¹ Pirbang kan vubnai, mongba me ankpaai in kpomi ka shaayi shin kama me an-toom kan me an-shubet shoro kan foduk fok Yawudaawa me an deewo shik paaro. Nang shinui in kpakko Yeesho in koo ka shii. Shinui in wa min shii ti Bilaatush. ² Bilaatush in tel shii ya, "Kei Gub Yawudaawa ya?" Yeesho in lignon ti shii ya, "Ke teka." ³ Mongba me ankpaa ti ku nyoo shiknii ti ku we gbe. ⁴ Bilaatush in tel shii birang ya, "Ke ta lignani maa? Geeru gbe wee shinui ti ku kpaan ken ti kwi!" ⁵ Pene a ligno ti Bilaatush birangum, nang teerei in minin maam ti shii. ⁶ Wende tenei waari ti ta koddi temre, Bilaatush ti fora kira ka niyo dok mo ti ta mina muruk, mo an for-shuna ye shinui bennga, ⁷ kan ka manni shwijii shommonii Barabash ti ta mina muruk ye kpakkaa shii tuka niyo koddi shabbi. ⁸ Jimai in waru shikno Bilaatush kan in yiu tel shii mo yuuju kaa ye shii ti ya milam. ⁹ Bilaatush in lignon ti shinui ya, "Ma leka nen foran mam kira ka Gub Yawudaawa ya?" ¹⁰ Longku shii penaa minaa Yeesho ti ta kiranii ka longku nwisshi waani. ¹¹ Pene mongba me ankpaai in shuulo jimai mo shinui tewo mo foraju kira ka Barabash. ¹² Bilaatush in lignon ti shinui birang ya, "Pene ne ta ya wen ka Gub Yawudaawai?" ¹³ Shinui in yallina birang ya, "Sheewo shii!" ¹⁴ Bilaatush in tewon ti shinui ya, "Daklaai wen ta shii?" Pene shinui in yallina sho gbe ya, "Sheewo shii." ¹⁵ Bilaatush leka ya wee poshaari jimai leka, nang shii in foran kira ka Barabash ti shinui. Shii in bir shikno Yeesho nang in munin shii ti shinui ka we waraa sheewani. ¹⁶ Me an-bee-deet in riin shii kudam shiire (yei po diya ya gub), kan shinui in yeyyo bwattan ta me an bee deeti in gal-dooju. ¹⁷ Shinui in showin lanna ya gub ti shikno Yeesho, kan shinui in lau arat kaa we mallo-ku me an gub in dawin ti kuunii. ¹⁸ Shinui yiu yuun kaa ti ka shokro kira inti tewi ya, "Min kaakako ta Gub Yawudaawa!" ¹⁹ Shinui in ti gbobbo ta kuunii ka la-biro yiu kira yen gakal kan in ti fisshon elet ti shiknii. Shinui in juunaju ti ku vurumju kan in shaan buk ti toomnii. ²⁰ Ka bi ye shinui nwinnyaa foknii, shinui in for lanna yen joorii nang in showin bi lanna sheenii ti shiknii, kan nang in koon ka shii ka we waraa sheewani. ²¹ Ka nanni niyo shiraayin, shommonii Shimon, ti ku riiru tarang gok-minai (shii fono Elekjanda kan Rufush), kan shinui li shii ka bang in shar biro sheewo shii. ²² Me an bee deet in warin piree ti tewi yaa Golgoota (Ye ta shuklaa yaa piren "Gunglumg-ku"). ²³ Shinui in minin doo yen shwang ye lonngaa ka ka worin we kuwa shilib pira ye yaa muur, pene shii a shom. ²⁴ Shinui in sheeo shii kan bwatto lannanii ka ving kaari kulang in pen piranno ye koo an bee deet shire ye ta sharani. ²⁵ Dob-dob koddi ye shinui sheewan Yeesho pelle ka da-darang. ²⁶ Ti ku tannan we temoi, shinui in