¹ Yeesho in wessho po teerei in waru tarang gok-minani, kan me an yiu-shubetni in yiru biinii. ² Bara ye darang Nessho Yawudaawa yuwaaro, shii in ya shubet ti ta mina fur-fok. Memme gbe in yaaraa shii kan shinui in yuyyo maam. Shinui in ti tewi ya, "Duna shii weena shubet tei ti tong?" Duma wo shen wen ye minnan ti shii?" Duma tenei we maam wen ye shii ti yuyyina ka kiranii?" ³ "Tenei la an-teddo we-po-dang, laano Maryamu kan ma molonni ta ma Yaakubu, Yushubu, Yawuda kan Shimon maa? A ma molonni shereb ka shaayi kan kama ti po te maa?" Poshaarijui in dakloro ti shikno Yeesho. ⁴ Nang Yeesho in tewon ti shinui ya, "Ai, mo an-pigro a ti kaano we gbam bara ti gok-minanju birang kan ti shakki ma molonni kan ta-minaju." ⁵ Shii a dum ya gbong shuran koo dokum, bara liyaa kira ye shii liyaa ti ku peddi me shikjui bangum kan in tassho shinui. ⁶ Shii in ya maam kenni lishaariju. Nang shii in yiu merko meno-mina meno-mina in ti ya shubet. ⁷ Nang shii in ye kpumu gee-palawi in yiu shungro shinui palau-palau, nang shii in minin kumen ti shinui ti ku piire shoom, ⁸ kan shii in pekro shinui mo wessho shar we ti kirajui, koo we-ta-kele, vooro koo kine ti gunjui, bara la-biro mere, ⁹ Ma shoppo taa pene mo ma shar manni laanaim. ¹⁰ Shii in nang tewon ti shinui ya, "Mam maa riyaa ta mina, ma dee ma ti po teere we war koddi ye ma ta wessho po teere. ¹¹ Maa ka gok-mina yei ta yiu mam koo in yaaro mam, mam maa ta wessho po teere, ma tudira kpisshi shik shoo ma in yooro we jimro ti kuuju." ¹² Shinui in koona in wa kpaalo piri ya mo memme for-fokju. ¹³ Shinui in foddo shanngau gbe, kan in der mor ti ku memme gbe me shikjui bangum kan in tasshaju. ¹⁴ Gub Iriidush in yaaro we te, longku shommono Yeesho penaaro ti koo tong. Peddi yaa, "Yuwaana an Yulma ye illaani ti shakki me kuma, kan teerei ye we maam kumen shurme te ti ya shuran ti shiknii." ¹⁵ Peddijui in te tewi yaa, "Shii Ilya." Ar wende peddi in tewi yaa, "Shii an-pigra, kaa dok ti shakki kodiro me an-pigra me milam." ¹⁶ Pene bara ye Iriidush we te in tewi ta shii ya, "Yuwaana, mo ne foraa kwi, illaani." ¹⁷ Longku Iriidush shuraa in yiru Yuwaana, kan shii in li in kpakko shii ti ta mina fur-shuna ti ku paarono Iriiduya (manna molli ta Pilibush), longku shii diga tei. ¹⁸ Longku Yuwaana teka ti Iriidush ya, "A yu kpang ken dig manna molkom." ¹⁹ Pene Iriiduya in kpal den kan shii kan in leu tuk shii, pene tei a ta dumanim, ²⁰ longku Iriidush shiyaa Yuwaana; shii penaa yaa niyo ye dob-dob kan shaana, kan shii in naa shii kpang. Bara ye Iriidush yaaraa Yuwaana, shii in turmoni, kaa ye shii leka yaaro Yuwaana. ²¹ Nang koddi yen kpang in waru, koddi ye Iriidush ta ya temre darang pattanni, nang shii in ya weshiina kiryippa ti men-gbidina me an-toom bee-deetni kan men gbidina shwiji me ti Galiili. ²² Laino Iriiduya ka shikro in riiru, tei in yuun shor ti shinui, ma Iriidush kan me an sha weshiina temreni in beero kuuroi ta shinui. Nang gub in tewon ti la-gejei ya, "Bengno ka wee shi leka ding kan ne ta min shi." ²³ Shii in pammon-we ti tei ya, "Wee shi bennga ding ti piree kan ne, ne ta min shi, koo modaa awo bwaari po ya-gubnoi ne ta min shi." ²⁴ Tei in perero in war shikno nonto in tewon ya, "Ne ta beng shii ka wen?" Tei in tewon ya, "Kuuno Yuwaana an ya Yulma." ²⁵ Kpantidi tei in meeru shikno gub ka dawal, nang tei in bengi in ti tewi ya, "Ne leka ken minno, wendei, kuuno Yuwaana an ya Yulma ti ta kummam." ²⁶ Gub in turmoni kping, pene longku yaan pammini kan me binoni, shii a lewo beelon teim. ²⁷ Nang gub in shur an-dongoori ka pekro mo waruni ka kuuno Yuwaana. An-dongoorii in wanna in wa for kuuno Yuwaana ti ta mina fur-shuna. ²⁸ Shii in warin ka kuunii ti ta kummam in