¹ Ti ta koddi teere, Yeesho in peri ti ku Darang Nessho Yawudaawa ti ta doon shau. Me an yiu shubetni in yaaro kpiyam, nang shinui in yiu gbaaro ka shawi shinui in ti ari. ² Pene bara ye Parishaawa weyaa kaa teere, nang shinu in tewi ti Yeesho ya, "Gee, me an yiu shubetko ti ku ya wee a nenno in ya Darang Nessho Yawudaawam." ³ Pene Yeesho in tewon ti shinui ya, "Mai nau maarani maa wee Dauda yuwaa koddi ye shii yaaraa kpiyam, kan memme me shinui ka shaayi kan shii maa? ⁴ Shii riyaa ta mina Yamma in sha we-ta-kele ye waka, yei nenno shii in sham kan a nenno me ka shaayi kan shiim, pene nenaai bara me ankpaa. ⁵ Mai maaro ti ta shoro ye ya ti ku Darang Nessho Yawudaawa ankpaa ti ta mina Yamma aka shooju ti ta ku shoro Darang Nessho Yawudaawa pene a yooro we kelnye ti piree kan shinui maa? ⁶ Pene Ne ta teuma gee mo yeka mina Yamma wono. ⁷ Mo da ma daa penaa wee we te ta shuklani, 'Ne lekai kunngo pene a ding ta-kiram,' ma daa shwaalo me an kelnyem. ⁸ Longku La Niyoi Fo-mina Darang Nessho Yawudaawa." ⁹ Nang Yeesho in wessho po teere in wanni ta mina for-fokju. ¹⁰ Kpantidi, ka manni shwijii ye kirai muraaro. Parishaawa in tel Yeesho ya, "Nennaa in ya tassho Darang Nessho Yawudaawaa?" Longku shinui in ya gunnii ti ku ya shasshalau. ¹¹ Yeesho in tewon ti shinui ya, "Wo shwiji nong ti shakki ma, ye shii kan dinnyini dok, maa shuga ti ta joori jwal Darang Nessho Yawudaawa, a ta yiru tei in forommi? ¹² Sho tiyee ye niyo yeka dinnyi kpangi! Longku kaa te shoro kunnga in ya wee kpang Darang Nessho Yawudaawa." ¹³ Nang Yeesho in tewon ti niyoi ya, "Shupro shik kirako." Shii in shupro shiki, nang meenaro bang, kaa yen dok kirai. ¹⁴ Pene Parishiyaawa in peri in wa deppina ta shinui ka we tuk shii. Shinui ti ku gassho koko po li shi murani. ¹⁵ Bara ye Yeesho jemlaa we te, shii in kooni ti po teere. Nang memme gbe in yiu biinii, nang shii in tassho shinui ding. ¹⁶ Shii in pekro shinui ya mo piime wessho kumani dogi memmei in penii, ¹⁷ longku in yooro yen kulli, ka wee tenna ta an-pigra Isheya ya, ¹⁸ "Ma gee, Shookno ye ne shaka; dok mo ne leka, ti taanii ye kerangno ti sha tomoni. Ne ta liin Shoomno ti kuunii, kan shii ta ya shiire ti mei Yawudaawam, ¹⁹ Shii a ta deewani koo in ya paaro ka eleyen bangum; koo manni niyoi ta yaaro eleni ti gbong koko tarang minam. ²⁰ Shii a ta bel ta goonan ta wem; shii a ta bitto ogro ye nennga bittorom, we war koddi ye shii ta yuun shiire sha-toom, ²¹ kan ti ta shommoni mei Yawudaawam gbe ta we lishaari." ²² Nang manni an-fugumi kan baaba, ye sharaa kwi ta shanngau, in warin ti Yeesho. Shii in tassho shii, kaa ye baaba niyoi yikka ya paaro kan in ti we ta piri. ²³ Jimai ding in ya maam kan tewani ya, "Koo niyo tei laano Dauda?" ²⁴ Pene bara ye Parishiyaawa yaa pi we maam te, shinui in tewi ya, "Niyo te ti for shaabugii waanim, barai ka Beeljebul, la gub shaabug." ²⁵ Pene Yeesho penaa nyimmoju nang in tewon ti shinui ya, "Koo po ya-gub shire ye bwaaraaro ti ku kenne, ta dakloro, kan a doo gok-mina yei mina ye bwaaraaro ti ku kenne ta sheranim. ²⁶ Ma shooro maa ti kai shooro, shii ti ku ya kenne kan kuuni. Wende ka yee ye po-ya gubni ta sheranii? ²⁷ Kan pene ne maa ti