¹ Yeesho in reeni ta gong, in teeleni, nang in waru tarang gok-minani. ² Kpantidi, shinui in warin ti shii ka niyo ye shiki muraaro kannii ti ku irau. Bara ye Yeesho weyaa shik lishaarijui, shii in tewi ti mo shiki muraaroi ya, "Laano, yu beere. Fuwaa po fuddoko shasshalauko." ³ Kpantidi, peddi me an ballo wei in yiʊ tebrani ti shakkiju ya, "La moye ti Ku ya shwaal." ⁴ Yeesho penaa nyimmoju nang in tewi ya, "Longku wen ma ti ya piire nyimmo ti poshaari mai? ⁵ Longku maj-majii shire, in tewi ya, 'Fuddaako shasshalauko? koo in tewi ya, 'Illo ke kooko'? ⁶ Pene longku man peni La Niyo kan kumen ti ku-buk ka fuddo shasshalau, shii in tewi ti niyo ye shiki muraaroi ya, " Illo, shokro irauko, ken warko minako." ⁷ Nang niyoi in illani in kooni war Minani. ⁸ Bara ye jimai weyaa shik we te, shinui in ya maam kan kum pirino Yamma, mo minaa peen kumen ti memme. ⁹ Kaa ye Yeesho ti ku kowani ti po teere, shii in we shik manni niyoi shommonii Matta deeni ti po yiu keni-buk. Shii in tewon ya, "Yiru biino."Shii in illina in yiu biinii. ¹⁰ Kaa ye Yeesho diyoni dii ka we sha weshiina ti ta mina, kpantidi, me an yiu keni shin gbe kan me an shasshalau in waru sha weshiina kiryippa ka shaayi kan Yeesho kan me an yiu shubetni. ¹¹ Bara ye Parishiyaawa weyaa shiki, nang shinui in tewon ti me an yiu shubetnii ya, "Longku wen an shubetma ti sha weshiina kan me an yiu kine-buk kan me an shasshalawi?" ¹² Bara ye Yeesho yaaraa te, in tewi ta shii ya, "Me shikju bang a lewo an-gunulum, bara me shikjui bangum. ¹³ Nennaa man wa yiu shubet ti ku 'we tei' ta shuklo wen: Ne lekai kunngo a min ding ta kiram.' Longku Ne wannai ye me an dob in for fokum, penei me an shasshalau." ¹⁴ Nang me an yiu shubetno Yuwaana in waru shiknii in tewi ya,"Longku wen min kama Parishiyaawa ti yiu fokmu, pene me an yiu shubetko a ti yiu sheejummi?" ¹⁵ Yeesho in tewon ti shinui ya, "Me an jeere diyoi ta bau kennii ka yee ye tida mo an diyoi ka shaayi kan shinui? Pene darangi ta waru ye ta shar mo an diyoi ti piree kan shinui, nang shinui in tang waraa yiu fokju. ¹⁶ Adoo mo ta shar kooro lanna in kpalin-jwal lanna yen fom, pene maa yuwaa kaa te, kpalan-jwali ta jaattiro ti shik lannai, jaaran jwali ta yooro perak. ¹⁷ Kaa tei, memme a ta der men yen fo ti ta kooro lakat we-ta-gunum. Ma shinui maa yuwaa, lakati ta jaaroro, meni ta derero, kan meni ta dakloro. Kan ye kaa teere, shinui ta der men yen foi ti ta lakat we-ta-gun yen fo, kan shin ding a ta daklanim. ¹⁸ Koddi ye Yeesho ti ku sheeron we te ti shinui, kpantidi, manni mon gbai in waru in wa juunonnen ti toomnii. Shii in tewi ya, "Laino baa wende muraaro, pene waru ke wa liin kirako ti kuuroi, kan tei ta we bang shikro. " ¹⁹ Nang ye Yeesho in illina in yiu biinii gale kan me an yiu-shubetni. ²⁰ Kpantidi, manni paamuni ti ku bau pere-dom ti gunto po sheno kpumu gee-palau in mru ti kudo ta biino Yeesho in tau shik jele lannanii. ²¹ Longku tei teka ti kuuro ya, "Ne maa bara taka shik lannani, ne ta we bang shikno." ²² Pene Yeesho in shiwa dooni in we shikroi, nang in tewi ya, "Lai, pee shikji; lishaariji tasshaaji shikji."Nang paamuni in tasshoro ti ta koddi teerei. ²³ Bara ye Yeesho wanna ta mina mon gba shurme, shii in weme an biya dooro kan jimai ti ku ya bobak gbe. ²⁴ Shii in tewi ya, "Kooma won, longku la-gejei a murorom, pene tei ti ku yaani shaklo." Pene shinui in ya shuro kan nwinnyo-fok. ²⁵ Bara ye liina bi jimai ti peewe, shii in ri ta gumei, in yiwin la-gejei ti kirai in shokro shikro, nang la-gejei in illoro po sheri. ²⁶ Shinnyi we te in wiilo kpakan-fok buk teere. ²⁷ Kaa ye Yeesho ti ku kowani ti po teere, me an fugum shin palau in yiu biinii. Shinui in sha toom ka shoppo yallo kan in ti tewi ya, "Laano Dauda, kunngomu!" ²⁸ Bara ye Yeesho riina ta minai, me an fugum in waru shiknii. Yeesho in tewon ti shinui ya, "Ma liyaa shaari ne ta dum ya we te ya?" Shinui in lignon ti shii ya, "Oo, ta Fo-mina." ²⁹ Nang Yeesho in ta shik adoojui in tewi ya, "Shero mo yooro ti shik ma ti bi liyaan shaari ma," ³⁰ nang adoojui in appoju. Nang Yeesho in pekro shinui kping ya, "Mo ma kumu mondok in pen gun we tem." ³¹ Pene me an fugumi shin palawi in warjui kpaalo po shinnyii ti ta kpakan-fok buk teere ding. ³² Kaa ye men shwiji shurme kooju, kpantidi, shinui in waru ka manni baabai in shanngau paalaa kwi ti Yeesho. ³³ Bara ye kayaa bi shanngawi, baaba niyoi in ya paaro. Jimai in ya maam kan tewi ya, "We te a nau yooro ti Ishereilam!" ³⁴ Pene Parishiyaawa in ti tewi ya, "Shii ti ya we tei ka kumen shanngau, ye shii ti kayin bi shanngawi." ³⁵ Yeesho in wangro koo tong ti tarang gok-mina kan tarang meno-mina. Shii in sha toom ka yuyyo shubet ti ta mina for-fokju, in ti kpaalo fok shinnyi po ya-gub ku-dang kan tassho koo peen pira shire. ³⁶ Bara ye shii weyaa shik jimai, shii in kunngo shinui, longku shinui turmooju kan belan-poshaari. Shinui kaa dinnyi mei akan an tiim. ³⁷ Shii in tewi ti me an yiu shubetni ya, "Kasshani gbe, pene me an shurani kattani. ³⁸ Longku kaa te kpantidi ma for-fok ti Fo-mina mo an ku kasshoi, longku shii in shuru gun me an shuran ka we ya kasshoni."