku paaro ye kan darang teere koo koddii, a doo mo penaam, modaa me an-shuran ku-dangii koo Lai, pene bara Fowii. ³³ Ma yu diya geren! Man ya jooro kan fur-fok, longku mai peno koddii ye ween shurme te ta yuunum. ³⁴ Dob-dob kaa niyo ye ta ya mere, shii ta wessho minani kan in li shiba me an-shuranni ti ku minani, koo nong kan shuranni, kan shii ta pekro shwiji mo an-gereni mo jooro. ³⁵ Longkuuno te, ma yu geren longku mai peno koddi ye fo-mina ta meerin minam; ta dum yooro ka kiryippa, ka non-ku-yippa, koddi kwii fwee, koo ka shaat. ³⁶ Ma shii maa dawilla meeru, mo ma kumu in wa weema ti ku shaklom. ³⁷ Wee ne teka ma ne teka ti koo nong: Ma yu geren!"