¹ Tenei liyan gun paaro yen tomonno Yeesho Kiriti, Laano Yamma. ² Kaa ye ballii ti ta takardano Isheya an-pigra ya, "Gee, ne ti ku shurma gun an-shuranno ti toomko, mo ta limmako do koko. ³ Eleno mo ti ku ya ye ti dan-doon, 'Ma limma do koko ti Fo-mina; man shupron shik koko ti shii.' " ⁴ Yuwaana in waru, in ti ya Yulma ti dan-doon in ti shuppo pi Yulma for-fok ka longku fuddo shasshalau. ⁵ Memme me ti ta buk Yawuudiya kan me ti Urshaliima ding in waru shiknii. In ti for fokju ka shasshalauju. Shii in yuun yulma ti shinui ti ta Shiiruk Urdun. ⁶ Lanna me shoppii ti shikno Yuwaanai tonninai ka shok penwe, in dau ta gongoni ka peeran fok lanna-doo, weshiina fokni golom kan shagni doong. ⁷ Shii in ti kpaalo piri ya, "Ka biino ka mo ta waru ye yekano gba, nei fooro nen piddo fwaala taanim. ⁸ Ne yuwaa ma yulma ka doo, pene shii ta yuuma yulma ka Shoom Yen Shaana." ⁹ Tene yooro ti ta shaklo shurme ye Yeesho in waru ti Naajeret ti ta buk Galiili, nang Yuwaana in yuu yulma ti shii ti ta Shiiruk Urdun. ¹⁰ Kaa ye Yeesho ti ku perin ti ta dooi, shii in we ku-dang in aworo kan Shoom in shaarin ti kuunii kaa ammaluk. ¹¹ Ele paaro in peru ti ku-dang ya, "Kei laano ye ne leka, nen ti sha tomoni kping." ¹² Nang Shoom in warin shii dan-doong. ¹³ Shii ti dan-doong po shaklo naa-peereu, Shuuro in wa nau shii. Shii dii kan lo-ta-shwee, nang me an-shuranno Yamma in yuun shuran ti shii. ¹⁴ Ka bi showanno Yuwaana ti ta mina muruk, Yeesho in waru ta buk Galiili in ti kpaalo fok shinnyino Yamma. ¹⁵ Shii in ti tewi ya, "Koddii kennga, kan gubno Yamma yuuna nimmi. Ma for fok ma kan man kumi kan shinnyii." ¹⁶ Koddi ye shii ti ku mere ti jele Shakya Galiili, shii in we shikno Shimon kan Andaraawush mollo Shimon shinui ti ku vingyo ja ti ta shakya, longku shinui me an yippo shirim. ¹⁷ Yeesho in tewon ti shinui ya, "Ma waru, ma yiru biino, kan ne ta shiwan man me an yippo memme." ¹⁸ Nang kpantidi shinui in wessho jai in yiwaju biinii. ¹⁹ Kaa ye Yeesho giika la-wiiu, shii iin we shij ma Yaakubu laano Jabadi kan Yuwaana Molli, shinui ti ta gong-doo ti ku limma bi ja. ²⁰ Shii in ye shinui kan shinui in wessho foju ta Jabadi ti ta gongi kan me an shuran me sharaa, nang shinui in yiwaju biinii. ²¹ Nang shinui in waru Kapanaawum, nang ti ku Darang Nessho Yawudaaw, Yeesho in reeni ta mina for-fok in yuun shubet. ²² Shinui in ya maam ka yaan shubetnii, longku shii ti ku shuppo shinui kaa niyo mo kan kumen a kaa me an shubet ta shorom. ²³ Wende ka manni shwijii ti ta mina for-fokju ye kan piire shoom in showin ka yalloi, ²⁴ in ti tewi ya, "Minui ta yuun wen ka kei, Yeesho niyo Naajeret? Ke wannai tukyomu ya? Ne penaa kei nong. Kei dok Shaanan weeno Yamma!" ²⁵ Yeesho in pekro piire shoomi kan in tewi ya, "Nummo fokko ken perin ken ti shiknii!" ²⁶ Nang piire shoomi in shokro moon shurme in birin buk in pereni koddii in ti ya yallo ka ele yen bang. ²⁷ Memmei ding in ya maam, longkuuno te, shinui in tel shaayi ya, "Tenei wen? Shubet yen fo kan kumen! Shii ti dum pekro piire shoom kan shinui in ti murin-ku ti shii!" ²⁸ Shinnyi kuunii in war koo tong ti ta kpakan-fok buk Galiili. ²⁹ Ka bi pereni ti ta mina for-foki, shinui in war ta mina ma Shimon kan Andaraawush, ka shaayi kan Yaakubu kan Yuwaana. ³⁰ Wende gbarum Shimon kuttii kan agin beeu, nang shinui in teu pir tei ti Yeesho. ³¹ Longkuuno te shii in waru, in yiwin tei ti kirai, in shokro shikroi; beewi in peren ten ti shikroi, nang tei in yiu yuun shuran ti shinui. ³² Ka kiryippa teere ka bi shuwan darang, nang shinui in wangittin ti shii ka me shikii bangum koo me shanngau shaddaa- kwi. ³³ Nang memme tarang minai in gallin ti podangi. ³⁴ Shii in tassho peen pira shikjui kan in ti foddo shaabug, pene shii a wessho shaabugi in ti ya paarom, longku shinui penaa shii. ³⁵ Shii in illina ka vubnai, ye ta pirii tida lib-lib, shii in kooni in wanni piree a doo niyom in forin-fok. ³⁶ Shimon kan me ka shaayi kan shii in gassho biinii. ³⁷ Shinui in wa we shii kan shinui in tewon ti shii ya, "Koo nong in ti gassho biiko." ³⁸ Yeesho in tewi ya, "Kama warmu meno-mina ye nimmi kulang ne in wa kaawon paaro Yamma ti po teerei birang." ³⁹ Shii in wangro koo tong ti ta buk Galiili, in ti shuppina ti ta mina for-fokju kan in ti kajiyo bi shaabug. ⁴⁰ Shwiji mo an pira-lakat in waru shiknii. in juunanii nang in tewon ti shii ya, "Ke maa leka ke ta dum liyani nen shaanono." ⁴¹ Yeesho kemii ka kunngo, in shou kirani in tawin shiknii,in tewi ya, "Ne kunnga. Shaanoko." ⁴² Kpantidi baluki in wiilon ten ti shiknii, kan shiiin shaanani. ⁴³ Yeesho in pekro shii bang ya, ⁴⁴ "Jooro, moko kumu ken tewi ti niyom. Pene koo, ken wa shuk kuuko ti me ankpaa kan ken wa min ding ta-kira kaa ye Muuja pekraan longku fuddoko, ka we jimro ti piree kan shinui." ⁴⁵ Pene shii in peri in yiwani kpaalo pi shinnyii ti kudam, longkuuno te, Yeesho a ti dum ri tarang gok-mina ka dallamum, pene shii ti deenii ti piree a doo memme gbem. Kama ye kaa teerei memme in ti waru shiknii ti koo tong.