¹ Ti ta shkalo shurme, birang ka gbong jima in gallu, kan shinui a kan wee po shaanim. Yeesho in ye me an yiu-shubetni in tewon ti shinui ya, ² "Ne ti ku kunngo jima te ka longku shinui shuwaa-toom ka diyani kan ne ye booi yuwaa shaklo tat, kan adoo we po shaanim. ³ Ne maa shuraa gunjui ka we war minaju a gale kan shaanim. Peddiju wanna tali." ⁴ Me an yiu-shubetnii in lignon ti shii ya, "Min ta waraanii tong minun weeru appan we-ta-kele gbe ti piree adoo niyom ka we kemron ka memme tei?" ⁵ Shii in tel shinui ya, "Ma kan appani tiyaa?" Shinui in liginna ya, "Parilau." ⁶ Shii in ya paaro ya mo memmei dijiyaju ti buk. Shii in shokro appani ye parilawi, in pammina, kan in beblo taajui. Shii in mibnon ti shinui ti me an yiu-shubetni mo dajiyon ti toomjui, nang shinui in dajiyon ti toom jimai. ⁷ Birang shinui kan shirim a gbem, kan ka bi ye shii pammina ka longkuuju, shii in pekro me an yiu-shubetnii mo bwatton ti shinui kpang. ⁸ Shinui in shuyyina in kemreju, nang shinui in pablo dogii beblan tai, shinui in kemro gbidina ganga shin parilau. ⁹ Ti po teerei ka shwiji shin shig kpumu sho naa-peereu. Nang shii in li biijui won. ¹⁰ Kpantidi shii in reeni ta gong-doo kan me an yiu-shubetni, nang shinui in warju ta kpakan-fok buk Dalmanuuta. ¹¹ Nang Parishaawa in peru in yiu ya jiram kan shii. Shinui in leu we shik we-temo ti ku-dang, ka we nau shii. ¹² Shii in fur-shuno tiriim ti ta shoomni kan in tewi ya, "Longku wen ku-kiran te leka we shik we-temoi? Kulli ne ta teu ma, adoo temo ye ta shuklani ti ku-kira tem." ¹³ Nang shii in wessho shinui, in reeni ta gong-doo birang, kan in koo wanni awo yen dok. ¹⁴ Wende jiyee waru ka we-ta-kele shekna me an yiu-shubet. Shinui a kan wee yeka bang awoi dok ti ta gong-dooim. ¹⁵ Shii in pekro shinui ya, "Ma yu geren kan jooro ka yiij Parishaawa kan yiijno Iriidush." ¹⁶ Me an yiu-shubeti in yiu tenglo shaayi ya, "Tenei ye kamai kan we-ta-kelem." ¹⁷ Yeesho fuwaa po pen te, nang shii in tewon ti shinui ya, "Longku wen ma ti ku yuyyo telyo ti kuuma maa ma kan we-ta-kelemmi? Ar wende tida mai jemlo maa? Ar wende tida mai peno maa? Poshaarima yuwaa dil ya? ¹⁸ Ma kan ado, ma ti wem ya? Ma kan kumo, ma ti yaarram ya? Ma ti nyimminam ya? ¹⁹ Koddi ye ne beblaa ta appani fuwati ti shakki shig-fuwat sho kpumui, wo dogii ganga buk-buki we-ta-kele tiyee woraai?" Shinui in lignon ti shii ya, "Kpumu gee-palau." ²⁰ Koddi ye ne beblaa ta appani shin parilawi ti shakki memme shin shig kpumu sho naa-peerewi, kemran beblan ta we-ta-kele tiyaa ye ma pablaai?" Shinui in lignon ti shii ya, "Parilau." ²¹ Shii in tewi ya, "Ar wende tida mai peno maa?" ²² Shinui waru Batshaida. Memme ti po teerei in warin ti shii ka Manni shwijii kan shinui in beng Yeesho mo tau shiknii. ²³ Yeesho in yiwin an-fugumi ti kirai, kan in peron ka shii ti tarang meno-minai. Koddi ye shii fiikan elet ti adoonii kan in liin kira ti kuunii, shii in tel shii ya, "Ke ti we shik we ya?" ²⁴ Shii in deero dooni, kan in tewi ya, "Ne ti we shik memme shinui ti ku yuyyo mere kaa biro-biro." ²⁵ Nang shii birang in liin kira ti ku adoonii, nang niyoi in au adooni, po-geenii shinnaro, kan shii in ti we shik we ding kpang. ²⁶ Yeesho in li biinii mo wanni minani kan in tewi ya, "Wessho ri tarang minam." ²⁷ Yeesho kan me an yiu-shubetni in yiu merko meno-mina me nimmi kan Kaisheeriya ye ti Pilibi. Ti ku koko shii in tel me an yiu-shubetni ya, "Memme ti tewi ya nei nong?" ²⁸ Shinui in lignon ti shii ya, "Yuwaana an Yulma. Peddi yaa, 'Ilya,' kan peddi yaa, 'Dok ti shakki me an-pigra.' " ²⁹ Shii in tel shinui ya, "Pene ma sheema ma ti tewi maa nei nong?" Biiturush in lignon ti shii ya, "Kei Kiriti." ³⁰ Yeesho in pekro shinui mo wessho tewani ti koo niyo dok maa nei Kiritii. ³¹ Sii in yiu shuppo shinui ya La Niyo yikka ti gbare-do in taa shilibi we gbe, kan birang men gbidina kan mon gba me ankpaa kan me an shubet-shoro ta kuraa shii, kan ta tukani, kan ka bi shaklo tat ta illani. ³² Shii in sheero shuran te ti kudam. Nang Biiturush in ye shii ti jele kan in yiu pekro shii. ³³ Pene Yeesho in shiwa dooni in geen me an yiu-shubetni kan nang in pekro Biiturush ya, "Meeko won ti piree kan ne, longku ke ti ku yaani kaa kei Shuuro! Kei li poshaariko ti ku wee sheeno Yammam, penei ti ku we memme." ³⁴ Nang shii in ye jimai kan me an yiu shubetni ti do shaayi, kan shii in tewon ti shinui ya, "Ma mondok maa leka yiu biino, shii ta ya jiram kuuni, in shar biro loo-kuuni, nang in yiru biino. ³⁵ Longku maa mo leka kauro kerangni ta shekon ka te, kan maa mo shekan ka kerangni ka longkuuno ka longku paaro Yamma kauron ka te. ³⁶ Niyoi ta we wenee ye shii maa weyaa ku-buk ding in kaano we kerangnii? ³⁷ Wo wen ye niyo ta minani ka we paaro-ku kerangnii? ³⁸ Maa mo ta yaaro duulan-shik ka longkuuno kan paarono ti ta koddi te yei adoo yiu poshaari kan Yamma kan me an shasshalau ti ku-kira te, La Niyo ta yaaro duulan-shik ye shii maa meena ti ta shokranno Foni kan ka shaayi kan me an shuran ku-dang me shaana."