ballon kuwak ye shinui ti kpaan shii ya, "Gub Yawidaawa." ²⁷ Ka shaayi kan shii shinui in sheewon me an jiri palau, dok ti ku kira temme kan yen dok ti ku kira jiyau. ²⁹ Me an koo in ti yuun bek ti shii, shinui in ti yigro shik kuuju kan in ti tewi ya, "Ohoo! Ke ta vubro mina Yamma kan ken dig-bi ti shakki shaklo tat, ³⁰ kauro kuuko kan ken shaarin ken ti ku biro sheewoi!" ³¹ Kaa ye yuwaai mogba me ankpaa in nwinnyo foknii ka shaayi kan me an shoro ti ta shiire nang in tewi ya, "Shii maraa ku peddi, pene shii a rta dum mar kuunim. ³² Shero Kiriti, gub memme Ishereila, shaaru wende ti ku-biro sheewoi, kulang minun we shiki minun we shiki minun kumi." Me sheewaa shinui ka shaayi kan shii, kan in minin shilibi ti shii. ³³ Ka koddi shere darang, dil in nummo ta piri ar we war kettan darang. ³⁴ Ka kettan darang Yeesho in yallina ka ele yen bang ya, "Elooi, Elooi, lama shabaktaani?" ye ti shukilla yaa, "Yammano, Yammano, Longku wen ye fulaan nen bii?" ³⁵ Peddi me shengrii nimmi in yaaro paaronii kan in tewi ta shinui ya, "Ma gee, shii ti ku ye Ilya." ³⁶ Mondok in juwa yoba in wa shar fong in shou shiki ti ta doo inaabi yen shwang, in showi ti ku la-biro, kan in showin ti shii mo sho. Shwijii in tewi ya, "Shero kama gee koo Ilya ta shaarui duru shii ti buk." ³⁷ Nang Yeesho in yallina ka ele yen bang kan in muroni. ³⁸ Lanna kawo ta mina Yamma in jaaro taaro palau we yinnan ti tuu-kwi we shaaru tuu-guni. ³⁹ Koddi ye gbong mo an bee deet mo sherii shiwan dwei ti shikno Yeesho weyaa shii muraa kaa te, shii in tewi ya, "Kulli shwiji sheerei Laano Yamma." ⁴⁰ Birang ka shereb me ti po teere shereju tali in ti gee wee ta yooro. Ti shakkijui ka Maryamu Magadaaliya, kan Maryamu (nonno ma Yaakubu mon tob kan Jooshe) kan Shaloomi. ⁴¹ Koddi ye shii ti Galiili shinui yinna biinii in ti yuun shuran ti shii. Ka shereb gbe me shin sheeju amna ka shaayi kan shii ti Urshaliima. ⁴² Koddi ye kiryippa yuwaa, longkui Darang Limma ye pirbangii Darang Nessho Yawudaawa, ⁴³ Yushubu niyo Armatiya in waru po teere. Shii dok mo ti minin gba ti shakki me an-toom, mo ti ku dangku ya-gubno Yamma. Shii in war shikno Bilaatush ka bang-vurum kan tel pi kumano Yeesho. ⁴⁴ Bilaatush in ya maam ye yaaraa ya Yeesho fuwaa-po muroni; shii in ye gbong mo an bee deeti in tel shii ma Yeesho maa muroni. ⁴⁵ Koddi ye Bilaatush yaaraan ti fok mongba an bee deeti ya Yeesho fuwaa-po muroni, shii in min kumai ti Yushubu. ⁴⁶ Yushubu fuwaa-po pillu lanna yen yelek-yelek. Shii in duru kumai ti ku biro sheewoi, in mallon shiki ka lanna yen yelek-yeleki, kan in wa kanno kumanii ti ta duwa ye fuwaa-po yemmani ti shik gba shiila (Gaddi). Nang shii in gbumullu shiila in nummon fok ri ta duwai. ⁴⁷ Maryamu Magadaaliya kan Maryamu nonno Jooshesh in we piree nanaan Yeesho.