¹ Shinui in fooroyen dok awo paalii, ti ta kpakan fok buk Garashinaawa. ² Koddi Yeesho ti ku peron ti ta gong-dooi, kpantidi ti po teerei in amru shiknii ta niyo ti ku duwa ye ka piree shoom. ³ Niyoi ti deenii ti duwa. Adoo mo ta dum too shii we eem birangum. ⁴ Tobyaa shii sho gbe ka an-kop kan we-eem. Shii ti bebro ta we-eemi birang an-kopi maa yuwaa in tonglo tai. Adoo mo kan bang kping ye ti yippo shikniim. ⁵ Koo ippa kan darang shii ti ku-duwa kan ta sheela, shii ti yuyyo yallo kan in ti shippo shikni gerang shiila. ⁶ Koddi ye shii weyaa shikno Yeesho ka la talii, shii in juuru waru shiknii kan in juunan nen ti toomnii. ⁷ Shii in yallina ka ele yen bang ya, "Ke lekai wen ti piree kan minui, Yeesho Laano Mo ti Ku-dang baki? Ne benngako ti piree kan Yamma po kuuni, wessho minno shilibii!" ⁸ Longku shii ti ku tewon ti shii ya, "Periko ti shik shwijii, ke mo piree shoom." ⁹ Yeesho in tel shii ya, "Shommokoi wen?" Shii in lignon ti shii ya, "Shommonoi Liijiyon (shig-kpumu sho paragbanang), longku min gbe." ¹⁰ Shii in beng shii ti kwi ti kwi mo wessho kaiju biiju ti ta kpakan-fok buki. ¹¹ Wende ti po teere ka an-pali annyanjyaari mina ti ku sha fok ti toom gungumi, ¹² nang shinui in beng shii ya, "Shur mu gunmu ti shik annyanjyaari mina me." ¹³ Kaa te shii in kumin piri ti shinui, piire shoomi in pereju in wa reeju shik annyanjyaari minai, gbeju fooraa shig kpumu sho palau nang in gboloju ti gbaari ti shik gungumi we sha ta paalii, nang doo in dello shinui ¹⁴ Nang me an-tii annyanjyaari-minai in juwaju yoba in wa sheero gun wee yuunaro ti me ti tarang gok-minai kan kpomlan-fok bukro, kaa te memme in perii waraa gee wee yuunaro. ¹⁵ Nang shinui in waru shikno Yeesho nang shinui in we shik mo shanngau sharaa-kwi milami, mo sharaa-kwi ta Liijiyon (Shig-kpumu sho Paraganang), deeni ti po teere, kan shoppan lanna ti shikni kan ti ta nyimmono dob. Nang shewo in yiu shinui. ¹⁶ Me weyaa shik wee yuunaro ti shik shwiji mo shanngau sharaa-kwi milami, in sheeron guni ti shinui ti liyan guni, nang shinui sheeju in sheeron pi anyanjyaari-minai. ¹⁷ Nang shinui in yiu dimmo shii mo wessho ta bukju. ¹⁸ Koddi ye shii ti ku ri ta gong-dooi, shwiji mo milam shanngau shaaraa-kwii in beng shii ya shii ta kowani kan peemo. ¹⁹ Pene Yeesho a kumin piri ti shiim, nang in tewon ya, "Koo ke warko minako kan shik memmeko kan ken sheeron ti shinui wee Fo-mina yuunako, kan ye shii kunnginako." ²⁰ Longku kaa te shii in kooni kan in yiu kpaalo piri ti ta gok-mina kpumu pi gbidina wee Yeesho yuuna ka longkuuni, kan koo nong in ya maam. ²¹ Wende koddi ye Yeesho teelaa awo shiiruk nan dok ti ta gong-dooi birang, gbong jima in gallin ti jelenii, kaa ye shii ti jele paali. ²² Nang dok ti shakki me an-toom me ta mina fur-fok ye shommonii Yayiirush in waru, kan koddi ye shii weyaan shiknii, shii in juunani ti toomi. ²³ Shii in bengi ti-kwi ti-kwi in te tewi ya, "La-kattan laino yuwaa nimmi muroro. Ne benngako, waru ken liin kirako ti kuuroi kulang tei in we bang shikro, tei in diina." ²⁴ Longku kaa te, shii in koona ka shaayi kan shii, nang gbong jima in yiu biinii ar in yiu pessho shii. ²⁵ Wende ka paamun ti po teere ye dom ti peri ti shiki po sheno kpumu gee-palau. ²⁶ Tei baka shikro kping ti piree kan me an-gunul kan tei in wiilaa wee te kan te ding, pene kan ye tei in we maj-maj shikro, wei in ti tokko-shaariro yooro perak. ²⁷ Koddi ye tei yaaraa pinno Yeesho, tei in amru ti kudo ta biinii ti shakki jimai nang tei in tau shik geran lanna kawonii. ²⁸ Longku tei teka ya, "Ne maa bara takai shik geran lanna kawoni waani, ne ta we bang shikno." ²⁹ Koddi ye tei takan shiknii, nang pere domi in sherero, kan tei in yaarra ti ta diiro tei tasshaaro ti piree kan taa-shilibro. ³⁰ Yeesho kpantidi in peni ka shikni ya kumen peraa ti shikni. In shiwa dooni ti shakki jimai in tewi ya, "Taka shik lannanoi nong?" ³¹ Me an yiu-shubetnii in lignon ti shii ya, "Ken ti we shik jima te kpalii diring ti jeleko, birang ken ti tewi ka, 'Taka shiknoi nong wa? ' " ³² Pene Yeesho in gejiyo jeleni ka we we shik mo yuwaai. ³³ Paamuni, penaa wee yuunaro ti shikro, gbob-gbob in yiu tei ka longku shewo. Tei in waru in juunan ten ti toomnii kan in tewon ti shii kpang-paaroi ding. ³⁴ Shii in tewon ti tei ya, "Lai, lishaarishi minaashi bang shik. Kooshi ka twaalan-shaari kan shin bwaaraashi kan taa-shilibshi." ³⁵ Koddi ye Yeesho tida ti ku ya paaro, peddi memmei in waru ti minano Yayiirush mo an- toom ta mina Fura-fok in tewi ya, "Laiko muraaro. Longku wen ke ta turmo an-shubet birangi?" ³⁶ Pene Yeesho in fulin-bi kaa we teka ta shinui,in tewon ti mo an-toom ta mina fur-foki ya, "Wessho ya shewoi, bara kumu waani." ³⁷ Shii a wessho manni niyo in koona ti biiniim, bara ma Biiturush, Yaakubu kan Yuwaana ta mollo Yaakubui. ³⁸ Bara ye shinui fooraa ta mina mo an-toom ta mina fur-foki, Yeesho in we memme ti ku bau kenni, shinui in ti yuyyo kwii kan yallo ka ele yen bang. ³⁹ Koddi ye shii riyaa ta minai, shii in tewon ti shinui ya, "Longku wen ma ti ku bau kenni kan longku wen ma ti ku ya yalloi? Layii murorom, pene ti ku yaani shaklo." ⁴⁰ Shinui in yuun shuro bek ti shii. Pene shii in kajiyiru biijui ti peewe, nang shii in ye fo lai kan nonii kan me an yiu-shubetni me ka shaayi kan shii, nang shii in ri piree kan lai. ⁴¹ Shii in yippon lai ti kirai in tewon ti tei ya, "Taliita, kumi!" (Tenei wee ti shukilla yaa "Kattan la-geje), Ne teka shi, na shi illo shik shi." ⁴² Kpantidi layii in illo shikro in ya mere (longku tei shenero kpumu gee-palau kan pari). Shinui kpantidi in ya maam kan gbong beere. ⁴³ Shii in yuun pekro ti shinui kping ya mo koo niyo dok wessho pen gun we tei. Nang shii in tewon ti shinui mo minin we po shaani ti tei.