¹ Yeesho in ye me an yiu shubetni shin kpumu gee-palau ka shaayi in minin kumen ti ku piire shoom, mo shinui kai biijui won, kan tassho peen pira kan peen agin ding. ² Wende shommo me an kaawi ma mee. Mo dokii Shimon (mo ti ye shii birang ya Biiturush), kan Andaraawush molli; Yaakubu laano Jabadi, kan Yuwaana molli; ³ Pilibush, kan Battilamawush; kan Tooma, kan Matta an yiu kine-buk; kan Yaakubu laano Alpayo, kan Tadaawush; ⁴ Shimon yei niyo ye leka kuuni, kan Yawuuda mo ta min shii. ⁵ Me shin kpumu gee-palau shurme, Yeesho in shur shinui. Shii in yuun nawit ti shinui ya, "Mo ma war shakki mei Yawudaawam, kan mo ma war tarang gok-mina me ti Shamaariya dokum. ⁶ Kan ye kaa teere ma war mina shekyan dinnyi me ti Ishereila; ⁷ kan mam maa ta warani, ma kpaalo po shuran te maa, "Po ya-gub ku-dang wanna nimmi.' ⁸ Ma tassho shik mei bangum, man shokro me kuma, ma shaano me an baluk, man kai bi shanngau won. Ma yikka kunngu, ma sheema ma minu kunngu. ⁹ Mo ma shar koo bela, koo laa-bela koo we-eem yen gakal ti ta vooromam. ¹⁰ Mo ma shar vooro mere ka longku mere mam, koo manni wei, koo taa, koo la-shugo, longku mo an shuran nennaa in we gwaangni. ¹¹ Mam maa riyaa ta gok-mina koo meno-mina, ma gassho bi mo fooraa ti tai, kan man dee ma ti po teere we war koddi ye ma ta koon ma. ¹² Kaa ye mam maa riyaa ta minai, ma kaa shinui. ¹³ Ma minai maa fooraa, shero mo twaalan-shaari ma mo deen ten ti kwi. Pene maa fooroom, shero mo twaalan-shaari ma meerito shik ma. ¹⁴ Kaa she me shinui a yiu ma koo in ke kumoju ti shik paaro mam, bara mam maa wessha ta mina koo gok-mina teere, ma tudira kpisshi ta shoo ma. ¹⁵ Kulli Ne ta teuma, ta yooro maj-maji ti ku buk Shodom kan Gomoora ti ta darang shiire kan ti ku gok-mina teere. ¹⁶ "Ma gee, Ne shuraa ma kaa dinnyi ti shakki angurateelu, longku kaate, ma yooma shen kaa kuret, kan an shekum kaa we ammaluk. ¹⁷ Ma geniro memme! Shinui ta min ma ti me an shiire, kan shinui ta bir ma shik ma ti ta mina for-fokju. ¹⁸ Nang ta warin man toom me an-toom kan me an-gub ka longku shommono, birang ma ta yooma me an jimro we te ti mei Yawudaawam. ¹⁹ Ma shinui maa minaa ma, mo ma turmoma ka wee ma ta tewanim, longku wee ma ta tewanii ta min ma ti ta koddi teere. ²⁰ Longku a ma ye ta ya paaroi, penei Shoomno Foma ye ta paaroi ti ta aama. ²¹ Me an moli ta min an moli ka we tukani, kan an fowi ta min laani. Men Shiba ta illo Kenne kan me an pariju kan li shinui we war mina muro. ²² Koo nong ta kura ma ka longku shommono. Pene maa mo shasshaa we war wiilani, niyo teere ta kaurani. ²³ Ma shinui maa kuraa ma ti ta gok-mina lee, ma juwa ma we war lennyi, longku kulli Ne ta teuma, ma ta fuyyo shanglo tarang gok-mina Ishereila dingum La Niyo ta waru. ²⁴ "La an yiu shubet a yeko an shupponim, koo shook in kooni ti fokno fo-minanim. ²⁵ Keraa kaa te longku la an yiu shubet in yooni kaa shupponi, kan shook kaa fo-minani. Ma shinui maa yeyaa fo-mina minai ka Baljaabul, ta yooro piire shommon ka yee ye shinui ta yoon me ta minanii? ²⁶ Longkuuno te, mo ma shi shinuim, longku a doo wee vumani yei ta piddo dweim, kan a doo wee lattani yei ta penorom. ²⁷ Wee Ne teka ma ti ta dil, ma sheeropiri ka aaro darang, kan wee ma yaaraa karaang ti ta kumo ma, ma ammo ma ku daalan ku-mina man kpaalon piri. ²⁸ Mo ma yu shewo me ti tuk lo-shikum pene a ti tuk kerangum. Kan ye kaa teere, ma shi mo ta dum tuk kerang kan lo-shik ti ta deet ku-dang. ²⁹ A bakri palau ye ti pilin-we ti ku kattan kine maa? Ar wende a doo ye dok ti shakkiju ye ta shuwani ti buk akan penanno Fomam. ³⁰ Pene koo shok kuuma maa maarani. ³¹ Mo ma yu shewom. Ma yeka bakri gbe kpang. ³² Longkuuno te, mo kunnga ya shii sheeno ti toom memme, Ne sheeno ne ta kumani kan shii ti toomno Fono mo ti ku-dang, ³³ Pene mo yuwaa jiram ya shii pennom ti toom memme, Ne sheeno ne ta ya jiramnii ti toomno Fono mo ti ku-dang. ³⁴ "Mo ma nyimmo maa ne wannai ka diyo twaalan shaari ti ku peewe pirim. Nei warui ka twaalan shaarim, pene ne wannai ka agarum. ³⁵ Longku ne wannai li niyo kenne kan foni, kan la-paamun kenne kan nonto, kan gbarum la-paamun kenne kan gbarumto yen paamini. ³⁶ Me an gei niyo ta yoojui me ta minani. ³⁷ "Mo ding ye leka foni koo nonni in kooro ti fok leuno, a nenno shiwa sheenom; mo ding ye leka laani la shwiji yei la-paamun in kooro ti fok leuno, a nenno shiwa sheenom. ³⁸ Maa moi shar biro loo kuuni in yiru biinom a nenno shiwa sheenom. ³⁹ Maa mo weyaa kerangni ta shekon ka te. Pene mo shekan ka kerangni ka longkuuno ta weyani. ⁴⁰ "Mo minna ma wanniya minnai ti ne, kan mo minnano wanniya birang minnai ti mo shunnano. ⁴¹ Mo minna wanniya ti an-pigra longku shii an-pigra, ta yiu we shik shuran an-pigra, kan shi mo minna wanniya ti niyo mo dob longku shii mo dob, ta yiu we-shik shuran mo dob. ⁴² Maa mo minaa ti dok shakki nyitti shiba meere modaa la-temme doo ka we sheyani longku shii an yiu shubet, kulli Ne ta teuma, a doo koko ye shii ta kaano we we shik shurannim."