¹ Wende dogi shaklo palau in ya temre teelani kan temre jong we-ta-kele. Men gbidina me ankpaa kan me an-shubet shoro ti ku nyimmo ye shinui ta yiwin Yeesho kan in tuk shii a kan penan memmem. ² Longku shinui ti ku tewani ya, "A koddi temrem, longku a ta yoo we shabbi ti shakki memmem. ³ Koddi ye Yeesho ti Betaani ye ti ta minano Shimon mo an-pira lakat, kaa ye shii teeka ta biinii ti ku dangla sha-weshiina, manni paamuni in riiru kan okro turaali yen kparkidak, ye limmaa ka naar. Tei in au-fok naati ti kuunii. ⁴ Pene ti po teerei ka peddi me ta gongoju gbanaaro. Shinui in yiu shedirani ti shakkiju ya, "Longku wenee ti ku daklo we tei? ⁵ Turaali te daa pilaan-we ti ku kine ye yeka dinaari shig tat, kan daa minaa kinei ti me an-kenni." Nang shinui in pekro tei ka den. ⁶ Pene Yeesho in tewi ya, "Ma wessho tei waani. Longku wen ye ma leka turmo tei? Tei yuwaa ween kpang ka longkuuno. ⁷ Ma kan me an-kennii ka shaayi kpaaliya ding, kan koo dimin mam maa geeka ma ta yuun ween kpang ti shinui, pene a koo dimin ye ma ta weenom. ⁸ Tei yuwaa wee ta dum yaani ta tei. Tei sheenaa lo-shikno ka longku nanani. ⁹ Kulli ne ta teuma, koo ta kpaalo fok shinnyi yen tomon tei dimin ti ku-buki, wee paamun sheere yuwaa ta sheero piri, ka we nyimmani kan te." ¹⁰ Nang Yawuda Ishkarooti, dokei shakki kpumu gee-palawi, in kooni in wanni ti mongba me ankpaa kulang shii in minin shii ti shinui. ¹¹ Koddi ye men gbidina me ankpaai yaaraa, shinui in ya beere kan shinui in deewoku ta minin kine ti shii. Shii in yiu gassho koddi ye po minin shii ti shinui. ¹² Darang an dok ti ku temre jong we-ta-kele, koddi ye shinui deraa dum la-galma, me an yiu-shubetnii in tewin ti shii ya, "Ke leka minun war tong minun wa limmina, ka longku ken shuun weshiina temre teelanii?" ¹³ Shii in shur palau ti shakki me an yiu-shubetni kan in tewon ti shinui ya, "Ma war tarang gok-mina, kan ma ta kpomani kan manni shwijii sharii kan diye doo ma yiu biinii. ¹⁴ Mina ye shii wa riyaa tai, ma riin ti bi man tewon ti an ku-minai maa, 'An-shubet tenna ya, "Gume po dur binoi tong ye ne ta shuun weshiina temre teelani kan me an yiu-shubetnoi? ¹⁵ Shii ta shuk ma manni gba ta gume mina ku-dang ye fuwaa po limmani tai. Man limmiru ti kuumu kama ti po teere." ¹⁶ Me an yiu shubeti in wanna we war tarang gok-minai. Shinui in wa we wei kaa ye shii tennan ti shinui, nang shinui in limmirin weshiina temre teeelani. ¹⁷ Koodi ye kiryippa yuwaa, shii in waru kan kpumu gee-palawi. ¹⁸ Kaa ye shinui diin ti ku dangla kan ti ku shaani, Yeesho in tewi ya, "Kulli ne ta teuma, dok ti shakki ma mo ti ku shaani ka shaayi kan ne ta waraa pilin ka ne." ¹⁹ Shin ding in yiu bau kenni kping, ka dok-dok shinui in yiu tebyon ti shii ya, "kulli a ne ye ta waraa pilin ka kem maa?" ²⁰ Yeesho in liginna in tewon ti shinui ya, "Shii dok ti shakki kpumu gee-palawi, mo wende kirani kan sheeno ti ku kpomin ti ta gurang we-ta-kelei. ²¹ Longku La Niyo in kooni kaa ye ballaan ti kuunii. Pene dogii she shwiji teere ye ti piree kan shi ye ta pilin ka La Niyo! Nennaa daa yuwaa kpang ti shii ye daa paato shiim." ²² Kaa ye shinui ti shaani, Yeesho in shar we-takele, in