mini ti la-gejei, nang la-gejei in wa mini ti nonto. ²⁹ Koddi ye me an yiu-shubetni yaaraa pi we te, nang shinui in wa shar kumai in wa kannina ti ta duwa. ³⁰ Me an-kaawii in waru ka shaayi kan Yeesho nang in tewon ti shii wee shinui yuuna kan wee shin shuppinan. ³¹ Nang shii in tewon ti shinui ya, "Ma war ma piree a doo niyom man wa nesshon la-wiiu." Longku memme gbe ti ku waru in ti kooju, nang shin me an-kaawii a wa koddi ye po shuun weshiinam. ³² Longkuuno te shinui ku-jalju in reeju ta gong-doo in warju piree a doo niyom. ³³ Pene kaa ye shinui ti ku wessho po teerei, memme gbe in jemlo shinui, nang shinui in juwan yoba ti biijui ti tarang minai, ar shinui in be mean kaawii foorani. ³⁴ Koddi ye shinui foonna ku-shwiyak po paali dooi, shii in we shik gbong jimai, nang shii in kunngo shinui, longku shinui kaa dinnyi mei a doo mo an-tiim. Nang shii in yiu shuppo shinui ka we gbe. ³⁵ Ti ta Koddii po darang buka, me an yiu-shubetni in waru shiknii in tewi ya, "Po tei a doo niyom kan koddii kuugaro. ³⁶ Li bi memmei longku shinui in wangro tarang gok-mina kan meno-mina me nimmi kulang shinui in pillin wee shinui po shaani ti kuuju." ³⁷ Pene shii in lignon ti shinui ya, "Ma minin ti shinui we po shaani." Shinui in lignon ti shii ya, "Mo min war minun wa pillu we-ta-kele po dinaari shig-palau ka we minin ti shinui ka we shaani ya?" ³⁸ Shii in tewon ti shinui ya, "Duma appannii ye ma kan tei tiyaa? Koo ma gee." Bara ye shinui weyaa, shinui in tewon ti shi ya, "Appani fuwat kan shirim palau." ³⁹ Shii in tewi ya mo memmei dijiyaju mina-pitto mina-pitto ti ku shwee. ⁴⁰ Shinui in dijiyaju mina-pitto mina-pitto ye shig-dok shig-dok kan naa-fuwat naa-fuwat. ⁴¹ Shii in shar appani fuwat kan shirim palau in beblo tai in mibinna ti me an yiu-shubetni mo dajiyon ti toom memmei. Birang shii in bwairon ta shirim ye palawi ti shinui ding. ⁴² Shin ding in shuyyina ar in kemreju. ⁴³ Nang me an yiu-shubeti in ganglo do beblan ta we-ta-kelei, kemran ganga kpumu gee-palau, birang kan buk-buk shirim. ⁴⁴ Ti po teerei, gbe memme me shuwaai appanii shin shig-fuwat sho kpumu. ⁴⁵ Kpantidi shii in lin me an yiu-shubetni in reeju ta gong-doo in kooju toom we war awo nan dok, ti Basheeda, ye shii in tang waraa li bi jimai. ⁴⁶ Koddi ye shinui kookoju, shii in ammani ku sheela ka we fur-fok. ⁴⁷ Kiryippa in yooro, kan gongi ti nangshakki paalii, kan shii shi ku dokni ti buki. ⁴⁸ Yeesho in we me an yiu-shubetni ti ku taa shilib kai-doo gong, longku piriti ti ti pitturui ti kudo shikju. Ka fuwan ta-piri ka vubna, nang gee Yessho ti ku waru shikjui, shii ti ku ya mere ti ku paali-doo, kan kaa shii ta koonnin ti fokjui. ⁴⁹ Pene koddi ye shinui weyaa shiknii ti ku ya mere ti ku paali-dooi, shinui in nyimmina ya kergumii an-sha-duwa, nang shinui in yallina, ⁵⁰ longku shinui weyaa shiknii in shemo turmoju. Kpantidi shii in yuun paaro ti shinui ya, "Ma kemo shik ma! Tenei ne! Ma wessho ya shewoi!" ⁵¹ Nang shii in ammani ta gong-doo ye kan shinui, nang piriti in dai-fok pittani. Nang shin ding in ya maam. ⁵² Longku shinui peno kangan niyo shig-fuwat sho kpumu ka appani ta shuklanim. ⁵³ Koddi ye shinui teelaaju awo yen dok, shinui in shaaju ti Jenishereeta kan shinui in too gong-dooi ti po paali. ⁵⁴ Koddi shinui pennan ti ta gong-dooi, memme in jemlo shii kpantidi, ⁵⁵ nang shinui in wangro koo tong ka yoba ti ta buk in ti wangittu ka me shikjui bangum ti ku irau ti piree ding shin yaaraan ya shii ti po teere. ⁵⁶ Piree shii riyaa ding ti tarang meno-minai, koo gok-minai, koo ti ta buki, shinui ti kaniro me shikjui bangum ti ku-dam po pilblo-we. Shinui in ti beng shii mo shin tau po gerang lannani, kan ding me taka shiknii shinui ti we bang-shikju.