¹ Bara ye Yeesho wiilo po pekro me an yiu shubetni shin kpumu gee-palawi, shii in wanna in ti shuppina kan kaawi ti tarang gok-minaju. ² Wende bara ye Yuwaana yaaraa ti ta mina muruk shinnyi ku shuranno Kiriti, shii in shur me an yiu shubetni ³ in tewon ti shinui ya ma telo shii maa, "Kei mo ta warui ya, koo min gee ku manni yen dokro?" ⁴ Yeesho in lignon ti shinui ya, "Ma koo man wa tewi ti Yuwaana wee weyaa shiki kan man yaarra. ⁵ Me an-fugum in ti we ta piri, me kuulei in ti ya mere, me an pira lakat in ti tasshaju, me gballa in ti yaarra birang, me muttaaju in ti pigro biijui kan dwei, kan in ti kaawo shinnyi yen tomon ti me an kenni. ⁶ Kpangi ti kuuno moi shuwa ka longkuunom." ⁷ Kaa ye me an yiu shubetno Yuwaana kooju, Yeesho in yiu sheero paaro ti kuuno Yuwaana ti jimai ya, "Ma waraai gee wen ti ta shweei? Ma waraai gejiyo shik jodiri alau shwee ye pirit ti ku midiro shik ya? ⁸ Pene ma kaa tem, ma waraai gejiyo shik wen? Niyo ye shoppaa lanna yen kpattirin ya? Onngoo, me ti shoppo lanna men kpattirinii shinui me ti ta mina me an gub. ⁹ Pene ma peraai gee shik an pigra ya? Oo, Ne ta teuma, nang yeka an pigra. ¹⁰ Tenei shii mo ballaan we ti kwi ya, 'Gee, Ne ti ku shur mo an shuranno ti toomko, mo ta limma do koko ken tang waru.' ¹¹ Ne ta teuma yen kulli, ti shakki me shereb patiraa a doo mo yeka Yuwaana an ya Yulma gbam. Pene mo kattani ti ta ya-gub ku-dang yeka shii gba. ¹² We yinna ti ta koddino Yuwaana an ya Yulma we foottu wende, po ya-gub ku-dang ti ku taa shilib shabbi, kan memme me an shabbi sharaa tei ka bang. ¹³ Longku yuyyan balila me an pigra kan shoro ding shinui yuyyaa pigrai Yuwaana in tang waru; ¹⁴ kan mam maa leka yiwani, shii Iliya ye wanna. ¹⁵ Shi mo kan kumo yaarani, shero mo shii yaaro. ¹⁶ Ne ta temyo ku-kira tei ka wen? Tei kaa shiba ti ya yarang ti ku-am po-piplo-we, me dii in ti yeyyo shaayi ¹⁷ in ti tewi ya, 'Min biika ma dooro, mai yu shorum. Minui bau kenni mai yu kwiim.' ¹⁸ Longku Yuwaanaa ti sha kan she menum, shinui in tewi ya, 'Shii mo kan shanngau.' ¹⁹ La Niyo in waru in ti sha kan sheyani kan shinui in ti tewi ya, 'Gee, shii an gawa niyo kan an sheyyo-we, an jeere me an yiu kine-buk kan me an shasshalau!' Pene ti pen shenii kan shuranto." ²⁰ Nang Yeesho in yiu pekro gok-mina me yuyyaan gbidina shuranni, longku shinui a for fokjum. ²¹ "Dil-dil ma ta Karajiin! Dil-dil ma ta Batshaida! Mo da gbidina shura ye yuyyaa ti taama daa yuyyaa ti Taaya kan Shiidon, shinui daa foraa fokju yau ti ta shoppan janjiruk lanna ti shikju kan dimlim. ²² Pene ta yooro maj-maj ti ku Taaya kan Shiidon ti ta darang shiire ti kuuma. ²³ Shi, ta Kapanaawum, shi nyiimaa ta shokro shi ti ku-dang ya? Onngoo, ta shaan shin ta duwa, Longku mo da wee yuyyaa ti taaji daa yuyyaa ti taaro, daa diyaan ten kaa we tei we foottu booi. ²⁴ Pene Ne ta teuji na ta yooro maj-maj ti ku buk Shodom ti ta darang shiire kan ye ti kuuji." ²⁵ Ti ta koddi teere, Yeesho in tewi ya, "Ne shokraa shommoko, ta Fowi, Fo-mina ku-dang kan ku-buk, longku ke nummaa-do we te ti piree kan me shen kan penani, kan ken au-dwei ti nyitti shiba. ²⁶ Oo, Fowi, longku tene kpang ti geyanko. ²⁷ We te ding minnano ti piree kan Fowi; kan a doo mo penaa Laim bara Fowii, birang a doo mo penaa Fowiim bara Lai kan mo ding Lai leka in awin dwei ti shii. ²⁸ Ma waru shikno,ma me ding ti ku taa shilibi kan tira shari, Ne ta minma nessho. ²⁹ Ma shar biro bongno ti kuuma man shar shubet ti piree kan ne, longku Ne baam-baami kan duulan ti poshaari, kan ma ta we nessho ka longku kerangma. ³⁰ Longku biro bongno a tiram kan sharino lib."