¹ Yeesho birang in ri ta mina po for-fok, kan ka manni shwijii ye kirai isshaaro. ² Peddi memmei in dira shii ka nimmi koo shii ta tassho shii Darang Nessho Yawudaawa longku shinui in we koko po kpaa shii. ³ Yeesho in tewon ti shwijii ye kirai isshaaroi ya, "Illo shikko ken shereko sherii ti wono ti nangshakki memmei." ⁴ Nang shii in tewi ti memmei ya, "Nennaa in ya ween kpang Darang Nessho Yawudaawa koo mo daklo; mo kauro kerang koo mo tuku ya?" Pene shinui in yooju yititi. ⁵ Yeesho in muuro shinui ka gbanan-ta-gongo, kan poshaarinii dakloro kping ka longku bang poshaariju, nang shii in tewon ti niyoi ya, "Tol shik kirako." Shii in tol shik kirani, nang kiranii in meerito yen kpang. ⁶ Parishaawa in pereju kpantidi in yiu gassho koko po tuk Yeesho shin kama memmeno Iriidush. ⁷ Nang Yeesho, kan me an yiu-shubetni, shinui in pereju in warju po paali, nang jima memme in yiu biinii ti Galiili kan Yawuudiya ⁸ kan Urshaliima birang kan ti Iduumiya, kan me kooka Urdun kan kpomlan-fok Taaya kan Shiidon. Koddi ye shinui yaara pi wee shii ti ku yuyyani, gbong jima in waru shiknii. ⁹ Yeesho ĩn tewi tĩ me an yĩʊ shʊbɛtnĩ mɔ shinui gasshɔnĩ gɔng-dɔɔ yen tɔb ƙa lɔngƙʊ jĩmaĩ, ƙʊlang shinui a ta we ƙɔƙɔ pɔ pɛsshɔnĩm. ¹⁰ lɔngƙʊ shĩĩ niyɑɑn ƙa memme gbɛ, lɔngƙʊ ƙaa te, mo ƙan ɑgin tĩ ta diini ĩn yĩʊ gasshɔ ƙɔƙɔ pɔ lĩ shikni ƙa we nem piree ƙan shĩĩ ƙa we taʊ shiknii. ¹¹ Maa koddi ye piire shoom weyaa shiknii, ma yuwaa shinui in ti shugiyya ti toomnii ka yallo, kan shinui in ti tewi ya, "Kei Laano Yamma." ¹² Shii in tol kumojui mo shinui wessho kpaalo piri shii nongeei. ¹³ Yeesho in ammani ku sheela, nang shii in ye shinui me shii leka, nang shinui in waru shiknii. ¹⁴ Shii in shakko kpumu gee-palawi (me shii yeyaa yaa me an-kaawi) longku shinui in wariju jeleni kulang in shur shinui ka we kpaalo fok shurani, ¹⁵ kan shinui in we kumen we for piire-shoom. ¹⁶ Shii in shakko kpumu gee-palawi: Shimon, ti shii ye minaan shommo Biiturush, ¹⁷ Yaakubu laano Jabadi, kan Yuwaana mollo Yaakubu, ti shii minaan shommo yaa Buwaanajish ye ta shuklani yaa shiba naani, ¹⁸ kan Andaraawush , kan Pilibush, kan Batalamaawush, kan Matta, kan Tooma, kan Yaakubu laano Alpayo, kan Tadaawush kan Shimon mo leka bukni, ¹⁹ kan Yawuuda Ishkarooti mo pilaan ka shii. ²⁰ Nang shii in wanni mina, kan jimai in waru ka shaayi birang, longku shinui a ta dum sha we-ta-kelem. ²¹ Koddi ye me ta minani yaaraa piri, shinui in peri in ti mwajiyo shii ya, "Shanngau paalaa shii." ²² Me an-shubet ti ta shiire me shaana ti Urshaliima in ti tewi ta shinui ya, "Ka Baaljaabu ti ta diinii" kan "Ƙa ƙʊmɛn shɑɑɓug ye shĩĩ tĩ forin shɑɑɓug." ²³ Yeesho in ye shinui ti jeleni kan in tewon ti shinui ka temyan ya, "Ka yee ye Shuuro ta kai bi shuuroi? ²⁴ Ma po ya-gub maa bwaaraaro in ti ya kenne kan shaayi, po ya-gub teere a ta sheranim. ²⁵ Ma mina maa bwaaraaro in ti ya kenne kan shaayi, mina teere a ta dum sheranim ²⁶ Ma shuuro maa illaa gei kan kuuni kan tai bwaarani, shii a ta dum sheranim, pene wannai po wiilani. ²⁷ Pene a doo mo ta ri ta mina niyo ye bang in jir wee shii kan shinum, bara ma shii maa dabyaa shik niyo ye bang ka toomi, kan nang shii in tang waraa pal we ta minanii. ²⁸ Kulli ne ta teuma, shasshalau shiba memme ding ta fuddon ti shinui, koo kan paaro bek ye shinui yuyyaa, ²⁹ pene maa mo yuwaa paaro bek ti Shoom Yen Shaana, a ta fuddo shiim, pene shii an kelnye shasshalau po ding." ³⁰ Yeesho teka tei longku shinui ti ku tebrani ya, "Shii kan piire shoom." ³¹ Nang nonni ƙan ma molonni ĩn warʊ ĩn shereju tĩ pɛɛwɛ. Shinui ĩn shʊrĩn tĩ shiknii mɔ yeeru shĩĩ. ³² Ƙa jĩma me ɗii kollii ƙan shĩĩs nang shinui ĩn tɛwɔn tĩ shĩĩ ya, "Nɔnƙɔ ƙan ma molonko shengrii tĩ pɛɛwɛ, ƙan tĩ ƙʊ gasshɔ biiko." ³³ Shĩĩ ĩn lignon tĩ shinui ya, "Wo ma nɔngɛɛ yei ma nɔnnɔ ƙan ma molonnoi?" ³⁴ Shĩĩ ĩn shiwɑ ɗooni tĩ shik me dijiyii kollii ƙan shĩĩ ĩn tewi ya, "Gɛɛ, tenei ma nɔnnɔ ƙan ma molonno! ³⁵ Lɔngƙʊ maa mo tĩ ya wee Yamma lɛƙa, niyo tɛɛrɛĩ mɔllɔ ƙan mɔlanɔ ƙan nɔnnɔ."