¹ Ti ta darang teere Yeesho in peri ti ta mina in wa deeni ti fok paali. ² Nang jima galo in gallin ti jelenii, nang shii in reeni ta gong in deennin ti tai dogi memmei in shengreju ti ku-shwiyak fok paalii. ³ Nang Yeesho in sheeron we gbe ti shinui ti ta shiwan-do-paaro. Shii in tewi ya, "Kpantidi, an-shirau waraai tobbo peen. ⁴ Kaa ye shii tobbaa, peddi peeni in shugyaju ti jele koko, adeewe in waru in jobbina shinui. ⁵ Peddi peeni in shugiyya ti ku karinkasshi, piree shinui a kan buk gbem. Kpantidi shinui in peru longku buki a sha talim. ⁶ Pene bara ye darang penna, shinui in kudan loowoju longku shinui a kan shoorinum, nang shinui in isshaju. ⁷ Peddi peeni in shugiyya ti ta arat. Arati in kpiri in kpakro shikjui. ⁸ Peddi peeni in shugiyya ti ku buk yen kpang in a weshiina, peddi shig-dok sho shig-dok, peddi naa-paragbanang, kan peddi naa-tat. ⁹ Mo shii kan kumo yaarani, shero mo shii yaaro." ¹⁰ Me an yiu-shubetti in waru in tewon ti shii ya, "Longku wen ke ti ya paaro ti jima ka shiwan-do-paaroi?" ¹¹ Yeesho in liginna kan in tewon ti shinui ya, "Ma sheema fuwaa po kum ma pir pen we maam ye ti po ya-gub ku-dang, pene ti piree kan shinu a minium. ¹² Longku maa mo kan te birang ta minin manni gbe, kan shii ta yooni kan te gbe. Pene maa moi kan tem, koo ye shii kan tei ta yiwin ti kiranii. ¹³ Tenei ye ne ti yuun paaro ti shinui ka shiwan-do-paaroi: kan koo shinui ti geena, shinui a ti wem; kan kaa ye shinui ta yaarra, shinui a ti yaarram, koo in peni. ¹⁴ Ti kuujui ye yaan pigrano an-pigra Isheya kenngan, ye tenna ya, 'Yei yaarra ma ta yaarani, pene a do koko ye ma po penenum; yei geyani ma ta weyani, pene a doo koko ye ma po jemlonum. ¹⁵ Longku poshaari memmei muraaro, kan shinui a ti dum yaaranim, kan shinui luppaa a dooju, longku a ta dum weyani ka adoojum, koo in yaarra ka kumoju, koo in peni ti poshaariju, longku shinui in meeru birang, kan nen tassho shinui.' ¹⁶ Pene kpangii ti ku adoo ma, longku shinui ti we; kan kumo ma , longku shinui ti yaarra. ¹⁷ Kulli Ne ta teuma na me an-pigra gbe kan me dob leka we shik wee ma ti we pene a ti we shikjuim. Shinui leka yaaro wee ma ti yaarra pene a ti yaaro shinuim. ¹⁸ Nang ma ka kumo ma ka shiwan-do-paaro mo an shirau mo tobbaa peennii. ¹⁹ Ma mondok maa yaaraa paaro po ya-gub ku-dang pene a dum penanim, me piirei wanna in lawwo wee tobbaan ti poshaarimii. Tenei peen ye tobbaa shinui ti jele koko. ²⁰ Wee tobbaa ti ku karinkasshi teerei niyo ye yaaraa paaroi, nang kpantidi in yiwi ka beere, ²¹ pene shii akan shoorin ti taanim nang bara shii ta shasshani po koddi la-wiiu. Koddi ye taa-shilib koo min shilib maa illina ka longku paaroi, shii ta kudan shuwani won. ²² Wee tobbaa ti shakki pere arat, tenei niyo mo yaaraa paaroi, pene leu we ku-buk kan dokko we birma in kpakro paaroi, nang shii in yooni akan shiilim. ²³ Peen ye tobbaa ti ku buk yen kpang, tenei niyo mo yaaraa paaroi in pen tei. Shii in sheelo shiili i ya weshiina, ka me shig-dok, peddi naa-paragbanang, kan peddi naa-tat sho gbe ti kuuno ye tobbaai." ²⁴ Yeesho in sheeron manni shiwan-do-paaroi ti shinui. Shii in tewi ya, "Po ya-gub ku-dang kaa niyo ye tobbaa peen yen kpang ti t doongni. ²⁵ Pene koddi ye memme ti ku shaklo, mo an geini in waru sheeni in tobbon kulu ti ta shawi nang in kooni. ²⁶ Pene bara ye peraa-ku in ya weshiina, nang kului in shuklo shikro. ²⁷ Me an shuran an ku doongi in waru in tewon ti shii ya, "Fo-mina, ke tobbaai peen yen kpang ti ku doong te maa? Duma penei ka yee ye kulu pennan ti tai?' ²⁸ "Shii in tewon ti shinui ya, 'Yuuna we teerei an gei.' "Me shooki in tewon ti shii ya, 'Oo ke leka minun wanna minun wa keyyo shinui ti buk ya?' ²⁹ "Mo an ku doongi in tewon ti shinui ya, 'Onngoo. Longku kergum koddi ye ma keyyo kului, kergum man