¹ Parishaawa kan me an shubet ta shiire me wanna ti Urshaliima in gallun ti jelenii. ² Shinui in we peddi me an yiu-shubetnii ti ku sha we-ta-kele ka kiraju a fuddanim. ³ (Longku Parishaawa kan Yawudaawa a ti sha-wem ma kiraju maa fuddanim, longku shinui yiwii kan waari me an-toom. ⁴ Koddi ye Parishaawa maa wanna ti ku-dam po piblo-we, shinui a ti sham ye ma shinui maa bina shikjum, birang shinui yiwii kan peddi wei gbe me shinui yinna, kaa ma fuddo shik temme, fuddo shik telang, fuddo shik bwatte laa-bela kan ku-dangla piree shinui ti shuun weshiina.) ⁵ Parishaawa kan me an-shubet ti ta shiire in tel Yeesho ya, "Longku wen me an yiu-shubetko a ti ya kaa ye waari me an-toom kunngan, pene in ti sha we-ta-keleju ka kiraju a fuddanimmi?" ⁶ Pene ahii in tewon ti shinui ya "Isheya yuwaa pigrai kpang ti kuuma me an wawo-ado. Kaa ye ballii ya, "Memme te ti minno gbai ka ku-fokju, pene poshaariju tali kan ne. ⁷ Ti waunoi ti ta meere, shuppani ka shoro memme teerei wee shinui shereenjun ti kwi.' ⁸ Ma fulaa bi ka shorono Yamma man yiwo waari memme." ⁹ Birang Shii in tewon ti shinui ya, "Ma kan koko yen kpang ye ma po wakin shorono Yamma kulang man yiwo ma bi waari ma! ¹⁰ Longku Muuja tenna ya, "Min-gba ti ma foko kan nongko,' Shi mo kpaaka foni yei nonni yikka ti gbare-do in tuk shii.' ¹¹ Pene man ti tewii maa, 'Maa mo teka ti foni yei nonni maa, 'Peen shawo ye ma po weyaani ti kirano, ne fuwaa po wakani ti Yamma. ¹² nang ma ti kumin ti shii mo yu manni wei ka longkuuno foni koo nonnim. ¹³ Ma ti ku pitto ku paaro Yamma ka waari ma ye ma ti shuppon shiba ma. Birang man ti yuyyo peen we gbe." ¹⁴ Yeesho in ye jimai birang in tewon ti shinui ya, "Ma yaarono, ma ding man peni. ¹⁵ Adoo wee ye ti peewe ti shik niyo ye ta li shii in yoon an-doon ye maa riyaa shiknim. Pene bara wee ta peru ti poshaari niyo teerei ye ta li shii in yooni mo an doon." ¹⁶ "[Maa ka mo kan kumo we yaarani, shero mo shii yaaro]". ¹⁷ Wende koddi ye Yeesho wesshaa jimai in reeni ta mina, me an yiu-shubetni in tel shii ti ku temoi. ¹⁸ Yeesho in lignon ti shinui ya, "Ar wende bambirima ti ta kenni penani ya? Ma ti we wee riyaa ta aa niyo ti peewe a ta li shii in yooni an-doonum, ¹⁹ longku a ta ri poshaarinim, pene ta shaaro ta vungul kan ka bi in perero ti lo-shikum ya?" (Tewan paaro te, Yeesho kunnga ya weshiina ding ku-jallal kpang). ²⁰ Shii in tewi ya, "Nang bara wee ti peru ti ku-fok niyo teerei wee ti li shii in yooni an-doon. ²¹ Longku ti ta aa niyo, ti shakki wee ti poshaari, ti perui kaa ma, nyimmo doon, jiri, tuk-niyo, ²² shomak, dalak, shek, dokko, piire lewo, mwisshi, daklo-shommo, kpir-ku kan kenni-nyimmo. ²³ Piire ween shurme te ding ti pepittui ti poshaari, kan shinui wee ti li niyo in yooni an-doon." ²⁴ Shii in illani ti po teere in kooni war ta buk Taaya kan Shiidon. Ti po teerei shii in wa ri ta mina, kan shii a lewo koo niyo in pen piree kan shim, pene shii a ta dum latto shiknim. ²⁵ Kulli pene, kaa ye kpantidi manni paamuni ye kan lairo kattani ye ka piire shoom yaaraa shinnyinii, tei in waru in juunan ten ti toomnii. ²⁶ Paamuni niyo Elenaawa, ye pattaa tei ti kpakan-fok buk Finiikiya ti ta buk Shuuriya. Tei in beng Yeesho mo for shaabug ye ti shik lairo. ²⁷ Yeesho in tewon ti tei ya, "Shero mo kang shibai tida. Longku yikka ti gbare-do minun kang shiba Ishereila tida." ²⁸ Pene tei in lignon ti shii ya, "Oo ta Fo-mina, koo bai ti shai nyittan weshiina ye ti shugiyya ti buk ti ku dangla po sha weshiina shiba." ²⁹ Yeesho in tewon ti tei ya, "Ka longku deewan paaroji, shi ta dum kooji. Shanngawi fuwaa po perenjun ti shik laiji." ³⁰ Tei in meero minaro in wa we lai kuttii ti ku gburam, kan shanngawi fuwaa po pereju. ³¹ Nang Yeesho birang in wessho kpakan-fok buk Taaya, in merko ta buk Shiidon ar we war Shiiruk Galiili we ammo shakki gok-mina kpumu. ³² Ti po teerei shinui in waru ka manni niyoi ye gballa kan ta foknii dasshani, kan shinui in beng shii mo liin kira ti kuunii. ³³ Nang shinui in ye shii ti jele ti piree kan jimai shi dokni, shii in showin po kirani ti ta kumoi, kan shii in fiya ele birang in tau shik daki. ³⁴ Nang shii in deero-dooni ti ku-dang, in for shabak,kan in tewi shii ya, "Ephphatha," tene ta shuklani yaa, "Awu!" ³⁵ Kpantidi ta kumonii in aworo, Yeesho in li niyoi in ya paaro, kan shii in yiu ya paaro daar-daar. ³⁶ Yeesho in pekro shinui mo wessho tewani ti koo niyoi. Pene ma shii ti foddon foki ti shinui, kaa shii ti tewon ya mo shinui shuun toom ka kpaalo piri. ³⁷ Shinui in ya maam kping, in ti tewi ya, "Shii yuwaa we te ding kpang. Ar shii liyaa gballa in yiu yaarani kan mo baaba in yiu ya paaro."