liin kpang ti kwi, in beblo tai. Shii in bwairon ti shinui ya, "Ma shu lee. Tenei lo-shikno." ²³ Shii in shar la-temme, in pammina, nang in minin ti shinui, kan shinui shin ding in sheyyon ti tai. ²⁴ Shii in tewon ti shinui ya, "Tenei domno we deewanku, dom ye deraa ka longku memme gbe. ²⁵ Kulli ne ta teuma, Ne ta sheyani ti ta doo shiili inaabi birangum we war darang teere ye ne ta shoon yen fo ti ta gubno Yamma." ²⁶ Koddi ye shinui yuwaan vonak, shinui in kooju ammo ku sheela Jaitun. ²⁷ Yeesho in tewon ti shinui ya, "Ma ding ma ta shugyani, longku ballii ya, 'Ne ta bir an-tii kan ta dinnyii ta lekreju.' ²⁸ Pene ka bi ye ne illaano, Ne ta beema war Galiili." ²⁹ Biiturush in tewon ti shii ya, "Moda dogi ding daa ta shugyanii, ne ta shuwanim." ³⁰ Yeesho in tewon ti shii ya, "Kulli ne ta teuko, booi oo, toom-toom ka yippa tei, gok maa ta waraa ya kwi sho palau, ke ta ya jiramno sho tat ka kei pennom." ³¹ Pene Biiturush in liginna ya, "Koo ne daa ta waraa murani kan kei, ne ta ya jiramkom." Shin ding in yuyyo peen deewanku te. ³² Shinui in waru manni pirii ye ti ye yaa Geeshamaani, nang Yeesho in tewi ti me an yiu-shubetni ya, "Ma deema wono man dangin kuuno Ne wa fur-fok." ³³ Shii in ye ma Biiturush kan Yaakubu kan Yuwaana kan in yiu bau kenni kan turmo kping. ³⁴ Shii in tewon ti shinui ya, "Shoomno yuwaa marak ti ta aano kaa we war mina-muro. Ma deema ti po te man ya geren." ³⁵ Shii in geyani la tali, Yeesho in juunani kan tuumon kuuni ti buk in fur-fok ya maa yikka ti gbare-do ye ya we te ta yooro ti piree kan shi. ³⁶ Shii in tewi ya, "Abba, Fowi, we ding ti piree kan ke ta dum yooro. Shokro la-temme te ti piree kan ne. Pene a lewannom, penei sheeko lewani." ³⁷ Shii in meere in wa we shinui ti ku ya shaklo, kan shii in tewi ti Biiturush ya, "Shimon, ke ti ku ya shaklo ya? Ke ta dum ya geren po koddi dok maa? ³⁸ Yu geren kan fur-fok ye ke ta shuwani ti ta nawom. Shoom leka, pene lo-shiki bukani." ³⁹ Birang shii in kooni in wa fur-fok, kan shii in matto bi paaronii. ⁴⁰ Koddi ye shii meena birang, shii in wari we shinui ti ku ya shaklo, longku shaklo yuwaa tira ti adoojui. Shinui peno wee shin po tewon ti shiim. ⁴¹ Shii in meeru ti ku an-tati kan in tewon ti shinui ya, "Ar wende ma bambiri ti ku ya shaklo kan nesshani ya? Keraa! Koddii foonna. Ma gee! Fuwaa po min La Niyo ti ta kira me an shasshalau. ⁴² Ma illo; kama koo. Ma gee, mo ta minnoi nemna." ⁴³ Ye tida shii ti ku ya paaro, Yawuda, dok ti shakki kpumu gee-palawi, in foottu, kan gbong jima ka shaayi kan shii shaddii kan agarum kan biro biro-biro, shunna shinui ta ma mongba me ankpaa, me an-shubet ta shoro kan me an-toom. ⁴⁴ Wende mo an min shii shuka temo ti shinui ta shii ya, "Mo ne ta taamani teerei shii. Man tollo shii man koon kan jooro yen kpang." ⁴⁵ Koddi ye Yawuda foonna, kpantidi shii in amru shikno Yeesho in tewi ya, "An-shubet," nang shii in taamo Yeesho. ⁴⁶ Nang shinui in yiu Yeesho in tollo shii. ⁴⁷ Pene dok ti shakkijui mo sherii nimmi in kpaattu agarumni in kaan shook mongba ankpaai ar in for kumoi fwab. ⁴⁸ Yeesho in tewon ti shinui ya, "Ma pepinna, kaa ma ta waraanii ku mo an-jiri, ka agarum