for shaabugii ka Beeljebul, shiba ma ti for sheejui ka nong? Longkuuno te shinui ta yooju me an shiiro ma. ²⁸ Pene Ne maa ti for shaabugii ka Shoomno Yamma, oo po ya-gub Yamma shaana kuuma. ²⁹ Ka yee mondok ta ri ta mina mo kan bangni in ya jiri ye shii tida maa dabyo shik mo bangi ka toomum mi? Nang shii in tang waraa jir we-kiranii ti ta minanii. ³⁰ Moi ka shaayi kan nem shii an kenneno, kan mo a ti gal-dwei ka shaayi kan nem shii ti pilii-tai. ³¹ Longkuuno te, Ne ta teuma, koo shasshalau kan bek shire ta fuddon ti shinui, pene bek ye yuwaa kenne kan Shoom a ta fuddanim. ³² Maa mo teka ding paaro ti shik La Niyo, teere ta fuddo shii. Pene maa mo yuwaa paaro kenne ti shik Shoom, teere a ta fuddo shiim, koo ti ku-buk te, koo ti taano ye ta waru. ³³ Man li biro in yooro yen kpang kan shiiliro yen kpang, koo man li biro in yooro ye piirei kan shiiliro yen piirei. longku ti pen biroi ti bi shiiliro. ³⁴ Ma gbuman-ku shammam, kaa ye mai me an shek, ma ta teu ween kpangi ka yaa? ³⁵ Niyo yen kpang ti ta po gal weeni yen kpang ye ti poshaarini ti perui ka ween kpang, kan piire niyo ti ta piire galan wee ti poshaarini ye ti peru ka piire we. ³⁶ Ne ta teuma na ti ta darang shiire, memme ta sheero pi piire pa-paaro ye shinui shediraa. ³⁷ Longku ti bi paaro ta fokko ye ta shiiron ken, kan ti bi paaroko ta kelmon ken." ³⁸ Nang me an balilo we kan Parishaawa in liginna ti Yeesho ya, "An shubet, min leka minun we shik temo ti piree kan ke." ³⁹ Pene Yeesho in lignon ti shinui ya, "Me piire kan me an shomak ku-kira te ti gassho bi we temo. Pene a doo we temo ye ta shukin ti shinui, bara temono Yunaana an-pigra. ⁴⁰ Kaa ye Yunaana yuwaa darang tat kan yippa tat ti ta aa gbong shirim, kaa te ye La Niyo ta ya darang tat kan yippa tat ti ta duwa. ⁴¹ Memme me ti Nennebe ta illani ta shinui ti ta darang shiire kan ku-kira memme te kan ta kelmo tei. Longku shinui foraa fokju koddi yaa kaawino Yunaana, kan ma gee, mo yeka Yunaana gba wono. ⁴² La-paamun ye ta ya gub ti Dang ta illani ti ku darang shiire kan memme ku-kira te kan ta kelmo shinui. Tei wanna ti po aja-karu longku yaaro shenno Sholmon, kan ma gee, mo yeka Sholmon gba wono. ⁴³ Ma piire shoom maa peraa ti shik niyo, ti yiwajui piree a doo doom in gasshon po nessho, pene maa wam. ⁴⁴ Nang ta tewani ya, "Ne ta meeno ta kooro minano piree milam ne diin.' Maa shinna, in we ta minai temmani kan tai limmani. ⁴⁵ Ta kowani in wa pallu piire shoom shin parilau me yeka tei piire, kan shinui shin ding in waru wa deeju ti po teere. Nang diyo niyo teere ye ka bi ta yek ye ka toom. Ta yooro kaa teere ti piree kan piire ku-kira te." ⁴⁶ Ye tida Yeesho ti ku sheero paaro ti jimai, kpantidi, nonni kan ma molonni in shengreju ti peewe, in ti gassho koko po ya paaro kan shii. ⁴⁷ Manni niyoi in tewon ti shii ya, "Gee, nonko kan ma molonko shengrii ti peewe, shinui leka yuuko paaro." ⁴⁸ Pene Yeesho in lignna in tewon ti shii ya, "Nonnoi nong kan ma molonnoi pitte?" ⁴⁹ Nang shii in shuklo kirani ti kudo piree kan me an yiu-shubetni in tewi ya, "Gee, ma meyyei ma nonno kan ma molonno! ⁵⁰ Longku maa mo ti ya wee Fono ti ku-dang leka, niyo teerei mollo, kan molano, kan nonno."