¹ Bara ye shii meena Kapanaawum ka shaklo lawiiu, in yaanna ya shii ti mina. ² Longku kaa te memme gbe in gallu ti po teere ye ta minai in kemero kama podang ri ta gumei yei a doo po shou shom, nang Yeesho in kaawon paaro ti shinui. ³ Peddi in waru shiknii ka mo shwei muraaro, shanna shii niyo peereu ⁴ Bara ye shinui weyaa a ta dum nemru nimmi kan shim, shinui in appo daalan ku mina ti piree kan Yeesho, ka bi ye shinui appaai, nang shinui in durin irau ye mo shwei muraaro kuttiin ti kwii. ⁵ Bara ye weyaa shik lishaarijui, Yeesho in tewon ti mo shwei muraaroi ya, "La, fuddako shasshalauko." ⁶ Wende peddi me an shoro ta shiire dijiyii ti po teere, nang shinui in ya nyimmo ti poshaariju ya, ⁷ "Ka yee la-moo ta ya paaro kaa tei? Shii ti yai bek! Ta dum fuddo shasshalawii nong pene maa bara Yammam mi?" ⁸ Kpantidi Yeesho penaa ti ta shoomni wee shinui ti ku nyimmani ti taaju, "Longku wen ma ti ya nyimmo we te ti poshaari mai? ⁹ Wo shire yeka maj-maj ka in tewi ti shwiji mo shwei muraaroi ya, 'Fuddaako shasshalauko, koo in tewi ya, 'Illo shikko, shar irauko, ken kooko'? ¹⁰ Pene kulan man peni La Niyo kan kumen ti ku-buk ka we fuddo shasshalau, " shii in tewi ti shwei muraaroi ya, ¹¹ "Ne tekako, illo shikko, shar irauko, ken kooko war minako." ¹² Shii in illo shikni kan kpantidi in shar irawi, kan in perin ti ta minai ti toomno koo nong, longkuuno te, shin ding in ya maam kan shinui in min gba ti Yamma, kan shinui in ti tewi ya, "Minui nau we shik we kaa we tem." ¹³ Birang Yeesho in perii merko jele shakyai, kan jimai ding ka shaayi kan shii, kan shii in shuppo shinui. ¹⁴ Kaa ye shii ti ku kowani, shii in we shikno Leewi laano Alpayo deeni ti po yiu kine-buk, nang shii in tewon ti shii ya, "Yiru biino."Shii in illo shikni in yiu biinii. ¹⁵ Yeesho ti ku sha weshiina ti ta minano Leewi kan me an yiu kine-buk gbe kan me an shasshalau ti ku shaani ka shaayi kan shii ka me an yiu-shubetni, longku shinui shin gbe kan shinui in ti yiu biinii. ¹⁶ Bara ye me an-shubet ti ta shiire, me shinui Parishaawa, weyaa ye Yeesho ti ku shaani kan me an shasshalau kan me an yiu kine-buk, shinui in tewi ti me an yiu-shubetnii ya, "Longku wen ye shii ti sha kan me an yiu kine-buk kan me an shasshalawi?" ¹⁷ Bara ye Yeesho yaaraa te in tewon ti shinui ya, "Memme me ta diiju bang, a lewo an-gunulum, bara memme me agin ti shiki teerei me leka. Nei warui ka longku nen ye me dobum, penei me an shasshalau." ¹⁸ Wende me an yiu-shubetno Yuwaana kan Parishaawa ti ku yiu-ku fok. Peddi memmei in waru kan in ya telyo ta shinui ya, "Longku wen me an yiu-shubetno Yuwaana kan me an yiu-shubet Parishaawa ti yiu fokju, pene me an yiu-shubetko a ti yiu sheejummi?" ¹⁹ Yeesho in lignon ti shinui ya, "Me wanna po diyaa yen fo ta yiu fokju ye tida mo an diyaai maa ka shaayi kan shinui ka yee? Kaa ye ma shinui maa ka shaayi kan an-diya yen foi, shinui a ta yiu ku fokum. ²⁰ Pene darangi ta waru koddi ye ta shokron an ku-diyaa yen foi ti piree kan shinui, kan ti ta darang shurme, shinui ta yiu ku-fokju. ²¹ A doo mo ta shar peeran-fok lanna yen fo in tonnon yen koorom. Maa yuwaa kaa te, kpalan jwali ta jaatito ti shikroi, yen foi ti shikno yen kooroi. kan jaaraani ta yooro perak in yek ye ka toomi. ²² A doo mo ta der doo inaabi ti ta kooro luru doo inaabim. Maa yuwaa kaa te doo inaabii ta jaattu lurui nang doo inaabii kan lurui shin ding ta daklaju. Kan ye kaa teere, doo inaabi yen fo ti derii ti ta luru yen fo." ²³ Darang Nessho Yawudaawa Yeesho in ti shanglo peddi ta doong alkama, kan me an yiu-shubetni shinui in yiu bel-ku alkamai. ²⁴ Nang Parishaawa in tewon ti shii ya, "Gee, longku wen ye shinui ti ya wee shoro beelaa-fok yaani Darang Nessho Yawudaawai?" ²⁵ Shii in lignon ya, "Mai nau maarani wee Dauda yuuna koddi ye shii leka kan in ti yaaro kpiyam shii kan shwiji me ka shaayi kan shii ²⁶ dangan piri ye shii riyaa ta Yamma koddi ye Abiyaatar shii mongba me ankpaa, kan in sha we-ta-kele ye waka, ye shoroi kum piri ti mondok mo shum bara me ankpaa, nang shii in min peddi ti me shinui ka shaayi kan shi maa?" ²⁷ Yeesho in tewi ya, "Darang Nessho Yawudaawa yuunai ka longku niyon-ding, a niyon-ding longku Darang Nessho Yawudaawam. ²⁸ Longkuuno te, La Niyo shii Fo-mina, kan koo she Darang Neesho Yawudaawai."