kan biro biro-biro ka we yiuno ya? ⁴⁹ Koddi ye ne kpaaliya ding ne ka shaayi kan ma nen ti shuppina ti ta mina Yamma, mai yiunom. Pene tenei yuwaaro kulang in kemro paaro Yamma." ⁵⁰ Me an yiu-shubet me ka shaayi kan Yeesho shin ding in jubyaju yoba in wessho shii. ⁵¹ Ka manni la-kparini dawii kan lanna ye malliin ti shiki ti ku yiu biino Yeesho. Koddi ye memme tollaa shii ⁵² shii in wessho lanna dawoi in juwani yoba gun vure. ⁵³ Shinui in warin Yeesho toom mongba ankpaa. Ti po teerei me ankpaa shin ding galii ti jelenii, kan me an-toom, kan me an-shubet shoro ⁵⁴ Biiturush in koon in yiu bi shakkiju la tali, we war kudam po shiire mongba ankpaa. Shii in deeni dii ka shaayi kan me an-gereni, me ti jele deet in yiu wowwon shikni. ⁵⁵ Wende mongba me ankpaa kan me an galo Yawudaawa ding shinui in yiu gassho jimro ti kuuno Yeesho longku shinui in tuk shii. Pene shinui a wa koo dokum. ⁵⁶ Longku gbeju wanginna ka jimro shaba ti kuunii, pene koo nodaa jimrojuii fokjui a waru dokum. ⁵⁷ Peddi in illina in wangiitu ka jiram shaba ti kuunii; shinui in ti tewi ya, ⁵⁸ "Min yaaraa shii ti ku tewani ya, 'Ne ta vubro mina Yamma te ye diga ka kira, kan ti ta shaklo tat ne ta dig manni yei digui ka kiram.' " ⁵⁹ Ar wende jimroi a waro dokum. ⁶⁰ Mongba me ankpaai in illo shikni ti shakkijui in tel Yeesho ya, "Ke kan wee po lignani maa? Kaa yaa ti ku wee shwiji me ti ku jimrani ti kuukoi?" ⁶¹ Pene shii a awin fokum kan a ligno wem. Mongba me ankpaa birang in tel shii ya, "Kei Kiriti, Laano Yamma ya?" ⁶² Yeesho in liginna ya, "Oo wo nei; kan ma ta we shik La Niyo koddi ye shii maa diyaa ti ku-kira temme kumen we shokrani kan in ti shaaru ti ta shunngu ku-dang." ⁶³ Mongba me snkpaai in jaaro lannani in tewi ya, "Kama bambiri ti ku gassho jimro birang ya? ⁶⁴ Ma fuwaa po yaarao we bek ye shii sheeraa. Nyimmoma wendei wen?" Shinui ding in sher ku paaroi ya shii nennaa muro. ⁶⁵ Peddi in yiu fisshon elet ti shiknii kan in ti nummo adoonii ti padilo shii kan in ti tewi ya, "Yu pigra! Paalaako nong?" Me an geren Ku mina mo an-toom in yiu shii in yuun biro-biro ti shii. ⁶⁶ Koddi ye Biiturush ti ta gun kudan po shiirei, dok ti shakki shiba-shereb me an shuran mongba me ankpaa in waru shiknii. ⁶⁷ Tei in we shikno Biiturush ti ku wowwo shikni, nang tei in dira shii ka nimmi kan in tewi ta tei ya, "Ke sheeko ke ka shaayi kan Yeesho niyo Naajeret." ⁶⁸ Pene shii in ya jiram in ti tewi ya, "Ne po kuuno nei peno wee shi ti ku tewanim." Nang shii in pereni ta appalau minai. ⁶⁹ Pene la-paamun shurani in we shiknii in yiu tewani birang ti me shengrii ti po teerei ya, "Shwiji moi dok ti shakki me an yiu-shubetno Yeesho!" ⁷⁰ Pene Biiturush in ya jiram birang. Ka bi la-wiiu me shengrii ti po teerei ni yiu tebyani ti Biiturush ya, "Kulli kei dok ti shakkiju, longku ke sheekoi kei niyo Galiili." ⁷¹ Pene shii in yiu shaamo kuuni ka pammi ya, "Nei peno niyo ye ma ti ku yuun paaro ti kwiim." ⁷² Kpantidi gok in ya kwii an-palawi. Nang Biiturush in nyimmo paaro ye Yeesho tennani: Ma gok maa ta ya kwii sho palau, ke ta ya jiramno sho tat ka kei pennom," kan shii a dum yiu poshaarinim nang in gboloni kwii ka muru.