keyyo shaayi kan shawi. ³⁰ Ma wesshon shin ding mo kpiru ka shaayi we war koddi kasshani. Ti ta koddi kasshani Ne ta twani ti me an kasshoi na, "Ma keyyo kului tida man yipyo shinui ka we kurani, pene man gal-do shawi ti ta kangno.""" ³¹ Nang Yeesho in sheeron manni shiwan-do-paaroi ti shinui ya, "Po ya-gub ku-dang kaa ar-tinnyak ye niyo tobbaa ti ta doongni. ³² Peen sheere kullii ye kattan peen kping. Pene koddi ye kpiraa, tei in yek dogi pere alau ta doongi. Tei in yooro biro, ar adeewe ku-dang in wangittu in limyon luwoju ti ku-fungai." ³³ Nang Yeesho in sheeron ti shinui manni temoi ya, "Po ya-gub ku-dang kaa yiij ye paamun sharaa in kpisshina ka keran lummo shau la-temme tat ye ar lummoi in oworo." ³⁴ Wee shurme te ding Yeesho in sheeron ti jimai ka temo; kan shii in tewon ti shinui birangum bara ti ta temo waani. ³⁵ Tenei yuwaaro kaa we tei longku wee tenna ta an-pigra in yooro yen kulli, koddi ye shii teka ya, " Ne ta au ku-fokno ti ta temo-temo. Ne ta teu wee lattaa ti liyan gun ku-buk." ³⁶ Nang Yeesho in wessho jimai in reeni ta mina. Me an yiu shubetnii in waru shiknii in tewi ta shinui ya, "Teumu wee temo kulu ta doongi ta shuklani." ³⁷ Yeesho in liginna ya, "Shi mo tobbaa peen yen kpangii La Niyo. ³⁸ Doongii ku-buk; kan peen yen kpangii, shurme tei shiba po ya-gub ku-dang. Kului shiba mo piirei, ³⁹ kan mo an geyi mo tobbaa shinui shuuro. Kasshanii wiilan ku-buk, kan me an kasshoi me an-shuran ku-dang. ⁴⁰ Longkuuno te, kaa ye maa galaa do kului in kuri ka deet, kaa te ta yooro ti ta wiilan ku-buk. ⁴¹ La Niyo ta shuru gun me an-shuran ku-dang, shinui ta ganglo do wee ti ta po ya-gubni ye ti yeeru ya shasshalau kan me ti yuyyo ween doon. ⁴² Shinui ta vingyo shinui ti ta bilak-bilak deet, piree ta yuyyon kwii kan angro ku wuro. ⁴³ Nang memme me dob ta aarani kaa darang ti ta ya-gubno Foju. Mo kan kumo, shero mo shii yaaro. ⁴⁴ "Po ya-gub ku-dang kaa galaan birma ti ta doong. Manni niyoi in we in lattina. Ti ta beereni shii in wanna, in pilin-we ka wee shi kan te ding in pilin doong teere. ⁴⁵ Birang, po ya-gub ku-dang kaa niyo mo an birma ye ta gassho bi lu'ulu'u yen illo. ⁴⁶ Bara ye shii weyaa lu'ulu'ui dok yen illo kping, shii in wanna in wa pilin ka wee shi kan te ding in pilin bi. ⁴⁷ "Birang, po ya-gub ku-dang kaa ja ye teraa ti ta paali, kan in gangillu kpijiyan we peeni-peeni. ⁴⁸ Bara ye kemnaro, shwiji me an yippo shirimi in tollu ti peewe ti po gangrai. Nang shinui in deeju dii in shakko meen kpattiri ti ta manni sharii, pene mei kpangumi shinui in ukkina won. ⁴⁹ Ta yoo kaa te ti wiilan ku-buk. Me an-shuran ku-dang ta waru in bwaaro shakki me shek kan me dob. ⁵⁰ Shinui ta vingyo shinui ti ta bilak-bilak deet, piree ta yuun kwii kan ar-ku wuro. ⁵¹ "Ma penaa ween shurme te ding ya?" Me an yiu shubeti in lignon ti shii ya, "Oo." ⁵² Nang Yeesho in tewon ti shinui ya, "Longku kaa te koo an ballo-we ye shigani an yiu shubet ti ta po ya-gub ku-dang shii kaa niyo ye an ku-mina, ye palla yen kooro kan yen fo ti po gsl we-kirani." ⁵³ Nang in yooro kaa tei koddi ye bara ye Yeesho wiilaa shediro temo shurme te, shii in kooni ti po teere. ⁵⁴ Nang Yeesho in reeni ta kpakan-fok bukni in yuun shubet ti memme ti ta mina for-fokju. Ween yinna bii ye memme in ya maam in tewi ya, "La moo ye weena shenni kan we maam tei? ⁵⁵ Tenei la mo an limyo we po-dang maa? Nonnonii ye ti ye yaa Maryamu maa? Kan ma molonnii ma Yaakubu, Yuwaana, Shimon kan Yawuda maa? ⁵⁶ A ma molani me shinui ka shaayi kan kama maa? Duma shii weena we tei ti tong?" ⁵⁷ Nang ta aajui in daklon ten ti shiknii. Pene Yeesho in tewon ti shinui ya, "Mo an-pigra a ti kaano we gbam nang bara ti gok-minani kan ti piree kan me ta minani." ⁵⁸ Nang shii a yuyyo we maam gbem ka longku ye shinui akan lishaarim.