¹ Bara ye Darang Nessho Yawudaawa kookaro, Maryamu Magadaaliya, kan Maryamu nonno Yaakubu kan Shaloomi, shinui in pillu turaali ye shin ta waraa sheenon kumano Yeesho. ² Yau kan vubnai ti ku darang an dok ti ta shaklo parilau, shinui in war ta duwai ka dad-darang. ³ Shinui in ti deppina ti shakkiju ya, "Wo nong ta waraa gbumlomu kama shiilai ti fik duwai?" ⁴ Koddi ye shinui deeraa dooju, shinui in we fuwaa-po gbumlo shiilai won, longku shiilai kan gbai. ⁵ Shinui in ti ta duwai nang in we shik la-ilit showii kan lanna yen joori yen pe, deeni ti ku-kira temme, nang shinui in ya gbaral. ⁶ Shii in tewon ti shinui ya, "Ma wessho ya shewoi. Ma ti ku gassho biino Yeesho, niyo Naajeret, ye sheewaa. Shii fuwaa-po illani! Adoo shi ti po tem. Ma gee piree shinui kannaan shii wono. ⁷ Pene ma koo, ma wa tewi ti Biiturush kan dogi me an yiu-subetni maa ya, 'Shii ti ku wanni ti toom ma we war Galiili. Ti po teere ma ta we shiknii, bara kaa ye shii tenna ma.' " ⁸ Shinui in peron ti ta duwai ka yoba; shikjui in ti tari kan maam. Shinui a tewo koo we ti koo niyo dokum longku shinui yuuna shewo kping. ⁹ [Yau kan vubnai ti ku darang an dok ti ta shaklo parilau, ka bi ilitnii, shii ka toom in keru doono Maryamu Magadaaliya, ye shii foraan shaabug shin parilau ti shiki. ¹⁰ Tei in wanna in wa tewi ti me milam shinui ka shaayi kan shii, koddii shinui ti ku bau kenni kan ya kwii. ¹¹ Shinui in yaarra ya shii kan dooni kan tei weena shiknii, pene shinui a kumum. ¹² Ka bi ween shurme te shii in ker-do ti ta peen ado dokro ti me palau kaa ye shinui ti ku ya mere peren ti ta buki. ¹³ Shinui in wanna in wa tewi ti dogi me an yiu-shubeti, pene dogi me an yiu-shubeti a kumu kan shinuim. ¹⁴ Ka Yeesho in keru-do me shin kpumu gee doki kaa ye shinui teeka shikju ka we sha weshiina ti ku dangla, nang shii in pekro shinui ka longku kenni li shaari kan bang poshaari, longku shinui a kumu kan me shinui weena shiknii ka bi ye shii illaan ti ta duwaim. ¹⁵ Nang shii in tewon ti shinui ya, "Ma koo man war ku-buk ding, kan man kpaallin pi shinnyi yen tomon ti ku peewe-piri ding. ¹⁶ Shi mo kunnga kan in ya yulma ta kauro shii, kan maa moi kumum ta kelmo shii. ¹⁷ Temo te ta kowani ka shaayi kan me kunnga. Ti ta shommono shinui ta foddo shanngau. Shinui ta ya paaro kan bino-dak. ¹⁸ Shinui ta shokro kuret ti ta kiraju, kan ma shinui maa ta she wee ta dum tuk niyo, a ta yuun we ti shinuim. Shinui ta li kira ti ku me shikjui bangum, kan me an agini ta we bang shik." ¹⁹ Ka bi ye Fo-mina wiila po yuun paaro ti shinui, in shokro shii in ammo ku-dang kan in wa li shii ti po diya ti ku-kira temmeno Yamma. ²⁰ Me an yiu-shubeti in koona in wa kpaalo po paaro ti koo tong, kan Fo-mina ti biijui in ti ya shuran ka shaayi, in kemro paaroi ti bi we temo ye kooka ka shaayi kan shinui.]