¹ Bĩrang Yeesho ĩn yĩʊ ya shʊbɛt tĩ shaƙya. Jimɑ memme gbɛ ƙpĩng ĩn gallʊ tĩ jɛlɛnĩĩ, ye shĩĩ ĩn reeni ta gɔng-dɔɔ ĩn ɗeen nin tĩ taĩ tĩ ƙʊ shaƙyaĩ. Jimɑ memmei ɗing ĩn ɗijiyɑju tĩ ƙʊ shwĩyaƙ tĩ pɔ jɛlɛ dɔɔĩ. ² Shĩĩ in shʊppɔ shinui ƙa we gbɛ ƙa tɛmɔ, nang tĩ ta shʊbɛtnĩĩ ĩn tewĩ ya, tenei wee tennan ti shinui. ³ "Ma yaaro! An-shirau waraai ya tobbo peenni. ⁴ Kaa ye shii tobbaa, peddi peeni in shugna ti ku koko, kan adeewe in waru in yokko peenni. ⁵ Peddi peeni in shugiyya ti ku karinkasshi buk, ti piree adoo buk gbem. Kpantidi in periju, longku ye ta buki a joorim. ⁶ Pene bara ye darang amna, in kur shinui, alawi in isshaju longku ye shinui a kan shoorinum. ⁷ Peddi peenni in shugiyya ti ta arat. Shinui in kpiri ka shaayi arati in kpakro shiki, nang shinui a yu arim. ⁸ Peddi peeni in shugiyya ti ku buk yen kpang kan shinui in kpiri in ya ari in tokko-shaariju peddi naa-tat, peddi naa-paragbang, kan peddi sho shig-dok." ⁹ Nang shii in tewi ya, "Maa mo kan kumo yaarani, shero mo shii yaaro!" ¹⁰ Koddi ye Yeesho shi ku dokni, me nimmi kan shii kan me kpumu gee-palawi in tel shii ti ku temoi. ¹¹ Shii in lignon ti shinui ya, "Ti piree kan ma, kunnga ma piri man pen wee ti ta gubno Yamma. Pene mei ti taim koo wen ta sheeron ti shinui ti ta temo, ¹² longku ma shinui maa geeka, oo shinui geeka, pene a ta weyanim, kan longku ma shinui maa yaaraa, pene a ta penanim, koo birang shinui a ta shiru shikno Yamma kan in fuddo shinuim." ¹³ Shii in tewon ti shinui ya, "Mai peno temo te maa? Namg ka yee ma ta pen temo te dingii?" ¹⁴ Mo an-kaawii, kaawaa paaro. ¹⁵ Ma meyyei me ti jele koko, piree kaawaan paaroi. Koddi ye shinui yaaraa, kpantidi Shuuro in waru in lawwo paaro ye kaawaan ti poshaarijui. ¹⁶ Kan ma meyyei peen me kaawaa ti ku karinkasshi, me, koddi shinui yaaraa paaroi, kpantidi shinui in yiwi ka beere. ¹⁷ Pene shinui a kan shoorin ti taajum, shinui in sheri po koddi la-wiiu. Ka bi kodii ye taa-shilib koo kunne illina ti ku paaroi, shinui kpantidi in shugna won. ¹⁸ Birang peddi peenii ye shugyaa ti ta arat, Shinui me yaaraa paaroi, ¹⁹ pene turmo ku-buk kan dokko-dokko birma, kan leu peddi wei in waru in kpakro paaroi, kan in yooro a doo arim. ²⁰ Me kaawaa shinui ti ku buk yan kpang teerei me yaaraa paaroi, in yiwi in ya shiili, peddi naa-tat, peddi naa-paragbanang, koo sho shig-dok gbe. ²¹ Yeesho in tewon ti shinui ya, "Ma ti waru ka okro deet ti ta mina ka longku dayani ti gun ganga ya koo ti gun gburam? Ma ti warinii ka longku dayani ti ku-dangla po dayani. ²² Longku a doo wee lattii yei ta penoro ta gunim, kan a doo wee nummani, yei ta dum peru peewe ti ku-damum. ²³ Maa mo kan kumo yaaraani, shero mo shii yaaro!" ²⁴ Shii in tewon ti shinui ya, "Ma ka kumo ti shik wee ma yaaraa, longku ka gurang ye ma keraan, ta keron kan birang ta tokkoma shaarii. ²⁵ Longku maa mo kan te, ti shii ye ta minin manni gbe, kan moi kan tem, koo ye la-wiiu ye kan tei, ta lawwon ti kirai." ²⁶ Birang shii in tewi ya, "Po ya-gubno Yamma kaa niyo ye tobbina peenni ti buk. ²⁷ Shii in wa yooni shaklo ka yippa kan in illina ka darang, kan peeni in peru in kpiri, kaa ye shii a peno koo ka yaam. ²⁸ Ku-buk in ya ari po kuuro, ka toomii jwijak, birang kumo kan ka bi kwii in ya ari ti ta kumoro. ²⁹ Koddi ye weshiinai maa niyaa, kpantidi ta shiwani ka po-demli longku koddi kasshoi wanna." ³⁰ Birang shii in tewi ya, "Ka wenee ye ta temyon po ya-gubno Yammai, koo wo temo shire ye kama ta twaalon-do we tei? ³¹ Tei kaa ar-tinnyaak, ti ta koddi ye tobbaan, tei ye kattani ti shakki peen ku-buk ding. ³² Kan ye kaa teerei, koddi ye tobbaan, in kpiri kan in yooro gba ti ku dogi biro ta doongi ding, kan in liyyo ku-funga, longku adeewe ku-dang ta dum liyyon luwaju ti ta lukniroi." ³³ Ka temyo gbe kaa te shii in sheeron paaro ti shinui, gbe kaa ye shinui ta dum penani, ³⁴ kan shii a yuun paaro ti shinuim in maa ka temyom. Pene koddi ye shii shi ku dokni, shii in twaalon-do koo wen ti me an yiu-shubetnii. ³⁵ Ti ta darang teere, koddi ye kiryippa yuwaa, shii in tewon ti shinui ya, "Ma shero kama teelemu awono shennyi." ³⁶ Kaa te shinui in wessho jimai, shinui in shar Yeesho, kaa ye kan shii, ti ta gong-doo. Ka peddi gong-dooi in koona ka shaayi kan shii. ³⁷ Kpantidi gbong pirit-doo in illiru, kan shum-doo yen bang in yiu badilo ta gong-dooi ye gongi in shemo nem kemrero ka doo. ³⁸ Pene Yeesho po kuuni ka shi ti ta bi, ti do-shaklo deewaa kuuni ka we-deewo. Shinui in pigro shii ya, "An-shubet, duma kei turmo kaa ye kama nennga muttani maa?" ³⁹ Shii in illo shikni, in pekro piriti kan in tewi ti shum-dooi ya, "Yu yititi! Ken sheri!" Nang piriti in sherero, kan nang in shemo ya gbong yititi ti po teere. ⁴⁰ Nang shii in tewon ti shinui ya, "Longku wen ma ta ya shewoi? Ar wende ma kan li-shaarim ya?" ⁴¹ Shinui in kemreju ka gbong shewo kan shinui in ti tebiyya ti shaayi ya, "Duma nang tenei nong, longku modaa pirit kan paali-dooi in ti minin gba ti shii?"